هامسەرۆکۊو کۆنسەو ڕاوەبەری کەجەکەی بەسێ هۆزاتە ناڕازیش جە ۋەرا ۋەرو قسۍ شالیارو دادو تورکیاینە نیشانە دا کە واتەنش 'نمەبۆ پەیامەکەو ڕابەر ئاپۆی بە دەیمەنۆ بۆ' و دەسنیشانشکەرڎ هیچ ئاژێوە پێچەوانەو ئینەی قبوڵ نمەکەرا.
بەسێ هۆزات جە بەرنامێوە تایبەتی مەدیا خەبەر تیڤینە قسێش کەرڎۍ و پێوەس بە قسەکا شالېیارو دادو تورکی واتش، قسێوە هیچەنە کە واتەبێش، 'پەیامو ڕابەر ئاپۆی ۋەرو ڕاوجاکاش نمەبۆ بە دیمەنۆ بۆ'. بەسێ واتش، "بە تنی ئی نزیکایەتییە ڕڎ مکەرمێوە، ڕەخنەش مکەرمۍ و بە حیچ کلوەجۍ قبوڵش نمەکەرمۍ."
بەسێ هۆزاتە ئاماژەش پانەیە دا کە گۆشەگیری سەرو ڕابەر ئاپۆی بەردەواما و واتش، "ئاخۆ شمە گەمێوە مکەردۍ ، گەرەکتانە چێش بکەردۍ؟ چ هۊرسەنگنایۍ پەی قسەکاو ۋێتا جە مانگۊو تشرینی یووەمیوە مکەردۍ؟ ماچدۍ ئەرەیاۋنای و قسۍ بە دیمەنۆ بە گوێرەو یاساکا نییا، چی مەگەر قسۍ بە نویستەی بە گوێرەو یاساین؟ چنی ئینە مکریۆ؟ چی مەگەر مکریۆ ڕابەر ئاپۆ دلۍ ئاژەو گۆشەگیرینە قسۍ بکەرۆ؟ کاریگەری ئەرەیاۋنای و بانگەوازیێوە کە دلۍ گۆشەگیریینە بڎریۆ مشۊم چێش بۆ؟ جە شالېیارو دادی پەرسونە، بانگەواز و ئەرەیاۋنای ڕابەر ئاپۆی دلۍ هەلومەرجو گۆشەگیرینە چنی یاسۍ گونجیۆ یان نا؟ با جوابو ئینەی بڎۊوە."
بەسێ هۆزاتە دەسنیشانشکەرڎ پەی لابەردەی گۆشەگیری ئیمراڵی مشۊم دەمودەس فاڕیای پەنەوازی یاسایی بکریۆ و واتش: " مشۊم ئاژەو گۆشەگیرکریاو ڕابەر ئاپۆی فاڕیۊنە، مشۊم بە تەمامی گۆشەگیری لا بریۆ و ڕابەر ئاپۆ ئازاد بۆ. دلۍ هەلومەرجی ئازادی و گونجیاو هەرمانێنە بتاوۆ بە دەورو ۋێش هۊربێزۆ، هەوڵبڎۆ، پرۆسەو فاڕیای دیموکراتیکی ئەرەمەرزنۆرە و پی جۊرە بۆ. ئەر پاسە نەبۆ مشۊم چنین بۆ؟"
هۊرسەنگنایەکۍ بەسێ هۆزاتۍ پی جۊرەنۍ:
"سەرەتا هێزە پیلانگێڵنەکا بە نەفرەت و شەرمەزار مکەرو. ڕێز و سڵام جە ئەوەکۊشای ٢٦ ساڵەو ڕابەر ئاپۆی جە ئیمراڵینە مکەرو. جە کەسایەتی گەشمەرڎا "نمەتاودۍ ڕۊما تاریک بکەردۍ " و هەمڕا ڤیان سۆرانێنە بە ڕێز و حورمەتۆ گرڎو گەشمەرڎا شۆڕشی یاڎ مکەرووە.
ئارۊیچەنە دژو پیلانگێڵنی و سیاسەتە قڕکارییەکا سەرو گەلوو کوردی گەشمەرڎۍ مڎەیمۍ. ئەوەکۊشای بەردەوام و گۊرە ئینا ئارانە. چی دماییەنە هەمڕا نەسرین ئامەدە فەرماندۍ یەژا ستاری بەشدارەو کارەوانو گەشمەرڎا بیە. بەڕاسی هەمڕێوە قارەمانە بۍ. جە مەجال و بە سووپابیەو ژەنانە هەوڵێوە بێهامتاش دا. هەمڕێوە ئازۍ بۍ.
