هامسەرۊکوو کۊنسەو ڕاوەبەریی کەجەکەی جەمیل بایک بەشدارییش بەرنامۍ تایبەتنە کەرد، کە ستێرک تیڤی-ینە وەڵا کریاوە، کە هەرمانە و بەرنامەکێش ورۍ سەنگنۍ.

جەمیل بایک هامسەرۊکوو کۊنسەو ڕاوەبەریی کەجەکەی سەرنجەش پەی قسەوباسەکا دەستووروو تورکیای کێشتە و واتش، کە ئاکەپە – مەهەپە گەرەکشا بە دەستوورێوە فاشیستی هەناسێوە پەی گلێرگەی نازاوە.

بایک واتش، کە گۊشەگیری و ئەشکەنجەدای ڕابەروو گەلوو کوردی عەبدوڵڵا ئۊجالانی جیهاننە وێنەش نییا و واتش:"ئا سیاسەتە دژوو ڕابەر ئاپۊی بەراش ڕاوە، دژوو گەلوو کوردیچ و ئینسانی دیموکرات، سۊسیالیست و ئازاڎیوازوو تورکیایچ ئی سیاسەتەیە بەرا ڕاوە. بە مانێوە تەرە پی سیاسەتەیە تەماموو گلێرگەو تورکیایشا گۊشەگیر کەرڎەن."

بایک باسوو کێشایۊ گەریلاکاش مەخموورنە و بییەی پەدەکەی چاگنەن واتش، کە پەدەکە چەنی دەوڵەتوو تورکی لوان مەخموور. بایک ئەرەیاوناش، مەبۊ گەلوو مەخمووری ڕا پی هەرمانۍ بدا و مشۊم وێشا پارێزنا.

هامسەرۊکوو کۊنسەو ڕاوەبەری کەجەکەی جەمیل بایک لە چەمپەنەکەوتنەکەیشنە چەنی ستێرک تیڤی وەڵا کریاوە، ئینێش ورسەنگنێ:

چەنی ئانەیە کە ئیمرالینە سیستموو گۊشەگیری و قڕکەرڎەی بەرڎەواما، وەلۍ گرڎ یاگێوەنە کاریگەریی ڕابەر ئاپۊی گرڎوو دنیێرە وەڵا بۊوە. بە نامۍ ڕابەر ئاپۊیۊ گرڎوو دنیێنە ئەرەیاونای کریان و هەڵمەتێوە دەسش پەنە کەردن، دۊستاو گەلوو کوردی سەرمەشقێشنۍ. وەڵتەر هەڵمەتەکێتا ورسەنگنێبۍ، شمە پێسە ڕێکوستەی ئازاڎیی کوردستانی دماو مانگێوە هەڵمەتەکۍ چەنی ورسەنگندۍ و چێولای مشۊم چێش کریۊ؟

وەڵۍ جاوبدایوە پەرسەکێتانە، چی مانگێنە گەشمەرڎۍ فرێما دێنۍ، جە کەسایەتیی ئا گەشمەرڎانە گرڎوو گەشمەرڎاو ئازاڎی و دیموکراسی یاد کەرووە و ڕێز و حورمەتوو وێمشا پێشکەش کەروو. مزانیۊ جە مانگەو تشرینوو یوەمینە یوسف گولۊ وەڵاتپارێزنێوە گەورە بۍ، کە دەوڵەتوو تورکی چەنی نەوەکەیش قامیشلۊنە کوشتێش. 10وو تشرینوو دووەمینە هامڕا یڵماز دێرسیم فەرماندەو هەپەگەی جەنگنە گەشمەرڎە بی، واوەی ساڵەو 1999 جە پاسورنە 18 هامڕۍ بە چەکی کیمیاوی گەشمەرڎۍ کریۍ. دیسان یاسر عەرەفات ساڵەو 2014 گەشمەرڎە بی، هامڕا دەلال 2017 ئامەدنە بەستانە چنی چند هامڕێوە گەشمەرڎۍ بیۍ. هامڕا ئەدیپ سۊڵماز جە 1979 وەختۍ سەرۊکوو شارەوانوو ئێلحی بۍ کوشیا. ساڵەو ١٩٦٠ینە سینەماو عامودێنە 283 گەنجۍ کورڎۍ کوشیۍ. دیسان سەید ڕەزا ساڵەو 1937 خارپێتێنە گیریا و قەنارە دریا. هاموەخت کوڕەکەش و هامڕێکێش قنارە دریۍ. هونەرمەندی گەورە ئەحمەد کایا ساڵەو 2000 پاریسنە گەشمەرڎە بی. هامڕا دۊغان دێریک ساڵەو 2017 جە ئامەدنە گەشمەرڎە کریا، هامڕا حوسێن ئۊزبەی هامڕا هارون بەینوو ئامەدی و گارزانینە گەشمەرڎۍ کریۍ. هامڕا ڕەشید سەرڎار ساڵەو 2012 هەرێموو شەمزینانینە گەشمەرڎە بی، فەرماندەی گەورەو هەپەگەی بۍ وەلۍ تەنیا ئی گەشمەرڎۍ نییەنۍ، جگە ئینیشایچ هامڕۍ گەشمەرڎۍ فڕی هەنۍ. پێسە واتم جە کەسایەتییشانە گرڎی بەپەنەزانایوە یادۍ کەرووە.

پێویسا گرڎ کەسێوە بەشداروو هەڵمەتەکۍ بۊ

ڕاسا هەڵمەتێوە گەورۍ دەسش پەنە کەرڎەن، دۊسۍ دەسشا پی هەڵمەتۍ کەرڎەن، مانگێوە ویەرڎەن. بڕۍ ئەنجامۍ دەسۍ کەوتێنۍ گێرا زیادتەرێچ با، چەنی ویەرڎەی بەشداریکەرڎەیەکێچ گەورۍ با. پی بۊنەوە سڵام و مەبارەکبایی وەنەو گرڎوو ئا کەسا کەروو کە سەرمەشقۍ هەڵمەتەکێنۍ، ئانۍ بەشدارییشا چی هەڵمەتێنە کەرد و ئانێچ هەرمانەشا پەی کەرڎەن.

ڕاسیینە هەڵمەتەکۍ کە هەنە هەڵمەتێوە گەورێنە. وەلۍ هەڵای ئینا ئەوەڵنە. پێویسا ئی هەڵمەتۍ جە فرەو ڕوواوە قەوەتە کریۊ و وزیۊ وەڵۍ. ڕاسا دۊسۍ دەسشا پی هەڵمەتۍ کەرڎەن، وەلۍ جمیەرەکەما دلێشەنە بەشدارا. ئینە پا مانۍ نا کە ئێمە تەنیا ئینایمۍ هەڵمەتەکێنە. بەڵکوم بە گرڎوو تواناکاوە ئی هەڵمەتۍ بە ئامانجەکەیش بیاونمۍ و سەرەش وزمۍ. هەرمانێوە تارێخییەنە پەی گرڎوو کادرەکاو ئی جمیەری و گرڎ کورڎێوە بەشەرەفی. بێگومان تەنیا هەرمانەو دۊساو گەلوو کوردی نییەنە، بەڵکوم ئانۍ جیهاننە پەی ئازاڎی و دیموکراسیی کۊشیا، ویژدانی ئەخلاقییشا هەن، ساعیبۍ ویرۊکەینۍ، مشۊم بەشدارۍ ئی هەڵمەتۍ با. چی؟ چونکوم ئینە هەڵمەتەو ئازاڎیینە. ئانۍ گەرەکشانە ئازاڎی دلۍ وێشانە وزا وەڵۍ، ئانۍ گەرەکشانە کۊشیای پەی ئازاڎی پەرە پەنە بدا، پێویسا هەڵمەتەکێنە با.

