کەجەکە: ئەوروپا بە ئاشکرا ڕەۋایەتی بە گۆشەگیری ئیمرالی مڎۆنە
کەجەکە بڕیارو دادگاو مافو مرۆڤو ئەوروپای سەبارەت بە ئۆجالانی و سەردای ئەردۆغان پەی ئەڵمانیاش سەرکۆنە کەرد و دەستنیشانش کەرد: "ئەوروپا بە ئاشکرا ڕەۋایەتی بە گۆشەگیری ئیمرالی مڎۆنە"
پەنجشەممە ۲۷و ئەیلولی ۋیەردەی دادگا مافو مرۆڤی جە ئەوروپا، سەردای و سکاڵاو پارێزەکانو عەبدوڵا ئۆجالان ڕێبەرو گەلو کوردیش بە بەهانەو نەبیەی بەڵگەی ڕەت کەردە بێ، کە جە ۲۰۰۸ سەبارەت بە ئەشکەنجەکەردەی ئۆجالانی جە ئیمرالی تۆمارشان کەردەبێ. پەی جۆرە دادگاگە گۆشەگیریەکەش نادیدە گێرت و ڕەۋایەتیش بە ئەشکەنجە و گۆشەگیری ئیمرالی دابێ.
جەی بارەۋە هامسەرۆکایەتیى کۆنسەو ڕاۋەبەری کۆما جڤاکێن کوردستانی (کەجەکە)، ۋەڵاکریێۋش دان و دلێشەنە بڕیارەکەش شەرمەزار کەردەن و هامکات سەردای ئەردۆغانش پەی ئەڵمانیای سەرکۆنە کەردەن و ئاشکراش کەردەن: "ئانێ کە فەرشێ سورە پەی ئەردۆغانی میاۋارە دەرەنجام جە ۋەراۋەو ویژدانی و دادپەروەریی و مێژوویەنە تاۋانبارێ ببانە و سۆچانە. سەردای ئەردۆغانی و بڕیارەکەو دادگاکەی ماسکو ئەڵمانیاش هۆرماڵا و سەرداکەیچ خزمەت بە سەرمایەی جە ئەڵمانیای مەکەرۆنە. جە ڕاستیەنە جە ئەڵمانیا وئەوروپا باسکەردەی جە دیمۆکراسی تەنها پەی شارای داگیرکاری و سیاسەتی بەرژەوەندی-ۋازانەیشانە و هیچی تەر. بڕیارو دادگاو مافو مرۆڤی جە ئەوروپای کە هاموەخت بێ چنی ئار سەردایە، پی جۆرە پەیام و پەشتیۋانی ئەڵمانیا و ئەوروپای پەی دەسەڵاتە فاشیستەکەو ئەردۆغانی دووپات کریاۋە و ئەوروپا بە ئاشکرا ڕەۋایەتیش بە گۆشەگیری ئیمرالی و ئەشکەنجەکەردەی ڕێبەر ئاپۆی دا".
سەبارەت بە چالاکی گیانبازی ئۊمێد ئاجاری کە جە ئەڵمانیا دژ بە سەردای ئەردۆغانی و بە فەرمی پێشۋازی-کەردەیش و گۆشەگیرکەردەی ڕێبەر ئۆجالانی ئەنجامش دابێ و بەوێ-سۊچنای شەهید بی، کەجەکە سەرەڕاو سەرەوەشی جە بنەماڵەو ئاجاری دەستنیشان کەردەن: "ئێمە مزانمێنە کە سەرۆک ئاپۆ هەرگیز چالاکی پی جۆرەش قبوڵ نییەن. بەڵام ئەگەر گەنجێ وێش سۆچنۆنە ئانە بە ماناو سەرکۆنەکەردەی بڕیارو دادگاو مافو مرۆڤین جە ئەوروپا و شەرمەزارکەردەی پیلانگێڵی میاندەوڵەتین کە جە دەستگیرکەردەی ڕێبەر ئاپۆی تا ئارۆچ بەردەۋامەن. دیارەن کاتێ کە ئەردۆغان لۋا ئەڵمانیا ئا چالاکییە ئەنجام دریا، یانی چالاکییەکە پەیامێ هاموەختەن پەی دادگاکەی، ئەوروپای، ئەڵمانیای و جیهانی. سەردای ئەردۆغانی و بڕیارەکەو دادگاکەی ماسکو ئەڵمانیاش هۆرماڵا و سەرداکەیچ خزمەت بە سەرمایەی جە ئەڵمانیای مەکەرۆنە.
جە کۆتاییەنە هامسەرۆکایەتیى کۆنسەو ڕاۋەبەری کۆما جڤاکێن کوردستانی (کەجەکە)، داۋا جە ئەڵمانیای و ئەوروپای مەکەرۆنە تا دەستبەردارێ هەڵۋێستەکانشان بانە و گۆش جە گەلو کوردی و گەلانو تورکیای ۋیژدانو وێشان بگێرانە. جەخت مەکرمێۋە کە کورد پەی بونیاتنیای ژیۋای دیموکراتیک وئازادی ڕێبەر ئاپۆی، جە دمایچ درێژە بە کۆشای ئازادی مڎۆنە و وەڵامش پەی دژبەرانیش ببۆنە.