هەرپاسە جەنگ ئینا قۆناغێوە سەخت و دژوارەنە؛ جە ۋەرا ۋەریچەنە مڎرامانی بێهامتایچ ڕاوەبەر مکریۆ. چی جەنگە سەختەنە شەهادەت گنۆوە. هەمڕێما دەلال و زیلانە گەشمەرڎۍ بیۍ. هەرپاسە جە ئاکاموو هرووژمەکا ئی دماییەینە گەشمەرڎۍ دریۍ، نامۍ ئا هەڤاڵا کە گەشمەرڎۍ بیێنۍ هەڵای ئاشکرا نەکریێنۍ.
هەڵبەتە زەرەرو دژمنیچ فرە فرەن. بەتایبەت چی هرووژم و چالاکییا دماییەینە گورزەی قورسەشا واردە. مڎرامانێوە سەرەمڕە ماوەو ٢٦ ساڵان بە بەشداری دۆساما بەردەواما.
کۊتیمۍ دلۍ ٢٧ ساڵەو پیلانگێڵنی. جە کوردەسان و جبەریچەنە بەشێوێوە بەهێز پیلانگێڵنی شەرمەزار کریا. بەشداری ئێساڵی فرە جەماوەری بۍ. جە گرڎ شۊنێنە ویستو ئازادی بەڎەنی ڕابەر ئاپۆی نیشانە دریا و بە هەزاران کەسۍ مجېێرە مېڎانەکا. پی جۊرە قەرارداری ۋێشا نیشانە دا.
متاومۍ بە ئیسراحەت باسو ئینەی بکەرمۍ. ئەوەکۊشای ٢٦ ساڵە دژ بە پیلانگێڵنی و پیلانگێڵنا پېوەس بە گەلوو کوردیوە زانابیەی، ئیرادە و قەرارداریێوە گۊرەش نیشانە دا. هەرپاسە هێزە پیلانگێڵنەکۍ ۋەرا ۋەر پی ئەوەکۊشایە شکسشا ئارڎ. پیلانگێڵنی دلېنەبریا و پوچ کریاوە. بەڕاسی جە ئیساتێنە سیستەمو قڕکەردەی و سیاسەتە قڕکارییەکۍ مەڕیێنۍ. هەر ۋێش پیلانگێڵنی پېسە بەشێوە جە سیاسەتی وزیا هەرمانەو گەرەکشا بۍ پی سیاسەتە قڕکارییەیشا ئەنجامێوە دەس وزا.
فرە بە ڕۊشنی موینمۍ ڕژێم و سیستەمو دۊڵەتو تورکی قڕکەری و فاشیستی مایەپووچ بیەن. ئیتر ئی سیاسەت و سیستەمە دەرەنجامێوە دەس نمەوزۆ. ئینە حەقیقەتەکەن. جە سەیەو ئەوەکۊشای گەلی و دۆس و گەریلایۆ دژمن مەڕیا. کاریگەرتەرین مەڵامەتو مەڕیای ئی سیستەمە قڕکارییە بێگومان ئەوەکۊشای و مڎرامانی بێهامتاو ٢٦ ساڵەو ئیمراڵییا. ئینە گرنگتەرین مڎرامانا.
