" هەرمانەو ئه‌ردۆغانی په‌كوستەى پرۆسه‌و ئاشتین جا جە حه‌ر کۊ بۆ، جە لیبیا بۆ، یا سوریا، یا ناگارنۆكاراباخ یا دلێینەو وڵاته‌كه‌و ۋێش، ئه‌ردۆغان گەرەکش نیا به حیچ جۆرێوە ئاشتى بۍ دى ۋەروو ئانەی بیەی و مەنەیۆ ئاڎیی بەسیانۆ به جەنگیوە".
چانەی مشۆ ئاڵوگۆڕێوە جە بەینوو غەزەی و ئۆكرانیاینە کریابۆ، چا وەختۊ غەزە بیەن به باسوو میدیاكا، ئۆكرانیا پېسە پێویسی باس و خواسش نیا، مەبۆ ئانەیچ جە ویرکەرمۍ كه ڕێكه‌وتوو جەنگوو غه‌ززهی‌و په‌لاماره‌كۍ جمیەروو حه‌ماسی جە سه‌رو به‌نڎێوەنە بۍ، وڵاتا عه‌ره‌بى و به‌تایبه‌ت سعودیه فرە نزیكۍ بیێوە چانەی کە چنی ئیسرائیلی گرڎ چێوۍ یه‌كلایی کەراوە، رێكۊتەی سعودیه و ئیسرائیلی به دڵوو توركیای و جمیەروو حه‌ماسیچ نەبۍ، پۊکەی پەشتەو هۊرچنیەی ئا وەختیۆ جەمۍ مژارۍ پەنهانۍ و شاراوه هه‌نۍ، ڕه‌نگه ئیتر ئه‌ردۆغان و ئیسماعیل هه‌نیه ئامانجوو ۋێشا پێكابۆ پانەی کە تا ڕادێوە فرە پرۆسه‌و ئاشتى په‌كە بڎا، هه‌ر ۋێش هەرمانەو ئه‌ردۆغانی په‌كوستەی پرۆسه‌و ئاشتیا جا جە حەر کۆ بۆ، جە لیبیا بۆ، یا سوریا، یا ناگارنۆكاراباخ یا دلێینەو وڵاته‌كه‌و ۋێش، ئه‌ردۆغان گەرەکش نیا به حیچ جۆرێوە ئاشتى بۍ دى ۋەروو ئانەی بیەی و مەنەیۆ ئاڎیی بەسیانۆ به جەنگیوە ئینۍ من ماچوشا زیاتەر پەیلوێنۍ، به‌ڵام چانەی مشۊ ئینە حه‌ر پەیلوای نه‌بۆ و حەقەتینێچ با، پۊکەی پېسە كاروەدایۍ سه‌رۆكوو ئیسرائیلی ماچۆ سعودیه متاوۆ ئاشتى بنیاڎ بنیۆ.
غه‌ززه کاول بی، ژەنی و زارۊڵۍ و پیرۍ فرۍ کوشیۍ جیای توركیایو گرڎوو وڵاتا عه‌ره‌بى و به‌شێوە فرەو وڵاتا ئیسلامى، پانیشتوو ئه‌فریقاكه‌و ماندێلای بەرەو ئه‌نجومه‌نوو ئاسایشىش لەرناوە هەڵای ئێمه ئینایمۍ سه‌ره‌تاو جەنگەکەینە، مەزانمۍ ئی بەشکەردەو گه‌مه‌یه به چ ئاراستێوەرە ملۆ، به‌ڵام به بێده‌نگى سۊچۆ، پېسە چنی ئۆكرانیا به بێده‌نگى سۊتوو سه‌رۆكێوە نه‌زان به فیتوو ناتۆی جەنگش به هەشە چەرمەکۍ ورەت، كه ماچمۍ به بێده‌نگى قسێما سه‌روو ئانەی نییا میدیا چا بارۆ قسێش نیه‌نە، میدیایچ به حەزوو زلهێزه‌كا هۊرسوڕیۆ کریۆ ئارۆ گرڎ باسۍ باسوو ئۆكراینی بۆ و سەوای گرڎ باسوو غەز‌زەی، ئارۆ حوسیه‌كۍ وزیا چوار چێوه‌و تیرۆریوه‌و سەوای حیزبوڵاو لوبنانی، قسه سەروو ئانەینە كه‌س نیه ئاێروو جەنگەکا خامۊش کەرۆ، جە گرڎ لێوە ویستوو جەنگی سه‌روو ویستوو ئاشتیرە زاڵا، گرڎوو ئانیشا کە دنیاى سیاسى بەراڕاوە بەهانێشا پۍ جەنگی زیاتەرا تا بەهانۍ پۍ ئاشتی، سه‌رده‌موو ئامای پێخەمبەرایچ نەمەنەن تا یۆ به گۆچانێوە سیحریۆ بۍ و گرڎ لێوە مردنۆ.
چانەی مشۆ ئیسەو ئی سه‌رده‌مه جەنگ به‌شێوە گرنگ بۆ جە گێڵای شۊنەو ئاشتیرە، چونكی گه‌ر جەنگ نەبۆو جەنگ هورنەگیسیۆ نه‌بازاڕوو ساغكەردەیۆ چه‌كی ده‌سه‌به‌ر بۆ، نەبەشکەردەی كێكه‌کۍ ئیسە به‌شێوە فرەو دنیۍ ئینا دلۍ جەنگێوە گۊرەینە ویستێوە مه‌ترسیڎاروو وڵاته گه‌وره‌كا ئی مەنتیقەیچە ئانەن چنی بتاوا ئەویشای تەری مەسڵەحەتوو ۋێشانە ڕام کەرا، ئینەیچ پۍ دووۍ مەڵامەتان یووەم: یاگەپاو ۋێشا مەنتیقەکەنە زیاتەر قایم کەرا دووه‌م :بتاوا جیای ۋێشا ڕاسه‌و خۆ جەنگەنە با به بە كرێگرته‌كاشا ئا جەنگیە کەرا، ئێران و توركیا چینەینە ئینۍ ملەملانێوە تنەنە، جە گرڎ لېوەنە به‌شوو ئانەیچشا هەن گەمەکەو ۋێشا پنەشا کەرا، په‌لاماره‌كۍ توركیای و ئێرانی پۍ سه‌روو هه‌رێموو كوردسانی جە ساڵا ویەردەینە حەرپاسە سه‌ره‌تاو ئێساڵینە پنەما ماچۆ ئاڎۍ خه‌ریكۍ درزێوە گۊرێنۍ به هامكارى ئا ئاوه‌زه كوردیه وزانە دلۍ كوردوو هه‌رێموو كوردسانیوه، دلۍ ئا ئاژە شێویاو دنیێنە ۋۍ به دورگرتەی و نه‌بیەی بە مقاشوو ئۍی و ئەوی فرە گرنگها، ئایا هێزه‌كۍ كوردسانی تواناو ئانەیشا هەن به‌یه‌ك دوورى چایشاوە مردا كه ویستوو ئانەیشا هەن کەراشا بە به‌شێوە جە گەمەکەی، ئینە پەنەوازش پانەین بزانمۍ سەوای چێش گوزەر کەرۆ.
