جە هەرێمو هورامانی دمابەدماو کۆکەردەی و ڕنییەی بەرهەمە پایزیەکان (هەنگوری و وەزی و هەناری)، جە ئیسەنە هەورامیەکێ سەرقاڵێ ڕنییەی و کۆکەردەی بەرهەمو بلچانێ، کە جە جەنگەڵ و باخەکانە درختەکێش ۋێڕستانە هەنێ. بلچی جیاۋاز جە درەخت و میوە جۆربەجۆرەکانو هەورامانی، ئاویاری و خزمەتی کەمش گەرەکەن و کاڵیار و باخدارێ فرە زەحمەتش چنی نمەکێشانە و ساڵانە هەزاران کیلۋێشان کۆکریاۋە و ڕەۋانەو بازاری مەکریانە. ئێساڵ بەهۆو ئاۋی و هەۋای گونجیای دار بلچەکێ هەورامانی بەرهەمی فرەشان دان و ئانێچە کاڵیارێ و باخدارێ هەورامانیش شادمانێ کەردێنێ.

درەختو بلچێ جە دێر زەمانەوە جە کەش و کۆ و دۆڵ و دەرەکانو هەورامانیەن هەنێ، جە تیرە یان ڕەگەزو (ۋلە سورەکان)ێ و دووێ جۆرێ سەرەکیش هەنێ ، کە بلچی سورێ و زەردێنێ. بلچی سەرەڕاو ۋاردەیش پێسەو میۋەی، پەی چارەسەری نەوەشییە جیاۋازەکان، ڕێکۋستەی کۆلیستڕۆڵی و فشارو هونێ، دلێنەبەردەی مادە زیان بخشەکانو جەستەی، دوور ۋستەی جە نەوەشی دڵ(زێڵ)ی و قەنڎی فرە بەسودێنێ.

جـ.هـ