پېسە باسمکەرد، جە سەیەو ئی ئەوەکۊشایۆ پەی هەمیشەی حەقیقەتو دژمنی ئاشکرا کریا. بە گرڎ جۆرێ حەقیقەتو دۊڵەتو تورکی ئاشکرا کریا. چی بوارەیچەنە گەلەکەما زانابیەیۍ تاریخی ناوازەش پەرەپنەدا. ئاوەزیەتو دژمنیش ئشناسا، ئێساڵیچ مېڎانەکۍ بە هەزاران و ملیۆنان کەسۍ پەڕۍ بیێبێنۍ. بەڕاسی بێهامتابۍ. گەلاو سەرنیشت و ۋەرکۊتوو سووریایچ بە هەزاران مجیێنێرە مېڎانەکاوە. جە ستراسبۆرگ و گرڎ لێوە ئەورووپای، جە سەرنیشتوو کوردەسانیوە مڎرامانی گرنگ و چالاکی گۊرە ئەنجام دریۍ و پیلانگێڵنی شەرمەزار کریا. پی مەڵامەتۆ فرە بە ئاسوودەی واچمۍ؛ بەڕاسی پیلانگێڵنی و پیلانگێڵنا شکسشا وارد. سیاسەتو سەڎ ساڵەو نکۆڵی و دلېنەبەردەی هاڵی کریێوە و مایەپوچۍ بیۍ. هەڵای جەخت چی سیاسەتەیە مکەراوە بەڵام بەڕاسی پوچ بیەنۆ. حیچ ئیمکانێوە گېڵایۆ نییا. گرڎو گەلوو کوردی ئەرەپڕان و داواو ئازادی مکەرۆ. گەلێوە کە سەرە منامنۊرە و جە بێدەنگینە بۆ گەل و گلېرگێوە کۆیلەن. بەڵام گەلوو کوردی گەلێوە پی جۊرە نیا. گەلوو کوردی ئینا مڎرامانو ئەوەکۊشاینە. گرڎ گەل و گلېرگێوە چڼە مڎرامان بکەرۆ ئاڼنە جە ئازادی نزیک بۆوە. حەقیقەتو گەلوو کوردی پی جۊرەنە. بە مڎرامانۆ زەریفتەر بی، ئیرادێوە بەهێزش بەدەس ئارڎ و جە ئیساتێچەنە ئی حەقیقەتە بەردەواما. بێگومان مېیاوۆ بە مەرامو سەرکۊتەیش.
کۆنفرانسو گەلا
خەباتێوە فرە گرنگا؛ بەڕاسی ڕەنجێوە مانادار و گرنگا. سڵام جە گرڏ و ئا کەسا مکەرو کە ئینێ هەوڵەداینە و موبارەک بایشا ونە مکەرو. متوامێنە واچمێ خەباتێوە سەدساڵە و ئازا و مانادارا. وەڵابییەیۆ فکرەکێ ڕابەر ئاپۆی، خاوەنداریکەردەی جە پارادایمو دیموکراتیکی جە لایەنو گرڏ گەلی و گلێرگەکێ جە سەرانسەرو جەهانی؛ جە وەراوەرو کێشەکا مرۆڤایەتیینە پێسەو چارەسەری و یاگەکیر پەسەن کریۆنە. خەباتێوە کە بەینو ١٤-١٦و شوباتینە جە ئەورووپانە بە ناننیشانو 'پلاتفۆرمو گەلا ئەورووپا' ی ئەنجامدریا، نیشاندەرو ئینەین.
نیشانەشدا کە پاردایمەکێ ڕابەر ئاپۆی چن وەڵابیێنێوە و جە لایەنو مرۆڤایەتی، جەهان و گلێرگەوە قبوڵ کریۆنە. چنین بەشێ گلێرگەی و نوێنەرێ ڕێکوزیێ جیاوازێ بەشداری ئی خەباتەیە بێنێ؛ ڕۆشنویر، سیاسەتمەدار، ئەکادیمی، تەڤگەرەکێ ژەنا، تەڤگەرەکێ ئیکۆلۆژی، چنین سۆسیالیست و کەسێ و لایەنێ دیموکراتیکی بەشدارێ بێنێ. با مانێ بێ خەباتێوە ئەنتەرناسیۆنالیست. جە سەرانسەرو جەهانینە ئا لایەنێ فکرەکێ ڕابەر ئاپۆیشا قبوڵ کەردێبێنێ بەشدارێ بێنێ، کە پارێزناو ئازادی، یەکسانی، دادپەروەری، ئازای ژەنێ و سرووشت مکەرا، جە وەراوەرو تاڵانی سروشتی و قڕکەردەینە ئینێ خەباتەنە.
