٥٠ کەسۍ تەرۍ بەزۊر جە گرێ‌سپی-ئەرەگیریانە ئەرەنیشتۍ کریۍ
دەوڵەتی ئەرەگیروو تورکی ٥٠ پەنابەرۍ سووریۍ کانتۊنوو گرێ‌سپی-نە ئەرەنیشتۍ کەرۊ، بەزۊر جە خاکوو تورکیایۊ ئەرەفاڕێنێشۊ.
سەرچەمێوە جە کانتۊنوو گرێ‌سپیی ئەرگیریایۊ واتش، دەسەڵاتوو تورکی ٥٠ پەنابەرۍ سووریێش دەروازەی سنووریی گرێ‌سپی-یوە فاڕێنێوە پەی کانتۊنوو گرێ‌سپیی ئەرەگیریای، گرڎشا سەر بە ناوچەکای تەروو سووریاینۍ، دلۍ "مەجلیسوو خۊجێی گرێ‌سپی"وە دێنێش دەسوو چەتەکاوە پەی ئەرەنیشتەکەرڎەیشا کانتۊنەکەنە.
ئەوەڵوو ئی مانگێوە دەسەڵاتوو دەوڵەتوو تورکی ٢٥٠ پەنابەرۍ سووریێش فاڕێنێوە پەی بۊ کانتۊنوو گرێ‌سپیی ئەرەگیریای، هاموەخت هەمان حاڵەت جە هەرێمە ئەرەگیریایەکای تەرووچێروو دەساو تورکینە "سەرێکانی و جەرابلوس و ئەعزاز و عەفرین" ملۊ ڕاوە، ژمارەو ئەرەنیشتەکریایا کانتۊنەکەی یاوان ٣٠٠ کەسۍ جە ئەرەنیشتاو "دەیرەزۊری و حەلەبی و حەمای و گوندەواروو دیمەشقی".
جووڵەکاو دەوڵەتوو تورکی ئینۍ چوارچوەو پرۊژەو وەشکەرڎەی کۊڵۊنینە، بە ئەرەنیشتەکەرڎەی پەنابەرە سوورییەکا جە هەرێمە ئەرەگیریایەکانە، جیای ئەرەنیشتە ڕەسەنەکا، کە بۊنەو ئەرەگێرتەی هەرێمەکەیشاوە لاو دەوڵەتوو تورکیوە ورئامێنۍ.
فرەو ئانیشا ئەرەفاڕیێنۍ پەی هەرێمە ئەرەگیرکریایەکا چا مەمەناوە، بۊنەو گرژیی ئەمنی و ڕەوشوو بژێوی نالەباری و تاوانەکاو ئەرەگیرە تورکا و چەتەکاوە.
ئەرەفاڕیێکۍ موازا ڕووە کەرا هەرێمەکاو ئیدارەو وێڕاوەبەریی سەرنیشت و وەرکەوتوو سووریای، سەرەڕاو تەرسەو وەرڎەمیشا.
بەپاو زانیارییەکا، هیزی ٣ هاموەڵاتۍ بە فیشەکوو چەتەکاو "ئەحرار شەرقیە"ی بریندارۍ بیۍ، نزیکوو دەگاو ئەعیوەینە جە کانتۊنوو گرێ‌سپییئەرەگیریایۊ، وەختوو هەوڵدایشا پەی ویەرڎەی بەرەو هەرێمەکاو ئیدارەو وێڕاوەبەری.
مەجلیسوو کانتۊنوو گرێ‌سپی جە ٢٦ حوزەیرانینە بە ئاژانسەکەیماش یاونا، ٢٥٦ خێزانۍ جە کانتۊنە ئەرەگیریاکەوە یاوێنۍ بە هەرێمەکاو ئیدارەو وێڕاوەبەری.
دەوڵەتوو تورکی جە ١٩ تشرینی یوەموو ٢٠١٩ کانتۊنوو گرێ‌سپیی ئەرەگیر کەرڎەن، دماو ئەرەگێرتەیش چەنی چند هەرێمێوە تەروو سەرنیشتوو سووریای پێسە "ئەدلب و ئەل باب و ئەعزاز و عەفرین"ی ماوەو چوار ساڵۍ قەیرانوو سووریاینە.
س.ز
