سەرۆککۆماری وەڵینو فەرەنسای فرانسیس هۆڵاند ئەرەیاۋناش، کە هرووژمەکۍ سەرو ۋەرنیشتی مایۍ قبوڵکەردەی نییا و واتش، "نمەتاوو چەمۍ سەرو بەتەنیا جیائاستەی کوردارە قوجنو، ئاگاڎیی مڎەو. فەرەنسا و هامپەیمانی مېیاننەتەوەیی ناچارێنۍ کوردەکا جە سوریانە پارێزنا".
تا مۍ ناڕەزایی و کاروەدایەکۍ ۋەرا ۋەر بە هرووژمەکا دۆڵەتو تورکی و چەتەکاش پەی سەرو هەڕێمەکاو ۋێڕاوەبەری سەرنیشتی و ۋەرکۊتوو سوریای سەرو ئاستی مېیاننەتەوەیی زیاتەرۍ با. سەرۆککۆماری وەڵینو فەرەنسای فرانسیس هۆڵاند جە میانو بەرنامێوە فرانس ئینفۆینە هۊرسەنگنایش پەی ئاژەو سوریای و پێشئامایەکا ئا وڵاتیە کەرد و جە قسەکاشەنە ئاماژەش پانەی کەرڎ کە هرووژمەکۍ سەرو ۋەرنیشتی مایۍ قبوڵکەردەی نییەنۍ و ئەوروپا نمەبۆ چەمۍ ڕووەو ئا رووە دایانە قوجنۆ کە جە ناوچەکا ئیدارەو ۋێڕاوەبەرینە ئینۍ ئارانە.
'پەی پارێزنای کوردا گرڎ لێوە هوشیار مکەرووە'
نمەکریۆ هرووژم بکریۆ سەرو کوردا جە سوریانە. جە ئەرەکۊشای دژو داعشینە ئانەی جە سوریانە هامکارما بۍ کوردەکۍ بێنۍ. ئەر کوردەکۍ سوریای نەبیێنۍ، محاڵ بۍ داعش جە سوریانە هۆرکنیۆ. فەرەنسایچ پەشتیوانی تەمامش ۋنەکەردۍ. پېسە سەرۆککۆماری من نمەتاوو بە تەنیا جیائاستەی کوردا قبوڵ بکەر و چەمۍ سەرو ئانەیرە قوجنو. هەرپاسە کوردا سوریای ئیساتۍ بە هەزاران زینانیۍ داعشی ئینۍ چێرو دەسیشانە. ئەر ئانۍ ئازاڎۍ بکریا، دێر یا زوو ۋێشا مېیاونا بە خاکەکەیما".
'کورد دژو تیرۆری دەورێوە گرنگش گێڵنان'
سەرۆککۆماری وەڵینو فەرەنسای فرانسیس هۆڵاند پەی پارێزنای ئیدارەو ۋێڕاوەبەری سەرنیشتوو ۋەرکۊتوو سوریای بانگەوازێوەش ئەرەیاۋنا و واتش، "مشۆم رێز جە ۋێڕاوەبەری بگیریۆ. مەبەسم ئانەن کە کوردەکۍ جە سوریانە دەورێوە گرنگ گێڵنا. جە ئەرەکۊشای دژو تیرۆریزمینە دەوری گۆرەشا گێڵنا و هەڵای بەردەوامێنۍ جە جابەجێکەردەو ئا دەورەینە. بەڵام ئینە بە ماناو ئانەی نمۍ کە ئاڎۍ جە سوریانە بڕیارە. گەرەکما واچو کە مشۆم پێوەرە بژیۋا.
'مشۆم فەرەنسا و هامپەیمانی مېیاننەتەوەیی کوردەکا پارێزنا'
هەر پۊکەی مشۆم فەرەنسا ئاڎیشا پارێزنۆ. فەرەنسا و هامپەیمانی مېیاننەتەوەیی دژو تیرۆری مشۆم ئاڎیشا پارێزنا. نمەکریۆ ئۆروپا چەمۍ سەرو ئا ڕووەدایانە وزۆرە کە جە بەشێوە سوریاینە ئینۍ ئارانە. کاتێ جە ئەنجومەنو ئەوروپاینە هەرمانە کەرێنمۍ، تووشو فرەو کەسا بیا کە پەیلوایشا چامنە بۍ سوریا فرە دوورا و کاریگەری نمەکەرۆ سەرو کیشوەرو ئەوروپای. بەڵام هرووژمی تیرۆریستی یەخۍ ئێمەیچش گێرتۆ. سەرو ئاڎیشایچەرە ئاما. ۋەرو ئانەی مشۆم جە کاریگەری هرووژمەکا ئەوروپای سەرو خاکەکەیما بیاومێنە".