پی مەڵامەتە بەشێوێوە فرەلایەن گفتوگۆ سەرو پارادیمەکا رابەر ئاپۆی کریا. فرە خاستەر شیکریاوە و یاویانە و ڕاش پەی وەشکەردەو هۆشیارییێ بەهێز کەردەن. بەڕاسی سیستەمو سەرمایەداری، ئیمپرالیزم و هەژموونگەرای و پارادایمی مۆدێرنێتو سەرمایەداری دووژمنو گلێرگەی، مرۆڤایەتی، ژەنی و سروشتین. جە ئیسەنە گلێرگە و مرڤایەتی ئینا دلێ قەیرانێوە گۆرەینە. کێشەکێ گلێرگەی جە گرڏ ڕوێوە قوڵتەردێ بیێنێ. وڕێوە گۆرە ئینا ئارانە.
سەرو گلێرگەی وەربەرهەم هێنانێوە گۆرەو، وڕێوە ئەخلاقی و قەیرانێوە گۆرە هەن. سەرانسەو جەهانینە گلێەگە، گەلوو چێردەسەی و بەتایبەت ژەنی شۆنەو چارەسەریی پەی کێشەکێ ئیسەی. ئازادی، یەکسانی، دادپەروەری و دیموکراسیشا گەرەکا. داواو ژیوێوە ئازاد و دیموکراتیکی مکەرا. جوابو گرڏو ئا گێڵایا ئینا لا ڕابەر ئاپۆیۆ. یەکانگییێ بەهێز چنی فکرەکێ دابەر ئاپۆی هەنێ. وەرو ئانەی ڕابەرایەتی چارەسەرو گرڏو ئینیشا پێشکەش مکەرۆ. پەرە بە بەرنامەو چارەسەری مکەرۆ، پرۆژێوە وەڵێ وسۆنە و شێوازو ژیوای و سیستەمی مارۆ ئاراوە. چێگەنە پەنەوازیێ گۆرە بە فکر و پرۆژەکا ڕابەر ئاپۆی هەن.
جا ئەنجاما کە دماو خەباتەکەی وەڵاکریاوە داوێ فرە گرنگێش چنە بێنێ. دەرنجامی گرنگێش ونەکەوتێ. قەرارداریێ گرنگ بێ. جابەجێکەردەو ئینەی بەشێوێ بەهێز، لواشۆنیرە، گۆرەکەردە و بەڕێکوزتەی ئەوەکۆشای؛ وەڵا کەردەیۆ ئی پارادایمە بە گرڏ لێوە فرە گرنگا. ئی خەباتە کە جە ئەنجامو هەڵمەتەو جەهانی ئازادییۆ ئاما ئاراوە فرە گرنگا.
سڵام چی خەباتەیە مکەر و موبارەکش مکەرو. مشۆم بەردەوامێ بیمێ. خەباتی چی جۆرە فرە گرنگا. مشۆم خەباتو وەڵاکەردەیۆ پارادایمەکا و بەڕێکوستەی درێژە و بەردەوامیش بۆنە.
جە ٢٧هەمین ساڵۆ پیلانگێڵینە، بەرکەوتەو خەباتێوە چی جۆرە بیی بە جوابی مانادار بە ڕووەو پیلانگێڵینە. نیشانەش دا کە پیلانگێڵی چنین بەتاڵ بییەنۆ. هەوڵشادا بە پیلانگێڵنی فکرەکێ ڕابەر ئاپۆی و حەقیقەتەکێش دلێنە بەرا، بەڵام بە پێچەوانۆ فکرەکێ ڕابەر ئاپۆی جە گرڏو جەهانینە وەڵابیێوە، گرڏو گەلا جەهانێ خاوەندارییشا ونەکەرد و پێسەو نەخشەڕێوە قبوڵ مکریۆ. ڕاو گرڏو گلێرگەی و مرۆڤایەتی ڕۆشن مکەرۆوە. خاسترین جواب جە دژو پیلانگێڵی هەر ئینەن. مشۆم بە گوڕۆ بەردەوام بۆنە.
پېوەس بە پرۆسەی تازەو چارەسەری
وەزیرو دادی، دووۍ یەرۍ ڕوۍ چێوەڵی قسێش کەرڎۍ و ئەرەیاۋناش: "پەیامە ڤیدیۆییەکە بەگوێرەو یاسۍ نییا". جە حەقەتینەنە ئینە قسێوە هیچەنە. ئێمە بە تنی ڕەڎش مکەرمېوە و ڕەخنەش چنە مگێرمۍ و بە هیچ جۊرۍ قبوڵش نمەکەرمۍ.
