ڕاپیمای "چارەسەری دیموکراتیک و ئازادی" بە سەرمەشقایەتی پلاتفۆرمو ڕێکوزیا دیموکراتیکەکا جە چوارچێوەو هەڵمەتەو "ئازادی پەی عەبدوڵا ئۆجالانی، چارەسەری سیاسی پەی پرسو کوردی" جە ئامەدۆ بەرەو ئەنقەرە دەسش پنە کەرد، جە ڕۆو دووەمینە جە ڕەحا بەردەواما. بەشێوە جە ڕاپیماییکەرا دلێشانە هامسەرۆکا دەبەپەی چیدەم کلیچگون ئوچارە و کەسکین بایندەر، دماو ئەرەیاونای جە پارکو عەلی شەلی جە نووسینگەو یاسایی ڕحای، بەشێوەشا بەشدارێ گلێرۆبییەو گەلی جە مەنتیقەو خەلفەتی و پیرسوسی بیێ. ڕێکوزیا مەدەنییەکا و پارێزنەرا گەلی بەشدارێ گلێرۆبییەکەی بیێ.

"گۆشەگیری سەرچەمەو کێشەکان، پەنەوازا دەمودەس هۆرگیریۆنە"

هامسەرۆکو فیدراسیۆنو کۆمەڵەو یاسایی پەشتیوانی جە بنەیانەو زینانیا و حکومدریایا مەد (مەد تواد_فەد) کەرەم جان پۆڵاد واتش: "جە تورکیا و کوردەسانەنە گرد بوارێنە بە بنبەس یاوای هەن. مەڵامەتو گرد قەیرانێ، چارەسەرنەکەردەو پرسو کوردین. ئێژا ئۆجالان ٢٦ ساڵێن ئینا چێرو گۆشەگیرینە. دۆڵەت جە پرۆسەو چارەسەرینە بەڕێز ئۆجالانش پێسەو موخاتەبی قەبووڵ کەرد. ئاکاتە کەس گیانش جەدەسنەڎا. بەڵام دماو ئانەی پرۆسەکە دمایش ئاما. دۆڵەت گرد هێزێ وێش پەی جەنگی خەرج کەرد. هەرچنە زەڕی فرەش پەی جەنگی خەرج کەرد، قەیرانو ئابووری دەسش پنە کەرد، ئیسە پەی دمای ئاردەی ئی قەیرانا، پەنەوازا پرۆسێوە دەس پنە بکەرۆ".

چالاکوانو تەژەئا چاگلار دەمیرەل ئەرەیاوناش ئی ڕاپیمایە پەی ئازادی ڕابەر ئاپۆین، جەختش وست سەرو ئانەی ژەنی و زاڕۆڵێ قوربانی سەرەکی جەنگەکانێ، ژەنێ ئامانجی سەرەکی جیهادیستەکانێ، واتش: "وەرنیشت پەی جەهانی نموونەن، پەنەوازا ئی نموونە و ئیرادە پارێزیۆنە".

هامسەرۆکو گردی دەبەپەی، چیدەم کلیچگون ئوچارە جەختش وست سەرو پەشتیوانی دەسەڵاتی پەی چەتە جیهادیستەکا دژو وەرنیشتی، واتش: "گردما قەرزارو وەرنیشتینمێ. پۆکەی جە ئاستو جەهانینە بانگەواز پەی پارێزناو وەرنیشتی مکەرمێ".

"گرڏما وەربرسیارێنمێ پەی ئازادی ڕابەرئاپۆی''

ئوچارە جە درێژەو قسەکاشەنە واتش: "پەنەوازا ئێژا ئۆجالان ئازاد بۆنە. ئینە وەرپرسیارەتی گردیمانە. بانگەواز جە لایەنە کۆمەڵایەتییەکا و پەرلەمانی مکەرمێ کە وەرپرسیارەتی جەئەستۆ بگێرا پەی چارەسەرکەردەی ئی پەرسیە".

گلێرۆبییەکەی دوور جە چەمۍ میدیاکا بەردەوام بێ.