کەمال بولبول ئەنداموو ئەنجوومەنوو دەم پارتی، ئاماژەش بە پارادایم و ڕوانگەکا چارەسەری ڕابەروو گەلوو کوردی عەبدوڵا ئۆجالانی کەرد و ئەرەیاۋناش، "گۆشەگیری هجوما پۍ سەروو مافەکاما پێسە گەلی و مافە دیموکراسی و سیاسییەکاما".
کەمال بولبول ئەنداموو ئەنجوومەنوو دەم پارتی ئەرەیاۋناش، ڕاپیماکەی تا ئازاڎیی جەسڎەیی ڕابەروو گەلوو کوردی عەبدوڵا ئۆجالانی بەردەوامیش بۆ.
کەمال بولبول، یۊن جە بەشدارا 'راپیمای گۊرەو ئازاڎیی'، جە دیڎارێنە چنی ئاژانسوو هەواڵوو فوراتی ئەرەیاۋناش: "ڕاپیمای ئازاڎیما تا مسۆگەر کەردەی ئازاڎیی جەسڎەیی ڕابەروو گەلوو کوردی عەبدوڵا ئۆجالانی بەردەوام بۆ، قینی و کینە و تنووتیژی ۋەران ۋەر بە گەلوو کوردی جە تەرەفوو دەوڵەتیوە بەردەوامیش هەن. ئانە بە مەڵامەتوو ئینکاری کوردیۊن .مەسەلە سەرەکییەکە چێگەنە ئیمرالییا، گەلەکەما پەی ئاشتی و چارەسەری گۆشەگیر کریۆ، گەرەکشانە بانۍ بە ۋەربەس ۋەردەموو ویستەکامانە، گۆشەگیری تاوانێوەن دژوو مرۆڤایەتی، گۆشەگیری هجومکەردەین پۍ سەروو گەلی و قبوڵکریا نییا".
بولبول سەرنجش وست سەروو ڕوانگە و پارادایموو ڕابەروو گەلوو کوردی عەبدوڵا ئۆجالانی و واتش: "جە مافوو گەلوو کوردی و گروپە باوەڕییەکاوە تا میاوۆ بە مافە کۆمەڵایەتی و سیاسییەکا، ئا کەسەنە کە ئازاڎیی و داڎپەروەری و ئاشتی بەدەس مارۆ، بەڕێز ئۆجالان جە پڕۆسەو ئاشتینە بە پرۆژەو دیموکراسی کە پێشکەشش کەرد، متاوۆ کێشەکا نەک تەنیا جە تورکیانە بەڵکم جە گرڎوو ۋەرکەوتوو دلێڕاسەینە چارەسەر کەرۆ، هەر پۊکەی گۆشەگیری سەپیۆنە، ئێمە گۆشەگیری بە هجوم پۍ سەروو مافە مەدەنییەکا، سیاسی و دیموکراسییەکاما مزانمۍ، ڕاپیمای ئازاڎیی ویرئاردەیۆ ئینیشا گردین".
جە دمادمایی قسەکاشەنە بولبول ئاماژەش پانەی دا کە هەڵوێس و وزەو ئازاڎیی کۊکەراوە پۍ ١٥و شوباتی و ئاماژەش پانەی دا کە بە دڵنیاییوە ڕاپیماکەی بە ئازاڎیی دمایش مۍ.