ئانە ٢٦ ساڵێن سەرو ڕابەر ئاپۆی گۆشەگیری ڕاوەبەر مکەرا؛ ئینە ۋێش جە ۋێشةنە ئەشکەنجەن. یاسای مېیاننەتەوەیی ئینەی بە ئەشکەنجە و تاوانە دژ بە مرۆڤایەتی منیۆرە، کە بەڕاسی چامنەن. هەڵای ئی سیاسەتە بەردەواما.
بەمەڵامەتو هەلومەرجو گۆشەگیرییوە، جە مانگۊو تشرینی یووەمیوە، حکومەت بە سەرۆکایەتیی دەوڵەت باخچەلی بەردەوام بانگەواز جە ڕابەر ئاپۆی مکەرا. ئاڎۍ گەرەکشانە ڕابەر ئاپۆ داوا جە جمېیەرەکەیما و ڕای گرڎیی بکەرۆ. هەرپاسە داواش کەرڎە کە ڕابەر ئاپۆ بۍ پەرلەمان و جە گلېرۊبیەینە چنی فراکسیونو هەدەپەی قسۍ بکەرۆ و بانگەوازییەکەیش ئەرەیاۋنۆ. چن مانگێوەن بە ئاشکرا ئی جۆرە بانگەوازیا مکەرا و وەزیرو ئیساتۍ دادی هۊرمێزۆ ماچۆ؛ "ئینە با پاو یاسای نییا، نمەبۆ بە دیمەن قسۍ بکریا ". ئینەیچ ئانەی بەروزۆ کە ئاڎۍ جدیۍ نیەنۍ.
ئێمەیچ پەرسمۍ: "ئایا شۊنەو فرت و فێڵیرە گێڵدۍ، هەوڵو چێشی مڎەیدۍ؟ ماچدۍ"پەیامی ڤیدیۆیی بەپاو یاسای نییا". ئایا بەیاننامێوە نویسیا بەپاو یاساین؟ ئینە چنین بۆ؟ ئایا کریۆ ڕابەر ئاپۆ جە هەلومەرجو گۆشەگیرینە پەیام بڎۆ؟ کاریگەری ئا پەیامەی کە جە گۆشەگیرینە مڎریۆ چنین بۆ؟ پرسیارە جە وەزیرو دادی مکەرو. ئایا پەیامەکەو ڕابەر ئاپۆی چێرو هەلومەرجو گۆشەگیرینە بە پاو یاسای گونجیان؟ با جوابو ئینەی بڎاوە.
ئێمە هەر جە سەرەتاوە ماچمۍ مادام شمە داواو بانگەوازی جە ڕابەرایەتی مکەردۍ، ئاژەو ژیوای و هەرمانکەردەی پەی ڕابەر ئاپۆی مەیسەر بکەردۍ. ڕابەر ئاپۆ وەڵتەر ئەرەیاۋنابێش کە ئەگەر هەلومەرج بڕەخسیۆ، دەورو ۋێش موینۆ و گرڎ جۆرە کۆششێوە مکەرۆ. پەی ئانەی تورکیای بەرەو دیموکراسی بەرۆ، پرۆسەکەی جە مېڎانوو جەنگیوە فاڕۊوە پەی مېڎانی سیاسی و یاسایی. هەرپاسە ئاماژەس پانەیچ کەرڎ کە، "نمەتاوۆ چېرو گۊشەگیرینە ئی هەرمانۍ بکەرو."
