هامسەرۆکەو گردی هەدەپەی پەرۋین بوڵدان، دژ بە بڕیارو دادگا مافو مرۆڤی جە ئەوروپا، کە سەبارەت بە ڕێبەر ئوجالانی دانش ناڕەزایەیش نیشانە دا و بڕیارەکەش بە ڕەفتارو ئەوروپای ۋەراۋەر بە کوردی جە قەڵەم دا.
پەنجشەممە ۲۷و ئەیلولی دادگا مافو مرۆڤی جە ئەوروپا، سەردای و سکاڵاو پارێزەکانو عەبدوڵا ئۆجالان ڕێبەرو گەلو کوردیش بە بەهانەو نەبیەی بەڵگەی ڕەت کەردە بێ، کە جە ۲۰۰۸ سەبارەت بە ئەشکەنجەکەردەی ئۆجالانیش جە ئیمرالی تۆمارشان کەردەبێ. پەی جۆرە دادگاگە ڕەۋایەتیش بە گۆشەگیری ئیمرالی و ئەشکەنجەکەی دابێ.
جەی بارەۋە هامسەرۆکەو گردی هەدەپەی پەرۋین بوڵدان، کە هامکات ئەندامەنە جە شاندو ئیمرالی، ناڕەزایەتیش نیشانە دان و بڕیارو دادگا مافو مرۆڤی جە ئەوروپا-(DMME)یش، نەک تەنیا دژو بەڕێز ئۆجالانی، بەڵکو دژ بە سەرجەم کوردی بەنامێ کەردەن و ۋاتەنش: "گۆشەگیری ئیمرالی جە ۲۰۱٥ دەستش پنە نەکەردەن، بەڵکو نزیک بە ۲۰ ساڵێن گۆشەگیری قورس سەپیان سەرو بەڕێز ئۆجالان-یەرە".
پەرۋینە ئاشکراش کەردەن: "سەبارەت بە گۆشەگیری و ئەشکەنجەو ئیمرالی، تورکیا، ئەوروپا، دادگا مافو مرۆڤی جە ئەوروپا هەڵۋێست و بڕیارشان نەرێنییەن. دیدار و چەمپنەکەوتەی ئۆجالانی چنی پارێزەکانش و خانەۋادەکەیش و شاندە سەربەوێکان مافێۋی مرۆیی، سیاسی و شروشتییەن. ڕەتکەردەی سکاڵاکەی ڕاست نییەن و سەر-ڕاستکەردەیش گەرەکەن".
هامسەرۆکەو گردی هەدەپەی پەرۋین بوڵدان، جەتش کەردەنەۋە کە ئۆجالان کەسێ و زیندانیێۋی ئاسایی نییەن و ئیمرالیچ زیندانێ ئاساییی نییەن و ۋاتەنش: "گۆشەگیرکەردەی بەڕێز ئۆجالانی قبوڵ نمەکریۆنە. بڕیارو دادگا مافو مرۆڤی جە ئەوروپا هەڵەن و هڵوێستەن دژو کوردی و مشێۆم دەمودەست فاڕیۆنە".
یاگێ ۋیر ۋستەیەن کە زیاتەر جە ۲ ساڵێن هەۋاڵ و زانیاری سەبارەت بە ئۆجالانی نییەن و چارەنویسش نادیارەن و ڕا بە کەسوکاری و پارێزەکانیچش نمەڎریۆنە سەردایش بکەرانە. بە گردی ساڵێن پارێزەکێش سەرجەم داۋاکاریەکێشان پەی چەمپنەکەوتەی چەنی ئۆجالانی بەهانێ جۆراوجۆرێ چوون"خراپی کەش و هەۋای، باری نائاسایی، مەڕیای کەشتی" ڕەتێ کریێنێ. دمایین جاریچ جە چنڎ ڕۋی ۋیەردەنە دەسەڵاتدارێ تورکیای ئاشکراشان کەردەبێ: کە ٦ مانگی سزاو دسپلینی-شان پەی ئۆجالانی بڕیێنەۋە. بە جۆرێچە گەرەکشانە بەرگێ یاسایی بکەرانە ۋەرو ئەشکەنجە و گۆشەگیر ئیمرالی.