دەوڵەتوو تورکی گرڎوو گلێرگەیش گۊشەگیر کەرڎەن

 ئیسەنە سیاسەتێوە سەروو ڕابەر ئاپۊی هەن، هیچ نموونێوەش جیهانەنە نیا، سیاسەتێوە فرە گڵیاو و پیسا.  ئێمە باسوو گۊشەگیریی ڕەهای و هیچ زانیاریێوە سەروو ڕابەر ئاپۊی پەی ماوەو ٣ ساڵا کەرمۍ. بۍ ڕابەر ئاپۊی کەس مەزانۊ سیاوۍ چێشا.  سیاسەتێوە  سەروو ڕابەر ئاپۊی بەرا ڕاوە، بە ماناێوە تەرە، گرڎوو گلێرگەو تورکیایشا وستەن چێروو گۊشەگیرییوە. سیاسەتێوە چانەشا سەرۊ کەرڎەن. کەسانێوە ساعیب ویژدانۍ، ئەخلاق و ویرۊکێنۍ، کۊشیا پەی بۊ ئازادی و دیموکراسی و هەڵمەتەکێنە بەشدارێنۍ، یانۍ دژوو گۊشەگیری مرڎێنۍ. جە کەسایەتیی ڕابەر ئاپۊینە، هاگادارییشا جە گەلوو کورڎی کەرڎەن. وەختۍ جە گۊشەگیری یاوایمێنە، ئا وەخت متاومۍ کۊشیەیمۍ دژش، ئەگەر ئینسان نەیاوۊنە چانەیە ڕابەر ئاپۊ چی گۊشەگیر کریان؟جە کەسایەتیی ڕابەر ئاپۊینە دیموکرات، سۊسیالیست، تورک گەلوو کورڎی گەشەشا پەنە دریان؟ سەبەب هەن پەی ئانەیە، چونکوم ڕابەر ئاپۊ کۊشیای ئازدیینە قووڵبیەیێوەش دلۍ وێشەنە وستەن وەڵۍ، گرڎ یاگێوەنە پەرش پەنە دان. دیسانۊ دلۍ جمیەری سۊسیالیستی و دیموکراسیینە چەقبەستەێوە وەش بییەبۍ، ڕابەر ئاپۊ گەرەکش بێئینەیە چارە کەرۊ و کۊشیا. پەوکای جمیەرووو پەکەکەی وەختۍ ئەرەمەرزیا، بڕۍ کاریگەریی سۊسیالیزمی ڕئالیش سەرۊ بۍ. بەتایبەت کاریگەرییش سەروو جمیەری و کرڎەوەکاش بۍ. ڕابەر ئاپۊ گەرەکش بۍ ئی کاریگەرییە نازۊ، یانۍ گەرەکش بۍ جە جمیەروو پەکەکەینە تازەبییەیوە کەرۊ.  ئانۍ کە سەرمەشقۍ سەرمایەداری بێنۍ یاوێنە، دیشا کە ڕابەر ئاپۊ پەی جمیەری دیمکراسی و هەم پەی ئازادی و پەکەکەی هەم پەی سۊسیالیزمی ئینا گێڵاینە. چینەیچەنە هەنگامۍ بەرەو وەڵۍ منیۊ، ئگەر ڕاش وەن نەگێرا قۊرتۍ پەی سیستمی وەش کەرۊ. پەوکای قەرارشا دا پیلانگێڵنیی میاننەتەوەی وەش کەرانۍ، چێوە ڕابەر ئاپۊشا گێرت و ئارذ وستشا ئیمراڵی، تا تەرسی سەروو سیستەمی سەرمایەداریوە وەشە نەبۊ وە وەربەسشا نەبۊ تا بتاوا سیستموو وەرکەوتوو دلیڕاسەی بپارێزنا، چونکوم دیشا ئەگەر ڕاکارۍ وەراوەروو ئاپۊیۊ نەگێرارە وەر، ڕابەر ئاپۊ کێشەی گەورەشا پەی وەش کەرۊ. سەیستم وەرڎەمشانە بلۊک کریۊ. وەلۍ فاریای جە وەرکەوتوو دلێڕاسەینە ڕووە مدۊ، جمیەرەکاو ئازادی و دیموکراسی گەشە کەرانۍ. سیستموو مۊدێڕنیتەی سەرمایەداری کە  سەرمەشقا و هەم دەسەڵاتی لۊژیکییچ، تەنانەت دلۍ کورڎانە ئانۍ کە سیستمنە دەسەڵاتدارێنۍ، گرڎ پێوەرە ئینەشا وەش کەرڎ. ڕابەر ئاپۊ گیریا و  سەرەرە سەپنا، چونکوم ئامانجش بۍ و خەریکوو گێڵای بۍ شۊنە و ئامانجەکەیشرە.

ڕابەر ئاپۊ چی هەلومەرجەو ئیمڕالینە درێژە بە کۊشیای و ئامانجەکاش دا و دژ بە سەرمایەداری پەرەش دا پەنە. پارادایمێوە تازەش پەی جمیەری سۊسیالیستی، دیموکراسی، ئازادی و پەکەکەی پێشکەش کەرڎ و بە ئینسانیەتیش بەخشا. ئینسانیەتش یاونا ئاستێوە بەرزتەر. بە مانێوە تەرە ئانۍ ئیمرالۍ ناستشا ڕابەر ئاپۊ کەرۊشا، ئانێنی ئامانجشا دیموکراسی و ئازادیین جیهاننە، ئانۍ کە پەی سۊسیالیزمی کۊشیا خاس خاسۍ جە ڕاسییەکاو ڕابەر ئاپۊی یاوێنێنە. ئا پارادایمەشا دیۊ و دڵنیۍ بیێوە کە چارەسەر بەخشۊ. یانۍ ئادیچ خەریکۍ گێڵای بێنۍ، جوابەکە ئینا پارادایموو ڕابەر ئاپۊینە. پەی ئانەیچە  گرنگی بە پارادایموو ڕابەر ئاپۊی و کەسایەتیی ڕابەر ئاپۊی  دریا.

