٨ و ئاداری ڕۊو جەهانیی ژەنا نزیک بۊوە، چی چوارچێوەنە ئاماڎەکارییەکۍ بەردەوامێنۍ و جە چن شارێوەنە چالاکی و ۋێنیشاندای ئەنجام مڎریا.

ڕحا

پلاتفۆرموو ژەناو ڕحای جە چوارچێوەو چالاکییەکا ٨ و ئادارینە کارتوو پەشتیوانیشا پۍ ژەنا دلۍ زینڎانی کیانا. پۍ ئی مەبەسیە ژەنی جە بیناو جەمەو مافناسانە پۍ ئازاڎیی (ئۆهەدە) کوۍ بیێوە.

چالاکا تەڤگەروو ژەنا ئازاڎیی (تەژەئا)ی عادیلە فیدانە جە چالاکییەکەنە قسێش کەردۍ و واتش: "٨ و ئاداری ڕۊو جەهانیی ژەنا مبارەک بۆ"، دماتەر ژەنەکۍ کارتەکێشا پۍ زینڎانەکا کیاستۍ.

سەرێکانی

جە مەنتیقەو سەرێکانی ڕحاینە، بە هەمان شێوە ژەنی کارتێشا پۍ زینڎانەکا کیاستۍ. کاندیدەو هامسەرۆکەو شارەوانی سەرێکانی، ڕەحشان یازارە واتش: "چی کۊشیاینە ژەناو کوردی سەرمەشقی کەرا، سەرەڕاو گرڎ جۊرە فشار و گێرتەیۍ و زینڎانیکەردەیۍ، دەس جە کۊشیای ۋێشا هۊرمەگێرا، ٨ و ئاداری جە تەماموو ژەنا مبارەک بۆ".

وان

جە مەنتیقەو پایزاوای وانیەنە بۊنەو ٨ و ئاداریوە کۊبیەیۆ ئەنجامدریا.

کاندیدەو هامسەرۆکەو شارەوانی ئێژاو وان و دەم پارتی، نەزلیهان شەدالە واتش: "ئی کۊشیایە پۍ گرڎوو ژەنا جەهانی بیەن بە نموونە، وەعد مڎەیمۍ فەلسەفەو "ژەنی، ژیۋای، ئازاڎیی" وەڵاکەرمێوە و کۊشیای ئێژاتەر کەرمۍ. تا ڕابەروو گەلوو کوردی عەبدوڵا ئۆجالان ئازاڎ نەبۆ، ئێمەیچ مەتاومۍ ئازاڎۍ بیمۍ، مدرامانوو ژەنا جە گرڎ مێڎانێنە بەردەوام بۆ".

دماتەر جە مەنتیقەو ڕاو ئاوریشمینە، سینڤزیۆنێوە دەربارەو کۊشیای ژەنا نیشانە دریا و گۆرانیۍ وچیۍ.

ئیدر

تەژەئا و مەجلیسوو ژەناو دەم پارتی جە مەحاڵەو خۆشخەبەری ئیدرینە مەڕاسیمێوەشا سازکەرد، ژەنی هۊرپڕۍ و دماتەر هامسەرۆکەو پارتوو هەرێمە دیموکراتیکەکا (دەبەپە)ی جە ئیدر، ئۆیا مەلاگازە واتش: "گۆشەگیریێوە سەخت سەروو بەڕێز عەبدوڵا ئۆجالانی و گەلوو کوردی هەن. پۍ هۊرگێرتەو گۆشەگیری جە زینڎانەکانە، مانگرتەی جە واردەی بەردەواما. حەرپاسە ئەڎاکێما ئینۍ ئێشکگیری دادپەروەرینە".

شەرناخ

چالاکی و ۋێنیشاندای ژەنا شەرناخەنە بە زەماۋنە بەردەوامیش بۍ. زەماۋنەکۍ بە سەرمەشقایەتی تەژەئای لوواڕاوە.

کاندیدەو هامسەرۆکایەتی شارەوانی شەرناخی، بێریڤان کوتلوە جە زەماۋنەکێنە واتش: "بەرەو ٣١ و ئاداری ئێمەی ژەنا سەروو سنووقەکاوە ۋەرا ۋەر بە قڕکەردەی ژەنا و تاڵانکەردەی سرووشتی ئیتر ماچمۍ وەسێن".

جولەمێرگ

مەجلیسوو ژەناو دەم پارتی و تەژەئای جە مەنتیقەو چیلێنە کۊبیەیۆ ژەناشا ئەنجامدا، هامسەرۆکەو دەم پارتی مەنتیقەکەی، حومەیرا ئارموتە سەرنجش وست سەروو گرنگی ٨ و ئاداری و واتش: " جە هۊرچنیەکانە کۊشیایما بە سەرکۊتەی تاجدار کەرمۍ".

گلێرۊبیەکەی بە هۊرپڕای و بەرزکەردەیۆ درووشـمەو "بژیۋۆ مدرامانوو ژەنا" دمایش پنە ئاما.