نویسەری دیار و نامی هەورامانی و کوردستانی ئەردەڵان عەبدوڵا، جە شارو سلێمانیێ نوتەرین کتێب-و وێش بە زۋانی هەورامی چاپ و ۋەڵاکەردەۋە. جەی بارەۋە ئەردەڵان عەبدوڵا بە ئاژانسەکەیمان "فوڕات نیوز"یش ۋات: "پەی یەکەمین جاری کتێب-ۋش بە نامێ "ڕازی هۆرامی"ێ نۋیستەن و چاپش کەردەن و ۋستەنەرە بازار و وەڵتەر سەرجەم کتێبەکێش بە سۆرانی نویستێنێ و ئینە یەکەم جارەن کە بە هەورامی منۋیسۆنە".

ئەردەڵان عەبدوڵا ئاشکراش کەرد: " کتێبە نوکەش ۷ کوڵە ڕازێ (چیرۆکێ) جە وێ مەگێرۆنە و ۱۰۰ لاپەڕێ بۆنە. چیرۆکەکێ هەر یۆ باس جە ژیۋای و سەرپنەئامای کەسایەتیێۋی و ڕوودایێۋی جیاۋازێ مەکەرانە و بەشێوازی فەنتازی و ئەدەبی نویسێنێ و کە کات و ساتو نۋیستەیشان مەگڵێۆۋە پەی ساڵانو ۋیەردەی و یەک ڎۋە ساڵێ ئی دمایە و یەکەم جارەن جە پانیشت (باشور)و کوردستانی کتێبێۋی پی جۆرە بە هەورامی بنۋیسیۆنە و چاپ و ۋەڵا بکریۆۋە. ".

ئەردەڵان عەبدوڵا، ئومێڎەوارەن جە ڕاو نویستەی کتێبەکەیش خزمەتش بە ئەدەب و ۋێژەو هەورامانی و کوردستانی و پارێزنای هەورامی کەردەبۆنە و ئاشکراش مەکەرۆنە، کە کتێبەکەش بە سپۆنسەری قوباد تاڵەبانی یاگەگیرو سەرۆکو حکومەتو هەرێمو کوردستانی چاپ کریان و سپاسو نامبریاش کەرد.

ئەردەڵان عەبدوڵا، نویسەر و ڕۆژنامەۋان و میدیاکارەن و تا ئیسە ۱۸ کتێبێش جە بۋارە جیاۋازەکانە نویستێنێ و چنڎین بەرنامێ دیکۆمەنتاریێ تەلەفزیۆنیش بەرهەم ئاردێنێ و ۋەڵێ کریێنێ. فوڕات نیوز سەبارەت بەکار و چالاکییە ئەدەبیەکانش و بەتایبەتی نوتەرین کتێبش "ڕازی هۆرامی" دیمانێ درێژش جەنی بەڕێزیشان ئەنجام دان و بەزوویی ۋەڵاش مەکەرمێۋە.