پەوکای هاگادارییشا جە ڕابەر ئاپۊی و پارادایمەکەیش کەرڎ. ئیساتۍ مشۊم ئینەیە  قووڵتەر و فراوانتەریی زیاتەر کەرمۍ کە گرڎ ئازادیوازۍ، دیموکراسی و سۊسیالیزمی بەرا وەڵیوە. پە ئا ژەنا کە ئازادیی ژەنا و ئیکۊلۊژی وزا وەڵۍ. گەنجۍ و ئانۍ دژوو فاشیزمینۍ جەنگ کەرا.  

ئانۍ کە گەرەکشانە برایەتی گەلا گەشە کەرۊ. پێویسا گرشا چۍ هەڵمەتێنە بەشدارۍ با، تا ئی هەڵمەتۍ سەرگنۊ مشۊم گرڎما کۊشیەیمۍ  و فشار وزمۍ سەروو حکومەتوو وەڵاتەکا، سەروو یۊبییەی ئەورووپای نەتەوە یۊگێرتەکا، سی پی تی و ئەنجوومەنوو ئەوروپای، ڕێکوزیا میاندەوڵەتییەکا تا بتاوا پاسە مامەلە کەرانۍ فشار وزا سەروو دەوڵەتوو تورکی، کە ئەر پێسە نەبۊ هەرگیز هەنگامێوە پەی ئازادی رابەر ئاپۊی و چارەسەروو پەرسەو کورڎی مەنیۊ.  چونکوم ئامانجشا ناستەی جمیری کورڎیین و دژوو کورڎی قڕکەرڎەیشا وستەن دلۍ هەرمانێشاوە، ئادۍ دەسشا دان ئی ئامانجەیشا هەرگیز پەی کورڎی و ڕابەر ئاپۊی دەسش چەنە ورمەگێرانۍ مەگەر فشارۍ گەوەرەشا سەرۊ بۊ، ئیساتێنە پەی گرڎیما چەنیبەەەی ئا فشارەینە گرڎوو ئا جالاکییا کە کریا پێویسا سەروو بنەماو ئینەیە با و پێسە ئەنجام دەس گنۊ.

وێبەساعیبزانای جە ڕابەر ئاپۊی، وێبەساعیبزاناین جە گەلوو فەڵەستینی

وەختۍ ئی هەڵمەتۍ کەوتە ڕا، جەنگوو ئیسرائیل و حەماسی زیاتەر بی و جەنگێوە گەورە قۊمیا، هەم هەڵمەتەکۍ و هەم هامکاریی گەلوو فەلەستینی مشۊم بەرڎەوام بۊ، چونکوم گەلوو کورڎی و فەلەستینی پێسەنۍ یۊی، وەرکەوتوو دلێڕاسەینە هەم گەلۍ بنەڕەتیێنۍ و هەم گەلۍ بندەسێچ. سیاسەتوو قڕکەرڎەی سەروو ئی دووە گەلاوە هەن، ئی دووە گەلۍ ساڵانێوەن دژوو سیاسەتوو قڕکەرڎەی کۊشیا، وێبەساعیبزانای جە ڕابەر ئاپۊی، وێبەساعیبزاناین جە گەلوو فەڵەستینی. چونکوم ڕابەر ئاپۊ پوەیوەندیێوە قەوەتش چەنی گەلوو فەلەستینی هەن.ماوێوە چەنی جمیەری فەلەستینی بۍ، ڕەفاقەتێوە قەوەتشا هەن و جمیەرەکەیچما هەمان چێو، چونکوم هەرڎویما دژوو سیایسەتوو قڕکەرڎەی کۊشیێنمۍ و گژییێنمۍ  و گەشمەرڎێما پەی دێنۍ و پەیوەندیما چەنیشا چاگەوە نیا کە بڕۍ ماچا، گەلوو فەلەستینی ڕاس ماچۊ و ئینا سەروو حەقیوە، ئێمە پێوە خەباتما کەرڎەن و گەشمەرڎێما دێنۍ و زیندانیۍ و گیریما بیێنۍ چیوە پەیوەندییما قەوەتا.  

ئامانجوو ڕابەر ئاپۊی دیموکراسی و ئازادیین وەرکەتوو دلێڕاسەینە ئانێچ پێویسییشا پینەینە کورڎۍ و فەلەستینیێنۍ. ڕەنگا گەلاو مەنتێقەکەی ئامانجۍ و عارەزووۍ وێشا باشا وەلۍ  سیاسەتوو قڕکەرڎەی دژوو گەلوو کورڎی و فەلەستینی هەن. یانۍ کێشەکاو ئادیشا جە هینۍ گەلای تەری فرە جیاوازتەرێنۍ. گەییەیشا نەبۊ وەلۍ کورڎ و فەڵەستینیۍ نا.  پەوکای ئامانجوو ڕابەر ئاپۊی ئازادی و دیموکراسیین، سەرنجەش سەروو هەرڎووە جمیەرەکاو  کورڎی و فەلەستینیوە بۍ. یانۍ کە چەنی ئی قۊرتۍ حەل کریا و ئی گەلۍ جە قڕکەرڎەی دوورۍ گناوە و مافوو وێشا دەس وزا؟ بە شناسنامە و بەها و ئازادیی وێشاوە بژیوا.  

پەی ئینەیە ساڵانۍ کۊشیا، کێشەی کورڎ و کێشەکاو فەڵەستین و ئیسرائیلی تەنیا بە واڵەوبراڵەیی گەلا چارەسەر کریۊ.  بە فیکری ئایینی و نەژادپەرسی و دەوڵەتی چارەسەرۍ مەبا. هەرکەس گەرەکش بۊ پێسە حەل بوێزۊوە ئانە، کۊکوشی و قڕکەرڎەیەکاو ئیساتۍ قووڵتەرۍ کەرۊوە. ئەر گەرەکتانە قڕکەرڎەی نازدۍ ئانە بە  سیاسەتوو نەتەوەی دیموکراتیکی چارەسەر بۊ. ڕابەر ئاپۊ چارەسەرش جە نەتەوەی دیموکراتیکنە وێستۊ، پاسە کۊشیایش وەڵۍ وست. ئیساتۍ ئی قۊرتۍ پێسە حەلۍ کریا. چی ئینەیە ماچوو؟ ئاخر ئیسە بڕۍ گەرەکشانە کێشەکە بە دین و نەژادپەرسی و نەتەوەپەرسی چارەسەر کریۊ. کە مەکریۊ و قووڵتەرش کەرۊوە و گێرا قڕکەرڎەیچ بارۊ وەرۊ، پەوکای تەنیا چارەسەر پێسە واتم نەتەوەی دیموکراتیکا. هەم گەلوو فەلەستینی و هەم گەلوو جوولەکەی مشۊم پێوەرە کۊشیا تا چارەسەر بۊ.