ئایا مەرج و پیمەرەکۍ فاڕیێنۍ؟ لایەنەکۍ ماچا: "ئۆجالان چی پەیامەکەش نەڎا، چی دما کۊت، چی جە ١٥و شوباتینە نەدریا؟ بەڵام کەس نمەپەرسۆ: "ئایا مەرج و پیمەرەکۍ فاڕیێنۍ؟" جە حەقەتینەنە ئاڎۍ ۋێشا یاساکاو ۋێشا و یاسا جەهانیەکا پاشێلۍ مکەرا. مشۊم وەڵۍ گرڎ چێوینە فاڕیای یاسایی و دادوەری بکریۆ. پەنەوازا ئاژەو ڕابەر ئاپۆی عالتەر بکریۆ و یاسا سەرڕاس بکریۆوە و فاڕیای بکەرا. مشۊم گۆشەگیری بە تەمامی هۊرشێویۆوە. ڕابەر ئاپۆ مشۊم ئازاڎ بۆ. پەنەوازا مەرج و دەرفەتەکۍ هەرمانکەردەیش پەی مسۆگەر بکریا پەی ئانەی بتاوۆ دەورو ۋێش گێڵنۆ، ئەر ئی شەرتۍ جابەجێ نەکریا چنی چێوی چامنە ڕووە مڎۆ؟
ئیساتێچ ماچا "با پەیامەکەیش وەڵا بکەرۆوە، بەڵام بە ڤیدیۆیی نەبۆ. مشۊم بە نویسیای بۆ، ۋێچش نەوانۊشۆ، با کەسێوەتەر بوانۊشۆ. ئێمە بە تنی ئی سیاسەتەیە ڕەڎ مکەرمېوە. هیچ ڕەوایەتیێوەش پنە مەڎەیمۍ، هیچ کاریگەریێوەش نییا و لاو ئێمۊ یاگۍ قبوڵکەردەی نییا. شمە ڕابەر ئاپۆی جە ئاژەو ئەشکەنجەی و گۆشەگیریینە مازدێوە، دماتەر چەمەڕاو ئانەی مکەردۍ کەسانێوە بەنامۍ راىەر ئاپۆیۆ بەیاننامێوە نویسیا بواناوە و جمېیەرەکەما و گەل مەرجەکاش جابەجێ بکەرا؟ ئینە خیاڵێوە پووچا. نمەبۆ کەس خیاڵۍ پا جۆرە بکەرۆ، ئێمە ڕێبازی دوور جە جدییەتی بە جددی هۊرنمەگېرمۍ با خاس بزاندۍ.
نومان کورتولموس یەرۍ ڕوۍ چێوەڵی واتش: "بانگەوازیەکەو ئۆجالانی فرە گرنگ و تاریخیا. هەرپاسە سەرۆکو پەرلەمانی ماچۆ: 'ئی بانگەوازییە گرنگیێوە تاریخیش هەن'. کەواتە مشۊم دۊڵەت و حکومەت سەرنج و ڕێبازێوە جدی و ڕێزدارانەشا بۆ پەی ئی هەنگامۍ. چێوۍ جیا چانەی قبوڵ نمەکریۆ.
هەرپاسە مشۊم بانگەوازیەکە ڤیدیۆیی بۆ. ئێمە، کادیراو ئی جمېیەرەیە، کۊششکارا، گەل، دۆسا، گرڎو مېیانەکا دیموکراتیکی، ڕای گرڎیی؛ مشۊم پەیامەکەو ڕابەر ئاپۆی جە زوانی ۋێشۆ بژنەومۍ و بوینمۍ. تەنیا ئا کاتە یاگۍ باوەڕی و متمانەی مەبۆ. ڕوانگێوە بێ ئەهمیەت و دوور جە جدییەتی پەی ئی پەیامە تاریخیە کە بانگەشەو ئانەی مکەرا کە گرنگیێوە تاریخیش هەن، قبوڵکریا نییا. هەرپاسە هیچ کاریگەریێوەیچش نمەبۆ و پێشوازیش چنە نمەکریۆ. پۊکەی ڕۊشنتەر ماچمۍ چێوۍ چامنە مەحەڵە.
ئەر ئا ڕێبازەو وەزیرو دادی نیشانەش دا ڕێبازو حکومەتی بۆ، بێ جدیەتا. ئینەیچ ئانەی نیشانە مڎۆ کە ئاڎۍ گەمە مکەرا. ئەر ئینە ڕێبازو دۊڵەتی و حکومەتی بۆ و گەرەکشا بۆ پی جۊرە ڕەفتار بکەرا، ئانە بە ماناو ئانەی مۍ کە حیچ نیەتێوە جددییەت نییا.
