ئارۆ هێزەکێ سوریای دیموکراتی-قەسەده، جە کۆنفڕانسی ڕۆچنامەۋانییەنە ئاشکراش کەرد: "جە بەردەۋامی جەنگی چەنی داعشی و پاکسازی کەردەیشان، جە ۱۰ ئەیلولو ۲۰۱۸ قۆناخێ نوش جە هەڵمەتو گەردەلولو جزیرەی جە وەرهۆرزو فوراتی دەست پنە کەردەن".

جە کۆنفەڕانسەکەنە کە جە ناوچەو شەدادی سەر بە کانتۆنو حەسەکەی بەسیا، سەرەڕا چنڎین دەزگێ یاونەری و مەدیایی، سەرۆکێ عەشیرەتەکان و ڕیش چەرمێ ناوچەکەی ئامادێ بیێ.

بەنامێ قەسەدەی فەرماندێ لیلوا عەبدوڵا، بەیاننامەش وەنەۋە و جەختش جە کۆتایی ئاردەی بە داعشی و تەرۆری جە وەرهۆرزو فڕاتی (حەسەکە و دێرزوور) کەردەۋە و واتش:"ساڵێۋەن هێزەکێمان بە هامکاری هامپەیمانی میاندەوڵەتی دەستشان بە هەڵمەتو گەردەلولو جزیرەی کەردەن، جە ئاکامشەنە ڕووبەرێ فراوانی هەزاران کیلۆمەتر چوارگۆشەیی، سەدان دەگێ و هەزاران هاموڵاتیێ-مان جە داعشی ڕزگارێ کەردێنێ".
 
 لیلوا عەبدوڵا، ئاشکرش کەردەن: "جە ئیسەنە تەنها جە ناوچەو هەجین-ی داعش مەنەن و پەی پاکسازی کەردەیشان جە ۱۰و ئەیلول-و ۲۰۱۸ی، دمایین قۆناخ جە هەڵمەتەکەیشان دەست پنە کەردەن و سەرجەم دێهاتەکێ شارچەکانو  هەجین، سۆسا، شەفای و ڕووبەرێ بە درێژایی ۳٥ کیلۆمەترێ و پانتایی ۱۰ کیلۆمەترێ ڕزگارێ کریێنێ. هەر پاسە هێزەکێمان بە ئەرکی مرۆیی وێشان هۆرستێنێ و جە نزیک شارچەو بوحیرەی ڕاڕەۋی مرۆیشان پەی ڕزگارکەردەی هاموڵاتیان کەردەنەۋە و خزمەتگوزاریشان پەی ئامادە کریان و بەڕێز و هەستیاری مامەڵە چەنی ئا کەسانیچە مەکەرانە کە کەسوکارشان جەدەست دان یان چارەنویسشان نادیارەن.".

نامبریێ هێزە بەشدارەکێ هەڵمەتەکێش پەی جۆرە ئاشکرێ کەردێ: هێزەکێ لیواو ئەنجوومەنو سەربازیى دێرزۆری، یەکینەکێ پارێزنای سنوری، لیواو تایبەتو یەپەگە و یەپەژە، فڕۆکێ و تۆپخانەکێ هامپەیمانی میاندۆڵەتی و تۆپخانەکێ سەرسنورو ئێراقی.