شاعیر و ئەندیشمەند، حاجی موحەمەد خەلەیفە سەنیع کوردستانی، کە دلێ خەڵکینە بە خەلەیفە مەحەمەد و دنیاو ئەدەبیاتییەنە بە خادم ئەشناسیان، ساڵەو ١٣٢٤ وەرەتاوی جە پاوە شار جە ئەڎێ بییەن.
جە ئەی بارەوە عەدنان مورادی ڕاوەبەرو ئەرەمەرزیا وەڵاوکەردەو ئارۆو پاوە-ی بە پەلیانەوە سەلام پاوە-یش واتەن:
حاجی موحەمەد خەلەیفە سەنیع کوردستانی کۆمەڵێوی فرێ شیعرش هەنێ کە چەندین دەفتەرێنە بە نامێ «کەشکۆڵی درۆێشی» کۆکریێنێوە و ئەرەمەرزیاو ئارۆ-یچ سەرجەم شیعرەکێش جە دیوانێوێ ٤٠٠ لاپەڕەیەنە بەنامێ «خەرمان»ی چاپ و وەڵاوکەردەنەوە و ڕەوانە و بازاری و کتێبخانەو 
مرادی ئاشکراش کەردەن: ئەرەمەرزیاکەشان بە شانازییەوە، دوێ بەرهەمێ تەرێ نامبریای بە نامەکێ «اسرار عشق» و «کلمات قصار»یش بە پەشتیوانی مەنسور فەرەجی چاپێ وەڵاوێ کەردێنێوە.

ئەرەمەرزیا وەڵاوکەردەو ئارۆو پاوە-ی جە ئی یەک دوە ساڵەو دماییەنە بە چاپ کەردەی و وەڵاکەردەیۆ کتێبێ، دیوانێ، دەستنویسێ و کەشکۆلێ نویسەران و شاعرانو هەورامانی، خزمەتێوی فرە گەورەش بە ئەدەبیات و کتێبخانەی هەورامی کەردەن.

نمونێو جە شیعرەکانو حاجی موحەمەد خەلەیفە سەنیع کوردستانی:

دنیا زەمینەن تۆمە تێش شانی
ڕووەت بۆ حاسڵش سوورەتش بوانی
هەرکەس دەوارش هۆردا بە تاعەت
جە گۆشەی سارای دەشتی قەناعەت
شەوقی جەم کەردەی ماڵ نەوەرد نه دڵ
مەرارەت نەوەرد وە گۆشەی مەنزڵ
با واچان دنیا چیر و سەر بیەن
«خادٚم» دڵهورەی وێرانیش نیەن

گڵۆڵەم کەوتەن وە لێژایی بەخت
هۆر کەردەیش پەرێم یەکجار بیەن سەخت
گێسم شێویان پێچیان وە هەم
پڕووک پڕووکەن سەد سەر مەدٚۆ چەم
تای لەتەرەی بەخت شیواڵ شیواڵەن
کرژ و تاودائیش پەرێم مەحاڵەن
هەر کۆگەی مەلوو زەلکاوەن جە ڕام
خاڵیەن جە دەس گەمەی مشتیل کام
تەریدە دانش وە بێخی یانەم
نە بەرەش ئاسەن نە بەراسانەم
تاڵان وارۆ کەر هووترمەش ئاوەرد
وێنەی گەردەلوول بەردش تۆز و گەرد
بووڵەو بانانم کێشیان وە سەر
زەل و بووڵ بەشمەن نەتیجە و سەمەر
چوون تۆپی تۆپقاڕ مەدٚانێم وەنە
ئیلای مەگێروو ئەولاشان کەنە
زەلەرە کێشوو پەی بەخت و بارم
کۆسی کەفتەو وێم پەی کەس و کارم
نەمەن قەرەچۆڵ جە ئەدٚا و بابە
بارم لارە سەنگ خەوەردار لابە
باری من کەفتەم چەڵەم ترازیان
نە بارم بارەن نە کار ڕازیان