بەڕاسی ڕابەر ئاپۆ ئامادەکاری پەی هەنگامېوە تاریخیۍ مکەرۆ پەی کوردی و گەلا تورکیای و ناوچەکەی. رابەر ئاپۆ خجڵو هەرمانێوە فرە چڕی و گرنگین جە پرۆسەکەشەنە. جە حەقەتینەنە ئەوەکۊشای ٥٠ ساڵەو ڕابەر ئاپۆی و مڎرامانی ٢٦ساڵەو ئیمرالی ئەوەکۊشای دیموکراتیکەردەی تورکیای و چارەسەری دیموکراتیکی پرسیوکوردی بیەن. ئیساتێچ ڕابەر ئاپۆ پەی ئی مەسەلۍ بەردەوامە جە ئەوەکۊشای. ڕابەر ئاپۆ، بە نامۍ گەلی، گرڎو شوناسە چېردەسەکا، ژەنا و مرۆڤایەتی، بە ئیرادەو مڎرامانی و بەرزتەر جە مرۆڤایەتییوە، دلۍ سیستەمو ئەشکەنجە و سەپنەای گۆشەگیریی ئیمرالینە، مڎرامانێوە گۊرە نیشانە مڎۆ.
ئیساتچ ۋێش پەی هەنگامێوە دیموکراتیزەکەردەیۍ گۊرەی پەی گەلا ناوچەکەی و بەتایبەت کوردی و گەلا تورکیات ئامادە مکەرۆ. هەرپاسە گەرەکشا ئی هەنگامە گۊرۍ بە پرۆسەو فاڕیایۍ بنەڕەتی وەڵۍ وزۆ. گەرەکشا پرۆسەو فاڕیای و فاڕیایۍ دیموکراتیکی دەس پنە بکەرۆ. پېسە جە نامەکەشەنە کە پەیش کیاستێنمۍ بە ڕۊشنی پەیما بەرکۊت، ڕابەر ئاپۆ جە بوارو فاڕیای دیموکراتیکی و بنیاتنیایۆ قووڵینە بە ئیرادە و پاگیرا. هەرپاسە ئینا هەوڵ و ئەوەکۊشایۍ ۋەرفراوانەنە.
ڕابەر ئاپۆ گرڎ دەرفەتێوە پەی بەرژەوەندی گەلی بەکار مارۆ. گرڎو هێز، وزە و ژیۋای ۋێش پەی ئی مەبەسیە فیدا کەردەن.
بڕۍ ماچا تورکیاما وەش مسیۆ، وڵاتپارێزنێنمۍ، بەڵام ئەر وڵاتپارێزنێوە حەقەتینە جە تورکیانە بۆ ئانە ڕابەر ئاپۆن. ڕابەر ئاپۆ گرڎو تەمەنو ۋێش پەی بنیاڎنیای کۆمارێوە دیموکراتیکی و ئەوەکۊشای چا بارۆ تەرخان کەرڎەن. کەسێوەن ئڼەو ڕزگاری گەلا تورکیای و پەی گەلا ناوچەکەیچ ئەوەکۊشای مکەرۆ.
ئاژەو تورکیەی ڕۊسنا. گرڎو ئانەی کە دژو ڕابەر ئاپۆی کریان، جە حەقەتینەنە دژو گرڎو گەلا تورکیای کریان. هۊرشێونایۆ سیستەمو گۆشەگیری و ئازادکەردەی رابەر ئاپۆی جە یەک کاتەنە مەبۆ بە مەڵامەتو دیموکراتیزەکەردەی تورکیەی و ئازادیی گرڎو گلېرگەو تورکیای. پۊکەی پەنەوازا گرڎو گەلا تورکیای پەی ئازادی بەڎەنی ڕابەر ئاپوی ئەوەکۊشایۍ گۊرە ڕاوەبەر بکەرا. ئازادی گلېرگەو تورکیای پېوەسا بە ئازادی ڕابەر ئاپویۆ. ئی مژارە مشۊم بە تێر وتەسەلی بیاومێشەنە.
