ڕووسیا و سوریا: كه وەختش ئاما، بشۆم تورکیا جە سوریا کێشیۆۋە
ئه‌لێكسانده‌ر لاڤره‌نتیه‌ڤ و بەشار جەعفەری، بە جیا جەخت جە ئەۋەکێشیای هێزەکا تورکیای جە سوریا مەکەراۋە.
ئه‌لێكسانده‌ر لاڤره‌نتیه‌ڤ نمایندەو تایبه‌تو ڤلادیمێر پوتین، سه‌رۆكو ڕووسیای پەی مەدیاکا وڵاتەکێش ئاشکراش کەرد: دەڤەرەکێ سوریا کە هێزەکێ تورکیای چنەشانە یاگەگیرێ بیێنێ، جە جەرابولس تا عەزازی گێرۆۋە و هەرێمێۋی فراۋانەن. ئانێچە دمای ئانەیە ڕووەشدا، کە پەی ئاۋاکەردەی سیستەمێۋی جە "ئدلب"، تورکیا وێش ۋست چێرو بارو ۋەرپەرسیاری.
ئه‌لێكسانده‌ر لاڤره‌نتیه‌ڤ، ۋاتەنش: بەڵام ئینە پا مانا نییەن کە تورکیا تا سەر چا دەڤەرانە بمەنۆۋە، بەڵکو هەمیشە ۋاتەنما دمای کۆتایی ئامای بە ئۆپەراسیۆنی بشۆم تورکیا هێزەکاش جە سوریا کێشۆۋە. دماتەر یۆۋستەی ئا دەڤەرا بەردەۋامیش پنە مڎریۆنە. یانی کە وەختش ئاما تورکیا بشۆم بازۆشا جیا.
هەر پاسە سەبارەت هێزەکا تورکیای و ئایندەشا جە سوریا، بەشار جەعفەری، نمایندەو سوریە جە نەتەوە یۆگێرتەکا هەمان قسێ ڕووسەکاش دووبارە کەردێنەۋە و واتەنش: بیەی هێزەکا تورکیای جە خاکو سوریایەنە (داگیرکاری) ئەرەگێرتە-یەن. حکومەتی سوری کۆشۆنە گرد بەشەکا وڵاتی ۋزۆۋە چێرو ڕکێفیش.
جەعفەری ئاشکراش کەردەن، سوریا تا سەر چەمپۆشی جە داگیرکاری تورکیای نمەکەرانە و ڕۋێ مەیۆنە بەرشا مەکەرانە و کۆتایی بە داگیرکاریەکەی ماۋەرۆنە.
ئی قسە و باسێ وەختێۋەنە کریانە کە تورکیا ئامادەکاری پەی کۆبیەی چەنی ڕووسیا، ئەڵمانیا و فەڕەنسای جە مانگەو ئەیلولی مەکەرۆنە و بڕیارەن کە دلێشەنە ئایندەو سوریای یەکلایی بکریۆۋە و تورکیاچ داگیرکاری وێش جە سوریا سەپنۆنە. بەڵام قسەکێ ئه‌لێكسانده‌ر لاڤره‌نتیه‌ڤ و بەشار جەعفەری پێچەۋانەو حەز و خولیکا تورکیای نیشانە مڎانە.
