ئەرەنیشتێ دەگاو هەجەمەنەی سەر بە ناوچەو سەڵواواو هەوراماناتی، جە دمای ئانەی جە کاربەدەستێ دەوڵەتی نائۆێدێ بیێ، وێشان بە ژنی و پیێوە و ئەواوەجەمیانە و بە (گەل) هۆرئێستێ بە خزمەتکردو دەگایەکێشان و جە ئا چوارچێوەنە سەرجەم کوجیێ و کۆڵانێ دەگایەکێشان سەنگ فەرشێ کەردێ.
دەگاو هەجەمەنەی یان ئەنجومەنەی مەگنۆن چوارچێوەو ئیدارەو دەگاداری (کۆساڵان)ی سەر بە ناوچەو سەڵواواو هەوراماناتی جە دیمو وەرکەوتو کوردستانی.
هەجەمەنە نزیک بە ٤٠٠ خانەوادێنە و نزیک بە ٢ هەزارێ ئەرەنیشتێش هەنێ.

جە هەورامانە هەرمانکەردەی بە گەل (گەلکاری، هەرەوەزی، ئەواوەجەمی) فەرهەنگێوی دێرینەن و جە ویەردەنە، "وەزتەکنای، کزی و بارەکڵە، تفی چنیەی، لۆکەنەی، کێڵ نیای، جۆماڵ، یانە و ڕا دروستکەردەی" و فرە کار و هەرمانتەرێ بە گەل ئەنجامێ دریێنێ. ئا فەرهەنگە هەر چەنڎە لاوازیچ بییەن، بەڵام تا بە ئارۆ جە فرە یاگۍ هەورامانیەنە مەندەن و بەردەوامەن.