شێوازو مامەڵەو حکومەتی چنی پڕۆسەکەی
ئی حکومەتە فاشیستە ئینا لێوارو وڕایێوە گۆرەینە. سیاسەتو جینۆسایدی، سەرکوتگەری و فاشیستی کە بەساڵانە جابەجێش مکەرۆ، دمای ئی حکومەتەیشە ونە گنۆوە. چی حاڵەینە ئیسە تووشو وڕای گۆرەی بۆوە. ئیتر نمەتاوۆ هەناسە دۆنە و هەرچی زیاتەر ئەنجام هورمەگێرۆ زیاتەر پەنا پەی هێزی و سەرکوتکاری بەرۆ. ئینەیچ بۆ بەمەڵامەتو بەکارئاردەو تنوتیژی و جەنگی. جە ئیسەنە چنی گرڏو چینەکا و توێژەکا گلێرگەی ئینا جەنگەنە: چنی ئۆپۆزسیۆن، هونەرمەندان، ڕژنامەنووسا، ژەنا، جوانێ، چالاکێ ژینگەپارێزێ، تەنانەت چنی توسیاد(سەندیکاو پیشەسازی و بازرگانا تورکیای). واتە کەس نەمەنەن جەنگش چنی نەکەرۆ. ئینا جەنگێ گۆرەنە چنی گرڏ کەسێ جگە جە دەسە و لایەنگرا وێش. ئی جەنگە بە سەرکوتکەردەی، تنوتیژی، ئەشکەنجەدای و زینان، تانک و تۆپ، فڕۆکەی بێفڕۆکەوان و گرڏ جۆرێ تەرێ کە ئینا وەردەسشەنە بەراش ڕاوە.
ئینەیچ نیشاندەرو ئانەین کە حکومەت شەرعیەتو وێش جەدەسدان. ڕەزامەندی و رەوایەتیش دلێ گلێرگەینە تەمام بییەن، نمەتاو وڵات بەرۆ ڕاوە. جە گرڏ لێوەنە خەڵک ناڕەزایەتی نیشانە مڏۆنە. کرێکارێ، خانەنشینێ، ژەنێ و جوانێ کاردانەوە نیشانە مڏا. بەڵام نمەتاوا ڕا پەی دەربازبییەو ئی دۆخەیە بێزاوە. جەنگەکە فرە بەهێزا. ئەوەکۆشای کوردی، ئەوەکۆشای هێزەکا دیموکراسی، ئەوەکۆشای گەریلای و ئا ئەوەکۆشایە کە جە ئاسو جەهانینە بە هەڵمەتو ئازادیی جەهانی ملۆ ڕاوە، گرڏ ئانیشا حکومەتشا وستنە ئاستەنگییۆ.
با بۆنۆ ناچارێ بیێنێ بەرێوە گولانە جە سیستەمو ئەشکەنجەی و سەپناو گۆشەگیری ئیمرالی بکەراوە. هەرپاسە ڕابەرایەتی ئی نەتاوا و گێڵای و هەوڵدایا دلێ حکومەتی وینۆنە. هەرپاسە وینۆنە کە سیاسەتو جینۆسایدی شکستش ئاردەن. ئیرادە و ئەوەکۆشای گۆرەو گەلی پەی ئازادی بۆنە. کەواتە ڕابەر ئاپۆ دەسوەڵوستەی گۆرەش پەرەپنەدا؛ دەسوەڵوستەی فاڕییای دیموکراتیکی. گەرەکشا فاڕییایێ گۆرە دەس پنە بکەرۆ. گەرەکشا تورکیای بەرەو دیموکراتیک بەرۆنە و فاڕییایێ بنەڕەتی بکەرۆ. گەرەکشا دیموکراتیزاسیۆنێوە گۆرە سەرو بنەماو ئازادی کوردی جە تورکیا و ناوچەکەنە پەرە پنەدۆنە. ئینە هەنگامێوە گۆرە و تاریخییا.
بەڵام کە تەماشەو حکومەتی مکەرا؛ گرڏ ڕوێ ماچۆ پەکەکە مشۆم چەک بنیۆرە. ئەردۆغان هەر جارێوە دەمش مکەرۆوە و ئینەیە واوەی مکەرۆوە. بەڵام کاتێ تەماشەو کردەوەکاش مکەرمێ، جە حەقەتینەنە ماچۆ با جەنگەکە بەردەوام بۆنە. چی وڵاتەنە سیاسەتێوە سەڏ ساڵەو حکومەتی هەن. هەمیشە دوژمنو دلینەی وەش مکەرۆ؛ کوردشا پی جۆرە پێناسە کەردەن. بەم عەقڵیەتۆ دوژمنی دلینە و دەرەکیش، گلێرگەی بەرەو میلیتاریزە و شۆڤێنیزم گەشە مکەرۆ. ئینەیچ بییەن بە ئامرازێوە سەرەکی پەی مەنەیۆ جە دەسەڵاتی. ڕابەر ئاپۆیچ بە هەمان شێوە گەرەکشا ئی گەمەیە هورشانۆوە.
ئیدامەش هەن.....