بێجگە جە ئەرەیاونای و داواکەرڎەی، کۊشیاێوە زەروورا  

پەی ئی هەڵمەتۍ کە دەسش پەنە کەرڎەن، ئەرەتاونای دریا و دواوا کریا، ئینە خاسا. وەلۍ مشۊم قەوەتتەر کریۊ و کۊشیایچ زیاد کریۊ، مشۊم خەڵک وێشا ڕێک وزا و داوا کەرا گرڎ کەس بەشدار بۊ و ئی هەڵمەتۍ بەرەو وەڵۍ بەرا، ئەگەر هەڵمەتەکۍ سەر گێرۊ دیموکراتیزەکەرڎەی تورکیانە گنۊ وەڵۍ، کێشەو کورڎی چارەسەر بۊ.  کێشەو عەلەوییچ چارەسەر بۊ. هەرپاسە پەرە بە دیموکراسی مدۊ وەرکەوتوو دلیڕاسەینە، ئامانجوو هەڵمەتەکۍ ئازادیی جەستەیی ڕابەر ئاپۊی و چارەسەروو کێشەو کورڎین. ئەگەر ئینە ڕووە بدۊ ژیواێوە ئازاد وەش بۊ، ئی هەڵمەتۍ هەڵمەتێوە فرە گەورێنە.

باستا جە دەوررو سەرمەشقوو گەنجا کەرڎ. بە سەرمەشقایەتیی کۊمەڵۍ  گەنجاو کورڎی جە ٦٠ وەڵاتاو دنیێنە، ٣٥٠ گەنجۍ کوۍ بیێوە، یەکەمین کۊنفرانسوو گەنجانو جیهانیشا بەست، بڕوام هەنە هاگادارۍ بێندۍ. کۊبییەیوە و بەشداری و نرخنای ئا گەنجا چەنی ورسەنگندێ؟  

چارەسەروو قۊرتەکاو دنیۍ ئینۍ پارادایموو ڕابەر ئاپۊینە

سڵم و ڕیزوو ویم بەر وزوو پەی گرڎوو ئانیشا کە کۊنفراسەکەشا ڕێک وست و سەرمەشقۍ بیۍ و مانیۍ و بەشدارییشا کەرڎ، ڕاسیینە گەنجۍ پاریسنە پەرەشا بە هەرمانێوە گرنگۍ دا، هاگاداریشا کەرڎ جە تارێخ، ڕاو وێشا و هەستوو وێشا. ساڵەو ١٩٦٨ گەنجۍ فەڕەنسانە جووڵیایوێوەشا ڕێک وست کە جمیەرەکە دنیانە وەڵا بیۊ و حەر زوو تەشەنەش سانا و کاریگەرییێوە گەورەش وەش کەرڎ، کاریگەرییش سەروو دەوڵەتا و جڤاکەکاوە نیارە. دیسان گەنجۍ کۊنفرانسێوەشا ساز کرڎ. کۊنفرانسەناییشا وست سەروو قۊرتەکاو گەنجا ئیسەنە ، یانۍ قۊرتەکێشا چێشێنۍ و چەنی حەلۍ کریا. ئینجا چێگە گێڵای و ورڎۊبییێشا هەن. دیشا جوابەکە ئینا لاو ڕابەر ئاپۊیۊ، پارادیموو ڕابەر ئاپۊی جوابەکەن. چا کۊنفرساەنە ئازادیی ڕابەر ئاپۊی و پارادایموو ڕابەر ئاپۊی بە بناغە گیریا. جمیەروو گەنجاو ساڵەو ١٩٦٨ چە هەلومەرجێوەنە پەرەش سانا؟ مۊدێرنیتەی سەرمایەداری ملەملۍ پەی ئینسانیەتی وەش کەرا و چارەسەر چێنەینە مەوێزیۊوە، ئا وخت چارەسەرشا سۊسیالیزمنە وێستۊ، وەلۍ پەیشا بەرکەوت ئینەیچ جواب نیا. چی گێڵاینە جمیەرێوە دەسش پەنە کەرڎ، جمیەری شۊڕشگێڵنانە ئینە چێش بێ؟ بە ماناێوە تەرە چارەسەریوە پەی جمیەری ئازادیوازی و دیموکراسی و سۊسیالیستیەکا وەڵۍ وزیا. ئینەیچە کاریگەریێوە  گەورەش وەش کەرڎ و  زوو گرڎ یاگێرە وەڵا بیۊ. ئانۍ ئامانجشا دیموکراسی و سۊسیالیزم و ئازادیی بۍ، وەڵۍ کەوتۍ. ئی جمیەرە ڕۊشنویری وزۍ وەڵۍ،  ڕۊشنایی بە گرڎ لێوە بەخشۍ. وەختۍ ئینسانەکۍ سەرنجە مدا، چا قۊناغەنە ئا جمیەرە کە پنەش وچیۊ فێمینیزم دلۍ جمیەرەژاو ژەنایچەنە پەرەش سانا، ئینەیچە هەنگامێوە بۍ پەی وەڵۍ. واوەی جمیەرە ئیکۊلۊژی و سروشتییەکۍ پەرەشا سانا. چا سەرڎەمەنە گەنجۍ ڕاشا وەرڎەموو پەرەسانای ئی جمیەرینە کەرڎۊ، دەورۍ گەورەشا بۍ، ئی سەرڎەمە کە چەنەش مژیومۍ تا ڕاددێوە هامشێوەو ئا سەرڎەمەینە. گێرا بەتەمامی پێسەو یۊی نەبا وەلۍ نزیکێنی. واوەی سیستموو مۊدێرنیتەی سەرمایەداری قۊرتێوە گەورەن پەی ئینسانیەتی و تا مۍ کێشاویتەر بۊ.  

وەختۍ ئینسان تەماشەو شۊڕشەکا کەرۊ، مزانۊ ئانۍ کە پەرەشا بە شۊڕشەکا دان و بەشدارییشا چەنە کەرڎەن،  هەر گەنجێنۍ. ئیساتێچ کێشێوە مرۊیی هەن. گەرەکشانە کێشە مرۊییەکا چارەسەر کەرا پەوکای ئی کۊنفرانسەشا وەڵۍ وست. دیشا چارەسەر ئینا پارادایموو ڕابەر ئاپۊینە. پەوکای  هاگادارییشا جە ڕابەر ئاپۊی و پارادایمەکەیش کەرڎ.

