بانگەوازی هامبەشوو کۊداری و پەژاکی بارەو پەیمانەو جینۊسایدکارانۍ لۊزانی و خوڵکەو ئازاڎیوازاوە پەی بەشڎاری جە ڕاپیمای ٢٢ تەمووزۍ پێسنەن:

دماییئارڎەی بە لۊزانی جە ڕاو کۊشیای و ئازاڎیی گەلاوە دەسەبەر بۊ

بەستەی پەیمانەو لۊزانی جە  ٢ تەمووزوو ١٩٢٣ بی بە مایۍ بەکۊڵۊنیبییەی کوردستانی و بەشبییەی نیشتمانی تاریخیی گەلوو کوردی بەینوو دەوڵەتە ئەرەگیرەکانە. جە ئاخیروو سەد ساڵەو ئا پەیماننامە کۊکوشکارانێنە، بەتندی شەرمەزارەش کەرمۍ و بەتندی دژشنە درێژە بە کۊشیای مدەیمۍ. ئامادەبییەی مەیدانەکانە پەی بەرزئرمانای یادوو سەرجەم گەشمەرڎاو ئەرەپرایە ئازاڎیوازەکاو گەلوو کوردی، هەرمانێوە تاریخییەنە.

پەیمانەو لۊزانی پێسە پەیمانێوە میاننەتەوەیۍ بەینوو دەوڵەتە زلهێز و فاشیستەکاو جیهانی و هەرێمایەتینە، وڵاتەکەما کوردستان، کە نیشتمانوو گەلوو کوردی و گەلە دۊسامانە، پارچەپارچەشا کەرد. ئی پەیماننامە بە ئامانجوو جینۊسایدی و کۊکوشی وەرفراوانی جە کۊکوشییەکاو "ئامەد، زیلانۍ و کۊچگری و دێرسیم"ی جە  سەرنیشتوو کوردستانیوە تا ئەنفاڵ و هەڵەبجە پانیشتوو کوردستانی و هەرپاسە هجوومۍ پەی سەروو کۊماروو کوردستانی و کۊکوشیی لۊرستانی، هەرپاسە داگیرکەرڎەی و کۊکوشی جە عەفرین و سەرێکانینە وەرنیشتنە،  دژوو گەلەکەیمانە ئیمزا کریان و بە درێژایی ١٠٠ ساڵا زنجیرێوە جە کۊکوشییاش شۊنەو وێشرە ئارڎێنۍ. 

ڕابەر ئاپۊیچ وەراوەروو ئی پەیمانێنە و هامشێوەکانە بە بیرڎۊزوو "کوردستان ئەرەگیرکریان و کۊلۊنیین" شکۊمەندانەتەرین شۊڕشی ئازاڎیوازانەو گەلەکەیما و گەلە چەوسیاوەاش دەس پەنە کەرد و بە گیانبازیێوە بێوچان جە  بەدیئارڎەی ئازاڎی و دیموکراسی و دماییئارڎەینە بە لۊزانە ستەمکارانەکا، کۊشیا. ئارۊنە ڕابەر ئاپۊ بۊنەو پیلانگێڵنای ئەنجامدەراو لۊزانیوە جە زیندانوو ئیمراڵینە گیریان. هێزی ئازاڎیوازوو ژەنا سەروو بنەماو ئەندێشەی باڵاو "ژەنی، ژیوای، ئازاڎی" و سەروو ڕێبازوو ڕابەر ئاپۊی و گەلەکەیما، بنچینەییتەرین هێزوو کۊشیای جە  کوردستاننە و مەنتێقەکەنە و ڕێنیسانس و ڕۊشنگەریی ئازاڎی خوڵقنۊ.

کۊشیای ژەنا گەلەکەیما زیاتەر جە گرد وەختێوە جە  ئازاڎییوە نزیکتەر کەرۊوە و دمایی بە کۊکوشی و جینۊسایدەکا مارۊ.

ئەرەگیرکاری و پلانەکاو ئێران، تورکیا، عێراق و سووریای بە ئاڕاستەو ئارڎەیدی و بەئەنجامیاونای جینۊسایدی بە پاو ئانەیە ئەوەی جە پەیماننامەو لۊزانینە وازیۍ، سایۍ کۊشیای و مدرامانی گیانبازانەو گەلەکەیمانە و فیداکاری ڕۊڵە کۊشەرەکانە تا ئیساتۍ ڕووبەڕووۍ گەورەتەرین لەمپەری و ئاستەنگا بییەنۊ.

بێگومان تاکە ڕاو دماییئارڎەی بە پەیماننامەی شووم و نەگریسوو لۊزانی و جینۊسایدەکا، کۊشیای یۊگێرتانەو گەلەکەیمانە مەیدان و بوارە کرڎارییەکانە. گرتەیرەوەروو هەڵوێستی نەتەوەیی دیموکراتیکی بە پەشتیبەستەی بە ئیرادەو خودوو گەلەکەیمان و ئارڎەیدیی یۊبییەی گردوو بوارەکاو کۊشیای، هەرمانێوە تاریخییە، سیاسییە، ڕۊشنگەرانۍ و ئەخلاقی-دیموکراتیکەنە. نەفەسدرێژی و دانوێرەگێرتەی و کۊشیای و وێگێریی گەلەکەیما جە  سەد ساڵی ویەرڎەنە جە ڕاو ئامادەبییەی و بەشڎاری جە گردوو مەیدانەکانە و بەستێنەکانە، ئازاڎیی گەلەکەیماش گەرەنتی کەرڎەن.

پارتوو ژیوای ئازاڎوو کوردستانی (پەژاک) و گلێرگەی دیموکراتیک و ئازاڎیی وەرکەوتوو کوردستانی (کۊدار) جگە جە شەرمەزارکەرڎەی پەیمانۍ کۊکوشکارانۍ سەد ساڵۍ لۊزانی، داوا جە گردوو ئازاڎیوازا و دیموکراسیوازاو گەلەکەیما و گەلە چەوسیاوا، بەتایبەتی ئەرەنیشتاو تاراوگەی کەرۊ، کە جە سەدەمین ساڵەو دماییئارڎەی لۊزانینە ئەرەپڕا و جە دژوو دروستبییەی لۊزانۍ تازێنە مرڎاوە و ڕاش وەنە گێرا. بەتایبەتی بەشڎاری و ئامادەیی گەلەکەیمان ئەورووپانە جە ڕاپیمای گەورەو ڕۊو ٢٢ تەمووزوو ٢٠٢٣ جە شاروو لۊزانینە، هەرمانێوەنە پەی یۊگێرتەیی و ئازاڎی. پەوکای سەرجەم کۊمەڵاو گەلەکەیما جە سەرتاسەروو ئەورووپاینە خوڵکە کەرمۍ کە بەشڎاری چی ڕاپیمایە گەورەیەنە کەرا و دەنگی مافدارانەو وێشا بدا گۊشاو دنیێرە. ئینە هەلا و فرسەتێوە گەورەن پەی پتەوکەرڎەی ڕیزەکا و یۊگێرتەیی گەلەکەیما، حزبەکا و ڕێکوزیا جیاوازەکایچ. بەشڎاریی شکۊمەندانەو گەلەکەیمان سەرجەموو پیلان و سیناریۊکاو دوژمنا بە ئاڕاستەو لۊزانێوە تازێنە پووچەڵ کەرۊوە. گیانبازیی گەلەکەیما مایۍ سەرکەوتەینە، هەر بژیوۊ یۊبییەی و یۊگێرتەی گەلەکەیما.

س.ز