بە مەڵامەتو وەڵاکەردەیۆ ' هەواڵوو رۆنامەوانا نازم داشتانی و جیهان بیلگینێوە کە سوریانە گەشمەرڎۍ کریۍ' هەریۆ جە T24 ی و رۆنامەوانە سەیهان ئاڤشارۍ دۆسیەو ۋنەپەرسایۆ جە دژشا کریاوە.
سەبارەت بە وەڵاکەردەیۆ هەواڵێوە بە نامونیشانو 'رۆنامەوانا نازم داشتانی و جیهان بیلگینێوە کە سوریانە گەشمەرڎۍ کریۍ' کە جە T24 ەنە وەڵاکریاوە و هەرپاسە بە مەڵامەتو ئانەی رۆنامەوانە سەیهان ئاڤشارە هەمان هەواڵش جە پەلیانەو ۋێشەنە وەڵا کەرڎەنۆ، داواکارو گرڎیی کۆماریی جە ئیستەنبوڵ بە بانگەشەو 'پرۆپاگەندە پەی ڕێکوستەی' و 'وەڵاکەردەیۆ زانیاری غەڵەتی و چەواشەکارانە'ی دەسش بە ۋنەپەرسایۆ کەرد.
رۆنامەوانە سەیهان ئاڤشارە جە کاروەدایێنە ۋەرا ۋەر پا هەنگامۍ ئەرەیاۋنانش، "ئایا پەی ئانەی مرۆڤ داکۆکی جە مافو مرۆڤەکا بکەرۆ، مشۆم شەرتەکێش ئانۍ بۆ کە ئا مرۆڤە پېسە ئێمە ویر بکەرۆوە، پېسە ئێمە هەرمانەو رۆنامەوانی بکەرۆ؟ ئێمە بە پاو چێشی و بە پاو کێ تیرۆریستێنمۍ؟ ئێمە چن زوو ئا قسا قبوڵ مکەرمۍ. مەگەر روانگەو ئێمە و سینان ئاتەشی یۆن ئەر ئێمە خاوەنداریش ۋنە بکەرمۍ؟ یان رۆنامەوانێوە کە حەجگیز روانگەما یۆی نمەگێرۆوە کاتێ کوشیا، ئێمە چێش بکەرمۍ؟ ئێمە بێدەنگۍ بیمۍ؟ ئایا ئاوەزیەت و ویرکەردەیۆ ئێمە ۋەرا ۋەر بە دادپەروەری و راسی بە پاو شۊنەما و هەڵوێسو مرۆڤەکا مشۆم بواڕیۆ؟ داخەم نمەشۆ پەی گرڎیما.. هێزی دووۍ ڕۆنامەوانۍ کە خەڵکو ئی خاکەیە بێنۍ و چنەشەنە گۆرۍ بیۍ بە درۆنی هرووژمبەر کوشیۍ... کاتێ ئاڎۍ کوشیۍ ئێمە بێدەنگۍ بیمۍ، ئەر بێدەنگۍ بیمۍ ئێمە گولانۍ بیمێوە".
