ڕاپیمای ئامەدی: پەی زوانی کوردیی ئەوەکۆشمێنە

بۆنۆ ٢١و شوباتی ڕۆو جەهانی زوانو ئەڏایی، جە ئامەدەنە ڕاپیمای ئەنجامدریا و داواو یاگێ ڕسمیۍ پەی زوانی کوردی کریا.

بە سەرمەشقایەتی گلێرگەو ئەوکۆڵیای کلتووری و زوانو میزۆپۆتامیای (مەد-دەر)، ئەنستیتۆو کوردو ئامەدی و  پارتو هەرێمە دیموکراتیکەکا (بەدەپە) ی بە مەڵامەتو ٢١و شوباتی ڕۆو جەهانی زوانو ئەڏایێ ڕاپیمێوەش ئەنجامدا. جە چالاکییەکەنە لافیتێ "یاگێ ڕەسمی پەی زوانو کوردی، پەروەردە بە زوانو کوردی" بەرزکریاوە. چنی بەردەوامی چالاکییەکەی بە بەردەوامی درووشمەکێ "زوانو کوردی شکۆمانە" و "بێ زوان ژیوای مەبۆنە" وچیاوە.

جە چالاکییەکەنە ئەرەیاویا بە هەردووی زاراوەو کورمانجی و زازاکی ونیاوە و ئاماژە کریا پانەی بە ئیسەیشۆ مەتاومێ زوانی کوردی پێسەو زوانو پەروەردەی بەکاربێبە و قەدەغەکریان. جەختکریانۆ چانەی ئی قەدغەکارییە تاوانێوەنە دژو مرۆڤایەتیی.

هەرپاسە دەستنیشان کریا زوانی کوردی یۆن جە زوانە کۆنەکا دلێ تاریخی، بییەن با پارێزەرو بییە و شناسنامەو کوردا. پۆکەی پەنەوازی بە ئەوەکۆشای وەرفراوان مکەرۆ پەی پەروەردە هورگێرتەی بە زوانو کوردی.

چالاکییەکە بە گێڵناو زەماوەنێ و هۆرپڕای کوردی دمایش ئاما.