پەرلەمانتارو پارتو دیموکراسی و یەکسانی گەلا (دەم پارتی) بەردان ئۆزتورک هرووژمەکۍ تورکیای و چەتەکا سوپاو نەتەوەیی سوریا (سمۆ)یش پەی سەرو سەرنیشتوو وەرکەوتوو سوریای هۆر سەنگنۍ. ئۆزتورک ئانەش وست ڕووە، کە دەسەڵاتداری ئیسەو تورکیای جە دلێنە و جبەرۆ سەرو بنەماو دوژمنایەتی کوردی سیاسەت مکەرۆ و ئەرەیاوناش، ئا دۆڵەتە جە سیاسەتو بەرینە وزەو وێش پەی پاکتاوکەردەی شۆڕشو وەرنیشتی بەکارمارۆ. پەی ئانەیچ ئیسفادە جە ناکۆکی هێزە هەژمونگەراکا و دۆڵەتا مەنتیقەکەی هۆرگێرۆ".

ئۆزتورک ویرش ئاردۆ کە تورکیا چنین ساڵێن چەتەکاش وەی مکەرۆ، دماو وڕناو رژێمو ئەسەدی راستەوخۆ ئا چەتێشە ئاراستەو تل رەفعەتی و منبجی کەردەن و ئانەیچ بەرش وسۆنە دەردو حکومەتو تورکیای نە رژێمو ئەسەدین و نە داعشا، بەڵکووم دەردەو ئا دۆڵەتەیە تەنیا و تەنیا کوردا و ئانەش بە جەهانی نیشاندان.

ئۆزتورک بە ئاماژەدای بە هەڕەشێ و هرووژمەکا وەراوەر بە کۆبانێ باسش چانەیەکەرد، "چارۆنە بە تایبەت هرووژم کریۆنە سەرو کۆبانێ، گردو مشتەنوری، وەرو ئانەی کۆبانێ و گردو مشتەنوری پەی کوردا هێما و یادەوەرینێ. مڏرامانو کۆبانێ گەل، ژەنێ و جوانێ کوردی بە هەستێوە هامبەش گلێرێ کەردێوە، ئا هەستە سنورە جوگرافیایاکاش ویەرنا کە کوردێشا جەیۆی کەردێبێنێ، جوانێ کوردی با هەستە هامبەشاوە یاوێ یۆ و جە دژو پەلامارەکا داعشی وێڕاگیریشا کەرد.

بەشێوە تەرو قسەکاشەنە بەردان ئۆزتورک ئاماژەش پانەیە کەرد کە شۆڕشو وەرنیشتی بە سەرمەشقایەتی ژەنا و بە واتەو "ژەنێ، ژیوای، ئازادی" جەهانەنە دەنگش دانۆ و ئەرەکۆشاو ژەناش فاڕان پەی هیواو ئازادی. ئا دەستکەوتێ بە مڏرامان بەدەسئامێنێ، گەرەکشانە بە هرووژمو و پەلامارە دلێنە بریۆ. کۆبانێ کە وەڵتەر نەتاواشا جە ڕاو داعشیۆ وزاش، ئارۆ گەرەکشانە جە ڕاو چەتەکا سمۆیۆ وزاش. گەرەکشانە ئارۆ تۆڵەو داعشی کەراوە.

'پەشتیوانی مییانەتەوەیی مشۆم بەهێز کریۆنە'

بەردان ئۆزتورک رەخنەش جە مامەڵەو راڕایانە و دووەدڵی گلێرگەو مییانەتەوەیی جە وەراوەرو ئیدارەو وێڕاوەبەری سەرنیشتوو وەرکەوتوو سوریای کەرد و ئەرەیاوناش، کە "لێوەنە پەستەو کەشێ ئازادی و دیموکراتیکی جە هەرێمەکەی کەرا، لێوەتەرۆ جە وەراوەرو هرووژمەکا دۆڵەتو تورکی بێدەنگێنێ و با بێدەنگیەشا ناڕاستەوخۆ پەشتیوانی جە هرووژمەکا دۆڵەتو تورکی کەرا. بەتایبەتی هرووژمەکا دۆڵەتو تورکی پەی سەرو سەرنیشتوو وەرکەوتوو سوریای پاشێلکەردەو یاسا مییانەتەوەییەکان، بەڵام سەربارو ئانەیچ بە مەڵامەتو بەرژەوەندییەکاشۆ چەمێش رووەو ئا پاشێلکارییا قوچنۆنە.

ئۆزتورک داواش بە ڕەسمی ئشناساو ئیدارەو وێڕاوەبەری سەرنیشتوو وەرکەوتی کەرد و پەی متەیرەو ئایندەو سوریای، هیواش واس ئیسفادە جە ئەزمونو ئیدارەو وێڕاوەبەری سەرنیشتوو  وەرکەوتوو سوریای هۆرگێرۆنە. هەرپێسە داواش کەردە راو گردی مییانەتەوەیی جە وەراوەرو هرووژمە ئەرەگیریا دۆڵەتو تورکی هەڵوێسوە رۆشن و وەرچەم گێرانەوەر.

'هرووژمەکە پەی سەرە بەهاکا مرۆڤایەتین'

بەردان ئۆزتورک هێماش پەی ئانەیەش کەرد، کە هرووژمەکا پەی سەرو ئیدارەو وێڕاوەبەری تەنیا هرووژم کەردەی پەی سەرو گەلو کوردی نییا، بەڵکووم هرووژما پەی سەرو عەرەبی، سوریانی، ئەرمەنییەکا و ئانەش وسڕووە، "سەرنیشتوو وەرکەوتوو سوریای نەک هەر جوگرافیێوە، بەڵکووم سیستمێوەن کە ژیواو یەکسانی و ئازادی گەلا سەلەمنۆنە. هرووژم پەی سەرو ئا سیستمەیە هرووژما پەی سەرو بەهاکا مرۆڤایەتی".

'بەبێ یەکڕیزی مەتاومێنە شکۆما پارێزنمێ"

بەردان ئۆزتورک پەرلەمانتارو دەم پارتی جە دمایینە واتش، "ئانەی جە ۋەرنیشتەنە پارێزیۆنە شکۆو گرڏیمانە. بە بێ یۆگێرتەی و یەکڕیزی نمەتاومێنە شکۆما پارێزنمێ. ئەر ئارۆ دەنگ هۆرنەبڕمێ، سەوای بوارێ مەمەنۆوە  کە ئێمە تاومێنە ئایندەو وێما پارێزنمێ. گۆرەتەرین وەرپرسیارێتیما ئانەن کە پەشتیوانیێ گۆرە کەرمێنە، ئانەیچ پەی ئایندەو هامبەشی گردوو گەلامانە.

داوا جە گلێرگەو مییانەتەوەیی مکەرو: بێدەنگی وەراوەرو هرووژمەکا هامبەشیین جە تاوانێ جە دژو مرۆڤایەتی. وەرنیشت پەی گەلا جەهانی بییەن بە سەرچەمەو ئیسفادەی، پارێزگاری چا مۆدێلەی نەک هەر ئەرکو کوردان بەڵکووم ئەرکو مرۆڤایەتین. گەلو کوردی نە ئارۆ و نە سەوای دەسبەردارو ئەرەکۆشای وێش پەی ئازادی، دادپەروەری و پێوەرە ژیوای نمەبۆنە. مڏرامانو وەرنیشتی جارێوەتەر ئانەش سەلەمنا. ئیسەیچ کاتو ئانەین کە جە وەراوەرو ئا هرووژمانە جارێوە تەر واچمێ "بژیوۊ مڏرامانو وەرنیشتی".