شاندێوە ٣٩ کەسی کە جە چوارچێوەو هەڵمەتۆو 'گەرەکما دیدار چنی عەبدوڵا ئۆجالانی بکەر'و ئامې تورکیا، شاندەکە جە پەرلەمانتارا، نوویسەرا، ڕۆنامەوانا و پارێزنەرا پێکئامێبێنې، پارێزنەری ئیتالی فابیۆ مارسێل پەی ئاژانسو هەواڵو فوراتی (ANF) قسێش کەردې. مارسێل ئاماژەش پانەیە دا ماوەو ٣٣ ساڵان سەرحاڵو پرسو کوردیا و دەسنیشانش کەرڎ خاوەنداری گەلی فرە گرنگا پەی ئاشتیێوە یەکسانی.

'دەمێوەن سەرحاڵو پرسو کوردینا'

مارسیل دەسنیشانش کەرڎ جە کاتو ئەرەمەرزیای پارتو دیموکراسی (دەپ)یوە سەرحاڵو پرسو کوردینا و واتش، کاتێ لەیلا زانا، ئۆرهان دۆغان، ئەحمەد تورک و گرڎو ئا پەرلەمانتارا دەبەپەی کە پارێزبەندییشا سەر هۆرگیریا و جە دادگاو ئاسایشو دۆڵەتینە دادگای کریې ئامان تورکیا.

مارسێل ئاماژەش بە پیلانگێڵنی مېیاننەتەوەیی سەرو ڕابەر ئاپۆی کەرد و ئاماژەش پانەیە دا چا سەردەمەنە جەمې مەڵامەتۍ پاسشا بە ئیتالیای کەرد جە ڕاو دادگاو ڕۆمایۆ جە پنەدای مافو پەنابەری بە ڕابەر ئاپۆی پەشیمان بۆوە و واتش: "بێگومان ئی ئاژە جە ڕوو یاساییۆ و بەگوێرەو پیمەرو دیموکراسی یاگې قبوڵ کەردەی نییا."

'ویرۆکەو کۆنفیدارڵیزمو دیموکراتیک و ئۆجالانی فرە سەنگینا'

مارسێل ئاماژەش پانەیە دا کە ڕابەر ئاپۆ ویرۆکەی فرە سەنگینش خوڵقنان و واتش: "ویرۆکەو گلېرگەی دیموکراتیک و ئېژا ئۆجالانی ڕاو ڕزگاری ۋەرکۊتوو مېیامینیا جە قەیران و جەنگەکاش. سیستەمو کۆنفیدراڵیزمی دیموکراتیک پەی ۋەرکۊتوو مېیامینی و چڼین وڵاتې تەری مۆدێلێوەن قابیلو جابەجا کەردەیا."

'پەنەوازا مافەکې گەلو کوردی جە دەستوورەنە یاگەگیرې بکریا'

مارسێل دەسنیشانش کەرد 'بانگەوازو ئاشتی و دیموکراتیک'و ڕابەر ئاپۆی بانگەوازێوەن پەرە بە لوای ڕاوەو پرۆسەکەی مڎۊ و واتش: "جە کاتێنە باس جە چەکنیایرەی مکریۆ، ئانە متاویۆ پەرە بە پرۆسەکەی بڎریۆ و بەهێزتەر ڕاوەبەر بکریۆ.

مارسێل جەختش جە پەنەوازی ئازادی بەڎەنی ڕابەر ئاپۆی کەردۆ و واتش: "پەی ئانەی عەبدوڵا ئۆجالان بتاوۆ دەورو ۋێش گێڵنۆ، پەنەوازا ئازاد بۆ. هەرپاسە مافە بنەڕەتییەکاو گەلو کوردی جە دەستوورەنە یاگەگیر بکریا. ئینێچ هەنگامێوەنې پەنەوازا حکومەت جابەجاشا بکەرۆ."

'کۆمەڵایەتیبیەو مژارەکەی فرە گرنگا'

جە دمادماینە فابیۆ مارسێل جەختش جە گرنگی بەشداری و خاوەنداری گەلی جە پرۆسەکەنە کەردۆ پەی ڕەخسنای ئاشتیێوە یەکسانی و ئینەش وات: "کۆمەڵایەتیبیەو مژارەکەی فرە گرنگا. ئانې جەنگشا کەرەگا پەی پارېزنای بەرژوەندییەکا ۋێشانە، گەل جەنگش گەرەک نیا. چارەسەرکەردەی پرسو کوردی بەماناو دیموکراتیزبیەو گرڎ کەسێ مې. هەر پرۆسێوە گەل چنەش بەشدار بۆ، ئانە متاوۆ بە دیموکراتیزەبیەی ئەنجامگیر بۆ. ئی مژارە پەی گرڎ وڵاتێوە یەک چێوا. ئانەی چێنە گرنگا کۆمەڵایەتیبیەی پرۆسەکەیا."