پێویسا گەنجۍ سەرمەشقۍ پارادایموو ڕابەر ئاپۊی با  

ئیساتۍ ئانە کە جە گەنجا داوا کریۊ، تەنیا بەشداریی هەڵمەتەکێنە نییا، بەڵکوم سەرمەشقبییەین هەڵمەتەکێنە. گرڎیاگێوەنە ڕێکەش وزا و وزاش وەڵۍ، ئی هەڵمەتۍ پەی ئینسانیەتی چێش میاونۊ؟ پەی ئا جمیەرا کە پەی ئازادی و دیموکراسی کۊشیا چێشەنە؟  ئەی پەی ژەنا و گەنجا و گلێڕگەی؟ پێویستا چی بابەتەیە بیاومێنە  ئانە هەرمانەشانە، ڕابەر ئاپۊ دایمە هەرمانەو گەنجا بەرز نرخنۍ دایم ڕۊحوو کارەکتەروو گەنجا بە بنەما وینۍ، خزمەتی فرەش بە گەنجا کەرڎ و پارادایمەکەشنە نەک هەر گەنجۍ ژەنیچ کریۍ بە سەرمەشق. کە ئینە حەر بە قسۍ نییا بەڵکوم پراکتکا. ڕابەر ئاپۊ سەروو ئا بناغەیە پەکەکەش مەرزنارە و بە ڕۊحوو گەنجا و کارەکتەروو گەنجا و هەستوو گەنجا ئی کۊشیایشە وست وەڵۍ پەوکای واتش: "ئێمە بە گەنجۍ دەسما پەنە کەرڎ، بە گەنجێچ تەمامنمێش". چونکوم ڕۊحوو گەنجی حەرگیز پیر مەبۊ. ئانە کە جە جمیەروو گەنجا موازییۊ، خاستەر یاواینەین جە لە پارادایموو ڕابەر ئاپۊی، یاواینەی و سەرمەشقبییەی پارادایمەکەین. ئەگەر جەیۊی نزیکۍ باوە،ئەجنجامێوە گەورەتەر جە جمیەروو ١٩٦٨ دەس وزا. کۊنفرانسەکەشا هەنگامێوە گرنگەنە، مشۊم سەروو بناغەکەیشۊ وێشا پەروەرڎە کەرا. سەروو پارادایمەکاو ڕابەر ئاپۊی وێشا پەروەرڎە کەرا، تا دوری گرنگ گێڵنا. 

بەرنامەی وەڵیننە بڕۍ تیشکی وزیا سەروو سیاسەتوو جەنگی تایبەتوو دەوڵەتوو تورکی، کە زەرەرەکاش شارۊوە. دیما چا وەختانە بڕۍ ناچار بی چالاکیۍ گەریلای سەرنیشتنە و کورڎستاننە و زەرەرەکاش پەی ڕای گرڎینی وەڵا کەرۊوە. پەنەم وەشا سەروو ئا جەنگەیە کە ئیساتۍ مەنتێقەکاو پارێزنای مەدیاینە هەن شرۊڤەتا بۊ، وەلۍ بابەتێوە سەرنجکێش ئەرەیاونایەکەو هەپەگەینە بۍ و وچیابێ: "چکۊ هێزوو گەریلای نەبۊ، دەوڵەتوو ئەرەگیروو تورکی هێزەکاش چاگە منیۊرە و بنۍ وزۊ و ئا یاگۍ وزۊ چێروو دەسەڵاتوو وێشۊ" ئینە ماناش چێشەنە ؟  

پەدەکە نەک حەر مەیدانەکاو گەریلاینە، بەڵکوم گرڎیاگێوەنە دوژمنایەتیما کەرۊ

سڵام  و ڕێزوو يێم ئاڕاسەو ناوەندوو قەرارگەو هەپەگەی و فەرماندە و گەریلاکاو یەژاستاری و هەپەگەی کەروو. چونکوم بۍ دووەدڵی پەی ئینسانیەتی نەک تەنیا پەی کورڎی جە هەلومەرجێوە سەختنە و دلۍ هەژارینە ژیوای ویشا بەخت کەرا. دەوڵەتوو تورکی گرڎوو چەکەکاو ناتۊی دژوو گەریلاکا بەکار مارۊ، تانکۍ بەکار مارۊ چەکی کیمیاوی و تۊپۍ و هەڵای مەتاوۊ بیاوۊ ئەنجام چی؟ چونکوم ئیرادێوە فرە قەوەتشا هەن و ڕووەو ئامانجەکەیشا ملا و ڕابەر ئاپۊی کەرا بە بناغە. بەتەمامی ویشا وستەن خزمەتوو گەلی و ئینسانیەتیوە. پێویسا گەلەکەما هاگاداری چی گەریلایا کەرۊ و مشۊم دۊسەکێما مانا بەخشا پی مدرامانەیە، چی ئی کۊشیایە کریۊ چی هێزە کورڎییەکۍ و گەنجاو کورڎی بێتەرس دژوو ئەرەگیراو تورکی، قڕکەراو تورکی مرڎێنێوە، تەنانەت  گیانیچشا بەخشا. دلۍ پەدەکەینە بەتایبەت بارزانییۍ هەنۍ، ئاخر گرڎشا پێسەو یۊی نییەنۍ، ئەیوب و ئەدهەم بارزانی جیاوازێنۍ. مەسعود بارزانی زاڵا سەروو پەدەکەیرە، هینوو ئاییشان. هەرمانە پەی بنەیانەکەیشا کەرا و گرڎ چێو وزا خزمەتوو بنەیانەیوە و خزمەتوو تورکیوە. سیاسەتوو تورکیای سیاسەتوو قڕکەرڎەین و  ئەادێچ کەوتێنۍ خزمەتوو ئیسیاسەتیوە. ئینەیچە دیارا.  ئانۍ ماچا کورڎێنمۍ، وەڵاتپارێزنێنمۍ، ویژدان و ئەخلاقما هەن، مشۊم ئینەیە بوینا. ئەخلاق و ئایین و کورڎایەتی ئی سیاسەتەیە قبووڵ مەکەرا، ئا چێوۍ خزمەتوو قڕکەرا کەرا، خزمەت بە کورڎی مەکەرا، پیویسا خەڵک ئا سیاسەتی مرڎا کە خزمەت بە قڕکەرا کەرۊ. وەڵاتپارێزنی داواو ئینەیە جە خەڵکی کەرۊ، دەوڵتوو تورکی بە هامکارییشا ئی جەنگەیە کەرۊ، نەک حەر هەرێمەکاو پارێزنای مەدیاینە، سەرنیشتنە، پانیشتنە، وەرنیشت و وەرکەوتنە، جیهاننە، بە هامکاریی پەدەکەی مەسعوود بارزانی، سیاسەتوو قڕکەرڎەی کورڎی بەرۊ ڕاوە، ئەرئادۍ نەبا، دەوڵەتوو تورکی نمەتاوۊ ئی جەنگەیە کەرۊ.  

