سەرمەشقا جمیەری شۆڕشگێڵنیی تورکیای دەنیز گەزمیش و یوسف ئاسڵان و حوسەین جە ٥٢ ەمین ساڵیادوو جە قەنارەدایشانە سەروو قەبرەکاشاوە جە قەبرسان و کارشیکای ئەنقەرەینە یادێ کریێوە، هامسەرۆکاو پارتوو یەکسانی و دیموکراسیی گەلا (دەم پارتی) تولای حاتەم ئۆغۆللاریە و تونجەر باقرخان و چندین ئەندامێ پارتە سیاسییەکا بەشدارێ یاڎەکەی بێنێ کە جە تەرەفوو ڕێکوزیا جەماوەرییە دیموکراتیکەکاوە ڕێکوزیابێ.

"ڕاما ڕۆشن مکەراوە"

تولای حاتەم ئۆغۆللاریە ئەرەیاۋناش دەنیز و حیکمەت و کایپاکایان و ماهیر و مەزڵوم و ساکینە و سێڤێ و سەرمەشقا تەری کۆشیایێ شۆڕشگێڵنی و سۆسیالیستیشا پەی جیائاستیمێ و ئێمەیچ بەشێوێ شایستە درێژە پی کۆشیایە مدەیمێ، واتش: "حەجگیز جە یادشا مەکەرمێ، بژیوۆ کۆشیای شۆڕشگێڵنیما، بژیوۆ کۆشیای ڕێکوزیایما، بژیوۆ کۆشیای وڵاتپارێزنیما".

تونجەر باقرخان بە کوردی و تورکی قسێش کەردێ و ئەرەیاوناش کۆشیای دەنیزی و هامڕاکاش جە چوار پارچەو کوردسانینە بەردەوام بۆ، واتش: "ئاڎێ کۆشیایما ڕۆشن مکەراوە و ڕاما پەی مکەراوە. بەڕێزۆ سڵامشا پەی کیانمێ. باوەڕ پانەی بکەردێ، تا یاوای بە ئەنجامێوە، کۆشیای بەردەواما. پێسە چنی جە مدرامانوو وانی، جە ئامەد و ئیستەنبوڵ و ئەزمیر، هامشێوەو کۆشیای کرێکارا، خاوەنداری جە ماف و یەکسانی و ئازادیی کریا. ئێمەیچ باوەڕما پانەی هەن کە چی کۆشیاینە سەرێگنمێ".