دەزگاو میتى تورکی جە میدیاکاو دەوڵەتوو تورکیوە هەواڵێوە چەواشەکارانەش وەڵا کەرڎەنۊ، کە ئاماژەش بە گەشمەرڎەکەرڎەی وەرپرسێو پەکەکەی کەرڎەن سلێمانىنە، وەلۍ ئاسایشوو سلێمانیی ئا هەواڵەیە ڕەت کەرۊوە و ماچۊ: چێوی چانە نەبییەن.
ئارۊ میدیاکاو سەر بە دەوڵەتوو ئەرەگیروو تورکی هەواڵێوە ساختەشا وەڵا کەرڎەنۆ کە یانی "وەرپەرسێوە پەکەکەی عێراقنە بە نامۍ جەلال کایای سلێمانىنە کریان ئامانج"، کە بە پاو هەواڵەکەی ئا کەسەنە کە دەسش بییەن جە کوشەنى عوسمان کۊسەینە وەرپرسوو میتی جە پانیشتوو کوردسانینە.
بە پاو شۊنیرەلوایەکاو ئاژانسوو ڕۊژنیوزی، دماو تیرۊرکەرڎەى حسێن ئاراسانی، کە مانگەی وەڵینە سلێمانىنە تیرۊر کریا و گەشمەرڎە بی، هیچ کەسێوە تەر، بە دەسوو میتی تورکی سلێمانینە تیرۊر نەکریان.
هەر سەروو ئا پرسۍ عەقید سەلام عەبدولخالق ڕاوەبەروو ئەرەیاونای دەزگاو ئاسایشوو هەرێمی بە ڕۊژنیوزیش واتەن: "ئێمە هیچ زانیاریێوە چانەما نەیاوان پەنە، پی زوانە سلێمانینە هیچی چانە نەقۊمیان، سەروو ئانەیجە شۊنی پەرسەکێرە ملمۍ."
وەڵاکەرڎەیۊ ئی هەواڵەیە ئینا وەختێوەنە، کە لاێوە تەوقەو دەوڵەتوو تورکی ئەرەگیری سەروو سلێمانیوە هەنە و گەشتەکێش ڕووەو فڕۊکەخانەو شارەکەیرە مردنێنۍ و چند ڕۊی ویەرڎەیچنە پەی شەش مانگا تەری گەمارۊکەش تازە کەرڎۊ، لاێوە تەریچۊ دەوڵەتى ئەرەگیروو تورکی دژوو سلێمانی جە میدیاکاو وەڵاتەکەیشۊ جەنگێوە دەروونى کەرۊ.
س.ز