گەرەکما یدش وزووە کە، پەی ئەوەڵ جاری چەنی ئەرەیاونای پانیشتینە ٤ کەسۍ زەمینۊ و عاسمانۊ نیشانەشا دا، کە چەنی پێشمەرگۍ سەر بە بنەیانەو بارزانی با بە قەڵغانۍ ئەرەگیرا، ئینە چێشا و چەنی شرۊڤەش کەرڎێ؟  

پەدەکەو بنەیانەو بارزانی بە گرڎ نۊعێوە هامکاریی دەوڵەتوو تورکی کەرا و گرڎ لاێوە دوژمنایەتیی پەکەکەی کەرا، دوژمنایەتیی کورڎی ئازادی و تەلەڤزوێنۊ بەرکەوت، کە بنکەو پەدەکەی و تورکەکا ئینا پێوە. پەدەکە زەمینە پەی تورکی وەش کەرۊ و تورکیا هێزوو وێش بە هێلیکۊپتەر مارۊ پاڵوو پەدەکەی.  ئینە بە ڤیدیۊ هەن و گرڎ کەسی دیەن  و ئەنترنێتنە هەن. دەوڵەتوو تورکی ورڎە ورڎە پانیشتنە پۍ کوۊرە و گنۊ وەڵۍ و بنکۍ سەروازیۍ وەش کەرۊ، کە مەحاڵا بەبۍ هامکاریی پەدەکی بتاوۊ، تەنانەت بە هامکاریی بارزانی نەک تەنیا پانیشتنە کاریگەری سەروو عێراقیچۊ وەش کەرۊ. بادینان بییەن بە شارێوە تورکیای. بە بۍ تورکی هەنگامە مەنیا،  تورکیا گەرەکشا گرڎوو دەوڵەتەکاو هەرێمەکەی بارۊ سەروو ستراتیژەکەیش دژوو پەکەکەی. پانیشتنە بنکۍ تورکیای فرێنۍ، میت هەولێرنە و گرڎ یاگێوە  پانیشتینە کۊ بییەنۊ.

ناوەندوو پارێزنای گەلی واتشا هێزەکێشا مەخموورنە کێشنێنێوە و مەخمور متاوۊ وێش پارێزنۊ. کەچی دماو  ٢ ڕوا هێزوو بنەیانەو بارزانی و هێزە عێراقییەکۍ لوۍ واگە و جەنگورگیسیا، جا قسەکۍ ئینێنە چاگە میتێوە کوشیان، ئی بابەتە چەنی بێو گەرەکتانە چێش بە خەڵکوو مەخمووری بواچدێ؟  

چەکداراو  پەدەکەی بە ئەمرەو دەوڵەتوو تورکی لوۍ مەخموور

چی گەریلێکۍ لوۍ مەخموور؟ داعش لوا مەخموور و گەرەکش بۍ چا کۊکوشی کەرۊ. ئامانجوو داعشی پارتەکەماو گەلوو مەخمووری بۍ. داعش هەولێریوە نزیک بۍ، تا داعش دەسکەوتەکاو پانیشتی نەوزۊ خەتەریاتۊ سەروو داواو حکومەتوو پانیشتی گەریلا لوۍ مەخمور. گەریلا جەنگوو داعشیشا کەرڎ، نەک مەخمورشا پارێزنا، بەڵکو ناستشا هەولێرێچ گیریۊ، عێراقشا پارێزنا.  ڕاگێرییشا کەرڎ جە وەڵابییەیوە داعشی عێراقنە ئا وەخت مەسعود بارزانی لوا مەخمور و تەلەفزیۊننە بەر کەوت. سوپاسوو گەریلایش کەرڎ. چونکوم گەریلا  ئادێچش پارێزنۍ و پەی پارێزنایچشا لوا و ئیتر گەریلا واتش من هەرمانەو وێم کەرڎێنەم و چا کیشیێوە. ئادۍ گەرەکشا بۍ یاگۍ هەپەگەی گێراوە و ئیتر جەنگڕووەش دا و چایچ میتێوە کوشیا. بە مانێوە تەرە دەوڵەتوو تورکی پەدەکەی بەرۊ ڕاوە چاگە چێش کەرا؟  چونکە دەوڵەتوو تورکی گەرەکشا بۍ واگە و پەی کوشتەی و چۊڵکەرڎەی کەمپەکەی و تەماعێش سەروو مەخموری. پەدەکە سەروو داواو دەوڵەتوو تورکی لوۍ واگە، ئینەیچە سەلەمیان چوون ئەوەڵ ڕۊ جەنگ قۊمیا و میتێوە کوشیا، ئینە سەلەمنۊش پەدەکە خزمەت بە دەوڵەتوو تورکی کەرۊ.

گەریلا  هەرمانەو وێش کەرڎەش ئیسە خەڵکەکەما وێش وەسێن  

گەلەکەما مەخموورنە فرە شارەزۍ و بەئەزموونێنۍ. ساڵانێوەن کۊشیای کۊشیا و خاس چی گەما حاڵیۍ بیێنۍ. مزانا ئامای پەدەکەی پەی چێشین، پەوکای بەئاشکرا واتشا پەدەکەما گەرەک نیا و ئامای پەدەکەی ئامای تورکیاین. پەوکای ئێمە قبوڵش مەکەرمۍ ناکەین کە پەدەکە بۍ ئێگە. گەلوو کەمپەکەی متاوا وێشا پارێزنا، دەگێکۍ وێشاوە دەسشا پەنە کەرڎەن و تا ئیساتۍ ویشا پارێزنا و ئەزموونشا هەن، پێویسشا بە گەریلای نیا سیستەموو دیموکراتیکوو وێشا هەنشا و هەرمانەش پەنە کەرا. ئانە تەنیا چێوێوەن کە گەرەکشانە، ئێمە هەرگیز گەلەکەیما بێچارە جیا نمازمۍ، قەرارگەما ئی قەرارەشە دا، و ئێمە هینۍ گەلینمۍ چکۊ پێویسشا پەنەما بۊ ئینایمۍ چاگە   پێویسا گەلەکەما متنانەشا بە وێشا بۊ و بتوا وێشا پارێزنا. داوام هەنە پەی عێراق و نەتەوە یۊگێرتەکا تا ئیساتۍ پەدەکە دروێش چەنی کەرڎێنۍ و قسێشا نەکەرڎێنە، بەهانێشا ئانۍ بۍ کە گەریلا ئینۍ چا و هجووم کەرا سەروو گەریلای، ئیساتۍ نییەنۍ چاگە، مشۊم ئیساتێوە وەرپەرسبییەی وێتا چاگە بیاوندۍ یاگۍ. ئننا وەرپەرسێندۍ جە حەر ئەگەر و کۊکوشیی کەمپەکەی پێسە عێراقی و نەتەوە یۊگێرتەکا، من باوڕم هەن، کە ئێمە هەرمانەو وێما یاونێنەما یاگۍ، شمە وەرپەرسێندۍ ئیتر.  

با بڕۍ باسەکەی فاڕمۍ، بڕۍ ڕووەدایۍ سەیرۍ تورکیانە ڕووە مدا. وەڵۍ ورچنیەینە سەرنجەت پەی تەرسەکاو سەروو کورڎستانی و تورکیای کێشتە، ئینە ماناش چێشەنە و چەنی شرۊڤەش پەی کەری؟  

یانۍ دەستوورشا وستەن زبڵدانۊ. ڕاسا واتما ئەگەر ئاکەپە-مەهەپە سەر گنا، فاشیزم ی منیارە، چێوەکۍ سەروو ئی بنەمێوە ملاو وەرۊ. ئاکەپە-مەهەپە هەنگامێی فرێش نیێنۍ و ئیساتۍ دما هەنگامەکامنیا، ڕژێموو تورکیایشا فاڕا. ڕژێموو مستەفا کەمالیش لا بەرڎ. دماجار دەستورشا وست زبڵدانۊ، ئیساتۍ ڕا پەی ڕژێمێوە تازەی کەراوە. ئاکەپە-مەهەپە پەرە بە ڕژێمێوە مدۊ، کە سەروو بناغەو تورک-ئیسلامنە تەمامناش. ئینە دما پسماریشانە ڕابەر ئاپۊ واتش: "ئەگەر کێشەکاو تورکیای چارەسەرۍ نەکریا، میکانیکوو کودەتای مۍ وەرۊ. پێسەیچ فاشیزم تورکیانە گنۊ وەڵێ".  ئیسەتێنە تورکیا چەنی ئاکەپە – مەهەپەی ئی قۊناغەیە ئەزموون کەرا.  

