وێرەگاو ئارۆی ڕێستورانتێوە شاروو سلێمانیینە، ڕێکوزیاو پەیوەندییەکاو ژەناو کوردی (ڕێپاک)، وێرەگاڕێسەپسیۆنێوەش تایبەت بە ژەنا ڕێک وست، بە بەشداریی فرەو ژەنە چالاکا و خەباتکارا و ڕۆنامەوانا و ئەنداماو پارتەکاو ژەنا.  

وەختوو ئامای مێمانەکانە  لاو کۆمیتەو ئامادەکاریوە خێرامای کریێ و وەلەو نەرگسیشا پێسە مەبارەکبایی ڕۆو ژەنا پێشکەش کریا.

ئەوەڵوو مەراسیمەکەینە لاو کۆمیتەو ئامادەکارییڕێکوزیاو ڕێپاکیوە، بانگەوازێوە پێشکەش کریا لاو شیلان شاکرێوە، دلێنەو بانگەوازییەکەی باسوو ئامانجوو هەرمانەو ڕێکوزیاو ڕێپاکیش کەرد، بە مەبەستوو وەشکەردەی پەیوەندی  بەینوو ژەناو کوردینە دلێنە و ژەناو کوردی بە جیهانیوە هەرمانەکاو ئا ڕێکوزیایشە باس کەردێ، هەرپاسە شیلان شاکرە واتش: "ڕێکوستەی ئی مەراسیمە تایبەتەیە بە پۆرەوەلوای هەرمانێ و خەباتەکاو ژەنان ساڵێ وەڵینێنە، پێویسا دلێ ئا چوارچوەینە کە دەورە دریان بە سیستموو سەرمایەداری و هزروو پیاسالاری و کوردستانیش وستەن وەروو هەڕەشێ ئەرەگیریی تەری، پێویسا ئێمەی ژەنی برەو بە هەرمانە و چالاکییەکاما بدەیمێ و خەبات و کۆشیایما بەردەوامیی پەنە بدەیمێ و بە سیستم دژ پا عەقڵیەتەیە دژەژەنەیە مردمێوە، سەدەو ویس و یەکی ڕەنگمج کەرمێ به بییەی ژەنێ و ڕەنگوو ژەنێ."

دماتەر سینفزیۆنێوە بارەو هەرمانێ و خەبات و چالاکییەکاو ژەنا پێشکەش بە ئامادەبییا کریا. دلێنەو سینفزیۆنەکەی نیشانەدای چالاکی و ڕووبەڕووبییەیۆ و خەباتوو ژەنا بێ.  

دماو ئانەیە، پانێڵێوە پەی دووێ ژەنا بارەو هەرمانێ و چالاکییەکاو ساڵێ ویەردێوە و ئاستوو کوردستانینە و جیهاننە، هەرپاسە ورسەنگنای خەباتوو ژەنا پێشکەشوو ئامادەبیا کریا.

 پانێڵەو ئەوەڵینە  پارێزنەرە پەیمان عیززەدینە بارەو دۆخوو ژەنا و پاشێلکاری و ساختەکارییەکاو ئاماروو ئی  پاشێلکارییاوە قسێش کەردێ و واتش: "پاشێلکارییەکێ فرێنێ، بەڵام ئامارە ڕسمییەکێ گردوو ئی پاشێلکارییا بەرمەوزا و شێوناشا، ئینەیچ بە ئامانجوو برەودای پا سیستمە سەرمایەدارییەیە کە دەوروو گردوو جیهانی و پانیشتوو کوردستانیش دان، فرە زیاتەر چانەیە مشۆ سەروو دۆخوو ژەنێوە مردمێ، بەڵام مشۆم بەردەوامیی خەبات و چالاکیی ژەناما ویر نەشۆ."

لە پانێڵەو دووەمینە، دکتۆر ڕووخۆش غەریبە، دکتۆرا جە دەروونشناسیی پیشەیینە، وانایۆش پەی دۆخوو ژەنا کەرد  ئاستوو جیهانیینە و واتش: "تەنانەت گردوو وەڵاتاو جیهانینە کێشەو ژەنێ بازاڕەکانە و بواری سیاسی و بوارە حوکمییەکانە هەر بەردەوامەنە، هەڵای ژەنی قبوڵە نەکریێنە پێسە ئانەی پێویسا، جگە ئانەی کە هەوڵەکێشا فرە زیاتەرێنێ و توانا و چەنەئامایشا فرێنە، بەڵام بە بۆنەو هزروو پیاسالارییوە هەڵای قبووڵ نەکریان بە ڕێژەی پێویس و هەل و دەرفەتەکێ پەی ئادیشا کەمتەرێنێ."

دماتەر ڕۆزا ستارە، ئەندامەو کۆنگرەو ستاری خەڵاتش پێشکەشوو خاتو شیلان شاکرێ، ئەندامەو ڕێکوزیاو ڕێپاکی کەرد، وەراوەروو هەوڵ و مانیاییەکاشنە.

ئاخروو مەراسیمەکەینە،د لاو هونەرمەندەو وەرکەوتوو کوردستانی رمێسکێوە بە هامکاریی گرووپوو موزیکی، گورانیێ و ئاوازێ پێشکەشێ ئامادەبییا کریێ.

ئاخروو وێرەگاکەینە واردە پێشکەش بە ئامادەبیا کریا و دمایی بە مەراسیمەکەی ئاما.