ڕاپیمای ئازادیی حەوتەمین ڕۆشنە ڕواننە بەردەواما
ڕاپیمای پەی ئازادیی ڕابەروو گەلوو کوردی عەبدوڵا ئۆجالانی شاروو ڕوانی فەڕەنساینە ڕۆو حەوتەمینە بەردەوام بێ، هاموەڵاتێ دەربارەو گۆشەگیریی ئیمراڵی هاگادارێ کریێوە.
اپیمایی درێژی ٢٥ ڕۆیی پاریسۆ تا ستراسبۆرگ پەی ئازادیی جەسەیی ڕابەروو گەلوو کوردی عەبدوڵا ئۆجالانی، شاروو ڕوانوو فەڕەنساینە ڕۆو حەوتەمینە بەردەوام بێ.
چالاکییەکەنە، بەشداربیێ هەزاران وەڵاکریێوێشا سەروو گەلی و چینەکارە بەشێ کەردێ. هەرپاسە چند دۆسیێوێشا دەربارەو گۆشەگیریی ئیمراڵی دێ دەسوو ڕێکوزیا و ئەرەمەرزیا فەڕەنسییەکاوە.
کۆمەڵەو نوێنەروا ڕاپیمایەکەی ٢٥ کەسێنێ، چەنی هامڕایەکاشا بە درێژایی ڕاپیمایەکەی گۆرانیێشا چڕیێ و درووشمێشا پەی ئازادیی ڕابەروو گەلوو کوردی عەبدوڵا ئۆجالانی بەرزێ کەردێوە و زانیارییشا دەربارەو گۆشەگیریی ئیمراڵیی وەڵا کەردۆ.
هامسەرۆکوو جەدەکە-فە، شاهین پۆلات ئاماژەش پانەیە کەرد، کە دەوڵەتوو تورکی وەرنیشت و پانیشتوو کوردستانینە چەکی کیمیاوی و ئەتۆمی بەکار مارۆ، کەچی وەراوەروو گەریلاینە شکسش ئاردەن. گەرەکشانە هێزوو وێشا مەیدانی میاننەتەوەیینە بەکار بارا و ڕاو چاپەمەنییوە گەلی خەڵەتنا وەلێ مەتاوا.
ئا پۆستکارتێ کوێ کریێوە ڕوانەو دوورگەو ئیمراڵی کریێ، کە ڕابەروو گەلوو کوردی عەبدوڵا ئۆجالانش چەنە گۆشەگیر کریان.
دماتەر جە کۆمەڵەی گردینوو ڕوانینە گەل کوێ بیێ، گەلوو هەرێمەکەی بەدەمەوەئامای گەرمشا بێ.
دماو دەیەقێوە ڕێزگێرتەی پەی یادوو گەشمەرداو کوردستانی، پارێزنەر مەحمود شاکار واتش، دژوو گۆشەگیری گرد هەوڵێوە یاساییەشا گێرتێنەرە وەر، وەلێ ئی دۆخە تەنیا بە کۆشیای یاسایی چارەسەر مەبۆ، هاموەخت تیشکەش وستە سەروو سیاسەتوو دەوڵەتوو تورکی کوردستاننە.
