ڕۊو پەنج شەممەی ویەردەی جە شاروو کەرکوکی ژەنە شۆڕشگێڵنەو کوردی فریاڵ سلێمان-ە (زەلال زاگرۆس)ە کە جە ۋەرنیشتوو کوردسانیوە پەی ئەنجامدای چن دیڎارێوە و کەردەیۊسەروو رێکوزیاکا ژەنا سەردای ئا شارەیشە کەردەبۍ، تەقەش ۋنەکریا و گەشمەرڎۍ بیە، وەڵتەریچ سلێمانینە ئەندامەو ناوەنڎیی ژنۆلۆژی ناگیهان ئاکارسەلە بەهەمان شێوە تیرۆرە کریێبۍ، ئۆباڵوو هەردووە کردەوە تیرۆریستیەکەیچ وزیۆ ئەستۆو دەوڵەتوو تورکی و هامکارەکاش جە پانیشتوو کوردسانی.

جە ۋەران ۋەروو ئا تیرۆرانەی دژوو ژەنا شۆڕشگێڵنی ئینا ئارانە، چالاکا ژەنا باس چانەی کەرا، ئا کردەوۍ نەک سەردێشا مەکەراوە، بەڵکم زیاتەر هانیشا مڎا گوڕ بە کۊشیای بڎا.

یەریڤان محەمەڎە ئەندامەو ئەنجومەنوو نوێنەرایەتی پارتوو یۊبیەی دیموکراتیکی (پەیەدە) جە پانیشتوو کوردسانی، جە بارەو تیرۆرکەردەی ژەناوە ئا هەرمانێشە شەرمەزار کەردۍ و ئاماژەش پانەی کەرد، کە ئی تیرۆرکەردەیە تەنیا پۍ ژەنا سیاسی یان چالاکا نییا و چا بارۆ بە ئاژانسوو هەواڵوو فوراتیش وات:" مەترسی تیرۆری ئینا سەروو هەر ژەنێوە کە گەرەکش بۆ دەنگوو ۋێش هۊربڕۊ و ۋێش چنی ژەنای تەری بە ڕێکوستەی کەرۆ و ۋێش پەروەردە کەرۆ، جە ۋەران ۋەروو ئانەینە ئێمە داوا جە ژەنا کەرمۍ بیەی ۋێشا پېسە ژەنێوە بە ڕێکوستەی کەرا و پەروەردەو ۋێشا کەرا و ۋێشا بیاونا ئاستێوە کە بانۍ بە گلېرگێوە ئازاڎ، پېسە نمونەو ژەنا جەنگەوانی جە ۋەرنیشت، کە سیانزە ساڵێن سەرمەشقایەتی ئاخێزی کەرا، مشۊم هۊشما بۆ ئی مەترسی تیرۆرەیە تەنیا سەروو ژەنا ۋەرنیشتی نیا، بەڵکم سەروو ژەنا گرڎوو کوردسانیا."

تارا ڕەزا ئەندامەو دەسەو ڕاوەبەری تەڤگەری ئازاڎیی، جە بارەو تیرۆرکەردەی زەلال زاگرۆسێوە کە چالاکۍ سیاسیە بۍ، بە تەسەوروو ئاڎۍ هەر یاگێنە ژەنێوە ئازاڎە بۆ، ئانە دەسوو تیرۆریش پنە میاوۆ و چا ڕوانگەیچۆ بە ئاژانسوو هەواڵوو فوراتیش وات:" هەڤاڵ زەلالە کەیسەکەش هەم سیاسییا و هەم ۋەروو ئانەی تیرۆرەکریا کە کوردە بۍ، ئاڎە زانۍ کە پانیشتوو کوردسانی بیەن بە یاگۍ کۊکوشی ژەنا، حەرپۊکەی ئاما تا هێز و ئیراڎەو ژەنا ۋەرنیشتی فاڕۊوە پۍ ژەنا پانیشتوو کوردسانی، گەرەکش بۍ پەیوەندیێوە جە بەینوو ژەناو ۋەرنیشتی و  پانیشتینە وەشکەرۆ، بەڵام تیرۆرکەردەکەیش پەیامێوە بۍ کە دەوڵەتوو تورکی فاشیستی بە کوردا کەرکوکیش یاونا، کە شمە چنڎە کۊشیای کەردۍ، ئێمە تیرۆرتا کەرمۍ."

 حەرپاسە ئی تیرۆرەشە لکەدا بە تیرۆرکەردەی ساکینە جانسیزۍ و ناگیهان ئاکارسەلۍ و ئەڤین گۆییێوە  و ئەرەیاۋناش:" دوژمنوو ئێمە جە حەر یاگێنە ژەنێوە ئازاڎە بۆ تیرۆرەش کەرۆ،  بڕۊشەرە جە سروشت و خاکوو ۋێش، هەر وڵاتێوە ئەرەگیر کریۆ دوژمن دەس پۍ هێزوو ژەناش بەرۊ و گەرەکشا کەرۊش بە وەیوڵۍ دەسوو سەرمایەداری و بەکارش بارۆ و ژەنی ئازاڎەش پنە قبوڵ مەکریۆ."

حەرپاسە ئا تیرۆرێشە شەرمەزارکەردۍ، کە سەروو ژەنا ئازاڎیی هەنۍ جە کوردسان و باسش چانەی کەرڎ هەر چوارپارچەو کوردسانی یەک جەسەن و دڵنیاییش دا کە جە ۋەران ۋەروو تیرۆر و کوشتەی ژەنا ئازاڎینە، زیاتەر گوڕ بە کۊشیای مڎا و پەیوەسۍ با پا خەبات و کۊشیایەی کە جە ژەنا ئازاڎیوازیوە پێشا مەنەنۆ و هەمیشە وەردەوامۍ با سەروو رێبازەکەیشا.