محەمەد ئۆجالان داۋاش کەردێنە، تا گۆشەگیری سەرو عەبدوڵا ئۆجالان، رێبەرو گەلو کوردی قبوڵ نەکریۆنە و وشیاریش دان، ئەگەر ئیسە هەڵۋێستە نیشانە نەڎریۆنە، ڕەنگا سەڤای فرە دێر بۆنە و کار جە کاری ترازیا بۆنە.
محەمەد ئۆجالان، براو ڕێبەرو گەلو کوردی، عەبدوڵا ئۆجالانی، جە بارەو گۆشەگیری ئیمرالی و قەدەغەکەردەو دیدارکا چەنی براکەیش، جە دیمانێۋەنە چەنی ئاژانسو میزۆپۆتامیای (MA) واتەنش: سەرەڕا هەوڵەکاما بەڵام دیسان بە پاساۋێ بێبنەمێ دەسەڵاتدارێ تورکیای دیدارەکا ئمرالی ئاستەنگی مەکەرانە و جە ئیمرالی بارودۆخێۋ زیاتەر جە گۆشەگیری خوڵقیان، کە ئا بارودۆخە هەرگیزی مایەو قبوڵی نییەن و مشیۆم سەرڕاست بکریۆۋە.
ئۆجالان داۋاش کەردەن، تا کورد و گەلێ وەرکەوتی دلینی دژ بە بارودۆخەکەو ئیمرالی زیاتەر کۆشش بکەرانە و بە پاخێزا و ماچۆنە: وەرکەوتی دلین(ڕۆژهەڵاتی ناوین) بە چنڎین کێشێۋە گرفتارەن، ئەگەر هێزە سەردەستەکێ گەرەکشانە ئا کێشێ چارەسەرێ ببانە مشیۆم ڕا بڎا دیدارەکێ چەنی ئۆجالانی دەس پنە بکەراۋە. چونکە تەنها ئۆجالانەن کە توانایی چارەسەری کێشەکاش هەن. ۉەرو ئانەیە مشیۆم بارودۆخش جەئیمرالی خاستەر بکریۆنە و دەرفەتیش پەی ڕەخسنیۆنە تا ڕۆڵ و ئەرکش کارا بە جا باۋەرۆنە.
محەمەد ئۆجالان جەخت مەکەرۆۋە، کە ئیمرالی پەی کوردی دڵ و چەم و گۆشێن، پۆکەی بە گۆشەگیری ئۆجالانی جە ئیمرالی کورد زیاتەر بێئومێڎ بیەن، ئەگەر دیدارەکێ ئیمرالی دەس پنە نەکەراۋە، ئاۋەختە تورکیا و وەرکەوتی دلین ڕێۋەرە ملانە کە ئەۋەگێڵایشا نییەن.
محەمەد ئۆجالان، براو ڕێبەرو گەلو کوردی، عەبدوڵا ئۆجالانی ئاشکراش کەردەن: جە ئیمرالی بارودۆخێۋ زیاتەر جە گۆشەگیری هەن، کە ئا بارودۆخە هەرگیزی مایەو قبوڵی نییەن و مشییۆم پەی کۆتایی ئاردەی بە گۆشەگیری ئیمرالی و مسۆگەرکەردەی ئازادی ئۆجالانی، چڕ و پەڕتەر جە ۋیەردەی کۆشش بکریۆنە. هەرگیز نمەبۆ قبوڵ کریۆنە کە ئۆجالان جە بەرو ئاژە و ڕۆژەڤینە بازیۆۋە، پەی ئانێچە ئاخێزی جەماوەری جه کوردستان، تورکیا و وەرکەوتی دلین زەرورەن. ئەگەر ئارۆ ئانە نەکریۆنە، ڕەنگا سەڤای فرە دێر بۆنە و کار جە کاری ترازیا بۆنە. ئانێچە باجەکەش چێشەن مڎێمش. نمەبۆ کەس چا باجەیە بتەرسۆنە، چونکە باجدای پاسنە ئاشتی و چارەسەری و ئارامی چەنی وێش مارۆنە.
ڕێبەرو گەلو کوردی، عەبدوڵا ئۆجالان، نزیک بە ۲۰ ساڵێن جە ئیمرالی گۆشەگیر کریان و پەراۋێز ۋزیان، گۆشەگیری و پەراۋێزۋستەکە زیاتەر جە ۳ ساڵێن قورستەر کریان و هیچ هەۋاڵ و زانیاریێ دروس جەبارەشەۋە نییەن و چارنویسش نادیارەن.
جە ٥و نیسان-و ٢٠١٥ی تا ئارۆ ڕێبەر ئۆجالان جە گۆشەگیری قورسەنە بەسەر بەرۆنە. جە ٢٧و تەمووزو ٢٠١١ی شۆنیەرە ڕا بە پارێزەراش نەڎریان سەردایش بکەرانە. جە ٢٠١٦نە، دمای فشار و ناڕەزایەتی فرەی ڕا بە مەمەد ئۆجالانی دریا تا سەردای ئیمرالی بکەرۆنە و کوڵە دیدارێ چەنی ئۆجالانی برایش ئەنجام بڎۆنە. دمای ئانەیە ئیتر ڕا بە خانەۋادەکێچ نەدریا چەمشا پنەش بگنۆنە. نەک تەنها رێبەر ئاپۆ، بەڵکو ٣ زیندانىێ شۆڕشگێڵێ تەرێ جە ئیمرالی دیدارەکێشا قەدەغە کریێنێ.