ئۊپۊزسیۊنوو تورکیای خزمەتش پینەیە کەرڎ، بەمە کرڎ. هیچ وەخت وەرڎەموو هەنگامەکاشانە مەمرڎا، کورڎشا کوشت، قەیومشا کیانا، گێرتەی بۍ و گرڎ چێوێشا دژوو گەلوو کورڎی کەرڎ، ئۊپۊزسیۊنوو تورکیایچئینا چی دۊخەنە. ئەرڎۊگان چێشش وات؟ واتش ئانۍ سواروو ئەسپی بیۍ و ئوسکوداررە ویەرڎۍ، ئانە کە ئیسە ڕووەشدێنە سەروو ئی بنەمۍ بیەن و وەختۍ جەنگوو ئیسرائیل و فەڵەستینی ورگیسیا، ئەرڎۊغان ئینەش ئارڎۊ وەرۊ، متاوۊ ڕاسییەکاش شارۊوە و کەس نەیاوۊشنە، سەرنجەو گرڎ لێوەش بەرڎە سەروو جەنگوو ئیسرائیل و فەڵەستینی، چێجەنە هەنگامەو وێش نیاش.  

ئەرڎۊگان وەڵۍ جەنگینە چێشش وات؟ ماچۊ پێویسا پێویستە دەسوورێوە دیموکراسی وەش کەرمۍ. گرڎلایۍ گێل کەرۊ و گاڵتەشا پەنە کەرۊ. ئا دەستوورە کە وزۊش وەڵۍ دەستووروو فاشیزمین. ئایا چی قۊناغەنە دەستوور وزیۊ وەڵێ؟ مومکین نییا. پێویسا پەرە بە پارێزنای یاسۍ بدریۊ  و ڕێزوو گرڎ لاێوە گیریۊ. ئەگەر جڤاک سەروو ئی بناغەیە ڕێک نەوزیۊ، حیچ چێوێوە نییا کەرۊش.. سیستمی فاشیستی بەتەمامی یاگۍ گێرۊ و کەس مەتاوۊ هەناسە بدۊ. چند ساڵۍ چێوەڵتەر ئەرڎۊگان چێشش وات؟ بڕۍ کەسۍ زینداننە ئازادۍ کریۍ و واتش ئی قەرارەی مەیاونوو یاگۍ و بە دروسش نمەزانوو. ئیسەتۍ پاسە و چند ساڵێوە چێوەڵتەریچ پاسە، سەروو ئی بناغەیە دەستوور فڕە دریۊ دلۍ زبڵ و خاشاکیوە.

جە بەشێوە  جە نرخنایەکاتانە سەروو جەنگوو ئیسرائیلی و فەلەستینی باستا جە دووەڕوویی بڕۍ دەوڵەتا کەرڎەن. جوولەکە دیموکراتەکۍ و بڕۍ یاگێنە گەلوو کورڎی ناڕەزایەتی بەروزا . چێش ماچدۍ سەروو دۊخی دماینوو جەنگی؟  

ئێمە دژۍ  قڕکەرڎەینمۍ، قڕکەرڎەی دژوو گەلوو فەلەستینی هەن، و مشۊم دماییش بۍ. ئیساتێنە بڕۍ دەوڵەتۍ قسۍ کەرا و کوۍ باوە ماچا مشۊم جەنگوو فەلەستینی دماییش بۍ و جەنگ مرڎۊ و دوڵەتوو فەلەستینی وەش کریۊ. گرڎوو ئی قسە و باسا، هیچیشا بە چارەسەری مەیاوا. ئی دەوڵەتی بە پاو بەرژەوەندیی وێشا قسۍ کەرا، ئاخر دژۍ قڕکەرڎەی نییەنۍ، هەرمانە پەی چارەسەری دیموکراتیکی مەکەرا،  ئیساتێنە  زیاتەر و زیاتەر جمیەری سۊسیالیستی و دیموکراتیک و ئازادیوازەکۍ و ژەنی و گەنجۍ گاهاداریی  وەنەو فەلەستینی کەرا. دەوڵەتەکۍ مەتاوا کێشەکا چارەسەر کەرا. ئایین و نەژادپەرسی کێشەکا  چارەسەر  مەکەرۊ. ئینۍ وێشا کێشەنۍ، چەنی متاوا چارەسەر کەرا؟ پێویسا گەلوو فەلەستینی و جولەکەکۍ دەسوو یۊی گێرا و یەکبگرن و دژایەتیی ئی جەنگەیە کەرا چارەسەر ئینەن.  هەم حەماس و هەم دەوڵەتوو ئیسرائیلی ئایین و نەژادپەرسی بەکار مارا، ئینەیچە جەنگ مەمرڎنۊ و بەعەکسۊ کۊکوشی قەوەتتەر کەرۊ. فەلەستینییەکۍ و جوولەکەکۍ مشۊم پێوە دژوو ئینەیە مرڎاوە. سەروو ئی بناغەیە پەیوەندیی وێشا چەنی گەلاو وەرکەوتوو دلیراسەی وەڵۍ وزا و چەنی گەلاو دنیۍ پێوە دژوو جەنگی کۊشیا. ئینە تاکە ڕانە پەی دەسوستەی ئەنجامی ئینە ڕاسییەکەن.

ئانۍ کە کورڎی کوشا مەتاوا با بە دۊسۍ فەڵەستینی

ئیساتۍ ئەرڎۊگان ساختەکاریێوە گەورە کەرۊ، دووەڕوویێوە گەورە. ئانەیە نیشانە مدۊ، کە گرنگی بە گەلوو فەلەستینی مدۊ.  پی ڕاسییە وێش شارۊوە. یۊ بەرڎەوام کورڎۍ قڕ کەرۊ چەنی متاوۊ دۊسوو فەلەستینی بۊ؟  ئەگەر بەڕاسی گەرەکشا ئاشتی چەنی گەلوو فەلەستینی کەرۊ، پێویسا ئاشتی چەنی کۊرڎەکایچ کەرۊ، چونکوم هەم گەلوو فەلەستینی و هەم گەلوو کورڎی ئێشۍ گەورۍ چەشا، یۊسا بە دەسوو دەوڵەتوو ئیسرائیلی و ئەوشا بە دەسوو دەوڵەتوو تورکی. چەنی تورکیا  بۊ بە دەبێتە دۊسوو فەلەستینی. ئەرڎۊگان بەتەمامی جەنگێوە دەروونیی تایبەت کەرۊ. دۊسوو گەلوو فەلەستینی نییا. ئێمەیچ مشۊم ئینەیە بوینمۍ، ئانۍ هجووم کەرا سەروو گەلوو فەلەستینی  شاروو کۊنیاینە مەشقەکاشا کەرا، چا پەروەرڎۍ کریا و ملا مدا وەنەو فەلەستینییەکا و ئیساتێنە بازرگانیی بەینوو ئیسرائیلی و تورکیای جە گرڎ وەختۍ زیاتەرا. ئینەە تەنانەت جەنگیچەنە بەرڎەواما. چەنی متاوۊ دۊسوو فەلەستینی بۊ؟ بازرگانیی سەروو گەلوو فەلەستینیوە کەرۊ، کەرۊشا قوربانی. گەرەکشا ئینەیە کەرۊ بە پەرسەو بازاڕی. وەختۍ ماچۊ من ماچوو حەماس تیرۊریسا، پێویسا شمەیچ "یەپەگە"ی پێسە "تیرۊریست"ی بشناسدۍ، پێسە گەرەکشا قڕکەرڎەی کورڎی تەمام کەرۊ، پێسە هاگاداری جە گەلوو فەلەستینی کەرۊ، ساختەکاری و دووەڕوویێوە گەورە کەرۊ.  

45 ساڵۍ چێوەڵتەر بەڕسمی پەکەکەتا مەرزنارە، سەبرەت بە ئەرەمەرزنای پەکەکەی و ماناو ئی ڕووەیە چێش بە ڕای گرڎینی مواچدێ؟  

پارتی دژوو سیاسەتوو قڕکەرڎەی ئەرەمەرزیا

ئەرەمەرزنای پەکەکەی وەنەو ڕابەر ئاپۊی مەبارەک کەروو، ڕابەر ئاپۊ بە ئەرەمەرزنای پەکەکەی نەک تەنیا پەی گەلوو کورڎی، بەڵکوم پەی ئینسانیەتیچ خزمەتش کەرڎ. مەبارەکبایی ئەرەمەرزنای پارتی جە گەلاو دنیۍ و گەلەکەیما و دۊساما کەروو، پەکەکە جە چە هەلومەرجێوەنە و چی ئەرەمەرزیا؟ هەلومەرجی سەخت و دژوارنە مەرزیارە و سیاسەتوو قڕکەرڎەی سەروو گەلوو کورڎیوە لوا راوە. ئی سیاسەتوو قڕکارییە کاریگەریی فرە خراپش سەروو گەلوو کورڎیوە بۍ، ڕابەر ئاپۊ  خاس هاگاش جە گلێرگەی و ئینسانوو کورڎوو ئا سەرڎەمیوە بۍ و یاوێشەنە و دوژمنوو جڤاکی کورڎیی ئشناسۍ و یاوێنە کە کۍ ئینا پەشتەو ئینیشاوە، تارێخوو ئینسانیەتی و گەلوو کورڎینە دەرئەنجامۍ خاسێش دەس وستۍ و سەروو ئا بناغەیۊ پەکەکەش مەرزنارە. بە مانێوە تەرە، ئەرەمەرزنای پەکەکەی دژوو سیاسەتوو قڕکەرڎەی بۍ. چەنی ئا سیاسەتەیە لا بەرۊ و ئازادیی پەی گەلوو کورڎی وزۊ وەڵۍ، گەلوو کورڎی چەنی بە شناسنامەو وێش، بە زوانەکەیش سەروو خاکەکەیشۊ مژیوۊ.  بناغەش پەی وێش ورگێرت و پەرەش پا کۊشیایە دا و گلێرگەو کورڎیش وست سەروو ڕاو وێش. ئارۊ دنیانە کورڎی پێسە  نموونەی و هومێدی وینا. ئیسە دۊخوو ئینسانیەتی هامشێوەو کورڎین. ئیساتۍ مۊدێرنیتەی سەرمایەداری بییەن بەڵێوە گەورە سەرووئینسانیەتیوە. تەرسیش سەروو ژیوای ئینسانیوە وەشە کەرڎێنە. گەنجەکاو پاریسی یۊ جە مەبەسوو کۊبییەیوەکەیشا ئینە بۍ.  زانا مۊدێرنیتەی سەرمایەداری بە نامۍ ژیوایۊ ژیوای کۊشۊ، ئانە کەی ژیواین. گەنجۍ ویڕۍ چانەیە کەراوە چەنی ژیواێوە ئازاد وزا وەڵۍ، زاناشا ژیوای ئازاد بە پارادایموو ڕابەر ئاپۊی مومکینە. هیچ ڕایۍ تەرە نییەنە. ئینسانیەت تەنیا پی پارادایمەیە متاوۊ وەراوەروو مۊدێرنیتەی سەرمایەداریوە وێش پاریزنۊ.  

هەنگامەو ئەوەڵیما کورڎش وست سەروو پایا، ئیساتۍ ئینسانیەتی وزۊ سەروو پایا

ڕابەر ئاپۊ جەنی هاگادارییش جە گەلوو کورڎی کەرڎ، ئارۊیچ هاگاداری ئینسانیەتی کەرۊ، گێرا کورڎسانۊ دەسش پەنە کەرڎەبۊ وەلۍ جونکوم گلێرگەش کەرڎ بە بنەما و ئامانجش ئازادی و دیموکراسی بۍ، پێسە قووڵایی تارێخیش خولقنا. سەروو ئی بناغەیە جە هەقیقەتوو تارێخی یاوانە و هاگاداریی ژەنا و گەنجایچش کەرڎ و واوەی جە ئینسانیەتیچ. گرڎ کەس زاناش و دیش کە چارەسەر ئینا پارادایموو ڕابەر ئاپۊینە پەی بییەی و هەنگامنیای پەی وەڵۍ  و زاناشا هەنگامەکێش دژوو مۊدێرنیتەی سەرمایەداری نیێنەش، زاناشا ئا هەنگامۍ کورڎش زیندە کەرڎۊ و ئیساتۍ یەواش یەواش ئینسانیەتی زیندە کەرۊوە،.  پەوکای تامۍ پارادایمەکە وەڵا بۊوە و هاگادری وەنەکەرەیشگەورەتەر بۊ. ئامانجەکە چێشا؟ پێویسا فرە بەقەوەتی هاگاداری جە ڕابەر ئاپۊی کەرمۍ و جە ئازادیی ڕابەر ئاپۊی و جە پارادایمەکەیش، ئینە تەنیا هەرمانەو دۊسا نییەنە، هەرمانەو کورڎیچنە. پێویسا کورڎ و کادراو ئی حەرەکەتەیە زیاتەر جە گرڎ کەسێوە هاگاداری جە هەڵمەتەکۍ کەرا و جە پارادایمەکەیچ و بیاوناش گرڎوو دنیۍ ئانە کە موازییۊ ئینەنەن.