فەرماندەیی یەپەگە و یەپەژەی بە ئەرەیاوناێوە، جوابوو پەیاموو شۊڕشگێڵناو میانماریشا داوە، کە دژوو هجوومەکاو دەوڵەتوو تورکی ئەرەگیری  پەی سەروو سەرنیشت و وەرکەوتوو سوریای پەشتیوانییشا جە شۊڕشوو سەرنیشت و وەرکەوتوو سووریای کەرڎەن.

ئەرەیاونای فەرماندەیی یەپەگە و یەپەژەی پێسنەنە:  

"ئێمە پا بڕوێوە، کە جە سەرمەشقبییەی  ئازادین ژنانە، بە برایەتی و یەکڕیزی گەلا، کریۊ گلێرگێوە ئازاد بنیات بنریۊ و جیهانێوە جوانتەر وەش کریۊ، پا ئیرادەوە ئێمە ئی کۊشیایە بە نامۍ گردوو ئینسانیەتیوە کەرمۍ و بە وەشحاڵی و ڕێزێوە دماییناماوە سڵامتا کەرمۍ وەنە.  

پارادایموو ڕابەر ئاپۊی جە شارستانیەتی دیموکراتیک و ڕێکوستەی و وێڕاوەبەرڎەیمانە، کە سەروو بنەماو ئیرادە و نوێنەرایەتیی هامبەشوو ڕەگەزەکان و دوور جە ئامرازەکاو دەسەڵاتی پێسە دەوڵەتین، سەروو بنەماو مۊدێلوو کۊنفیدراڵیزمی دیموکراتیکی، ساعیبوو هێزوو چارەسەروو گردوو کێشەکاو ئازادیی سەدەو ٢١ین و بۊ بە جواب. ئی دیایە تیشکە وزۊ سەروو پەیوەندیی دەسەڵاتوو بەینوو ئینسانی چەنی سروشت، ژەنی و پیای پێسە مشکیلێوە موینۊ و هێزوو چارەسەری بەکار مارۊ. سەروو ئی بنەمێوە، بە یاواینەی یەکسانی و هامسەنگی سروشتەنە، حەقیقەتوو ئازادی ژەنۍ و پیای گردوو سیاسەتە فاشیستی-دەوڵەتپەرس-دیکتاتۊر و ڕەگەزپەرسا، بێکاریگەر کەرۊ و پڕنۊش و پێسە چارەسەروو گەلاو جیهانی فاڕیۊ پەی دۊخێوە گونجیای پەی ژیوای. کۊشیایما پەشتی پا پرەنسیپا بەسۊ.  

سەروو ئی بنەمێوە ماناو کۊشیای هامبەشیما چەنی شمە جە گرد چێوۍ گرنگتەرەنە. بۊنەو کۊشیایی بەنرخوو ئێمەوە دەوڵەتی فاشیستوو تورکی هجوومی ناڕەوا دژوو ئێمە کەرۊ و وەڵاتاو جیهانی گردوو ئی هجووما مەوینا. پەوکای ئێمە بەتندی سیاسەتوو زلهێزە هەژموونوازەکا، کە دەوڵەتوو تورکی پێسە دارێوە دژوو ئێمە بەکار مارا ڕەت کەرمێوە. ئێمە پەیامەکەتا، کە هامبەشوو ئازارەکامانە و پەشتگیریجە مدرامانیما کەرۊ بەرز مرمانمێش.  هەڵوێستی یۊگێرتانەتا ورەما مدۊ پەنە و سپاستا کەرمۍ.

ئا قەیرانە، کە سیستموو دەوڵەتپارێزن-دەسەڵاتداریی دلیشنە مژیۊ، ڕوانە کێشەکا گەورەتەر کەرۊ. هەمان دەسەڵاتدارۍ به شێوەێوە فاشیستی و دڕندانه هجووم کەرا. تا گەل وەهاروو ئازادیی چا دۊخەنە زیندە نەکەرۊوە.  فرە بە فاشیستییانە و دڕندانە هجووم کەرا. چی واقیعەنە دژ بە گەلی و ژەنا و کەمینەکا و شوناسە کولتوورییەکا، جە بواری سەربازی و بواری ئایدیۊلۊژی-سیاسی-کۊمەڵایەتیینە، هجوومی کۊکوشی و ئەرەگیرکاری کەرا و پێسە هەوڵۍ مدا وەڵۍ جە کۊشیای ئازادیی گێرا. پی بۊنەوە، خاکوو گەلە ئەرەگیریایا واوەی کەراوە بە هەرێموو جەنگی. پێسە وەرڎەموو گەشەکرڎەی دیموکراتیکینە قۊرتۍ وەشکەرا و هەم ئی بوارا پێسە ئامرازێوە سازانی پەی دەوڵەتە باڵادەسەکا پەی ڕێکوستەی پەیوەندییەکاشا بەکار مارا. شکۊمەندیی کۊشیای ئازادی، کە ماوەو ٥٠ ساڵان بە ڕابەرایەتیی ڕابەر ئاپۊی هەن و چەنی شۊڕشوو وەرنیشتی بە سەرمەشقیی ژەنا، شۊڕشوو دێموکراتیکوو گەلان فرسەتوو پێناسەکەرڎەیی وێش بە شێوێوە وەرەچەم بەدەس ئارڎەن. ئندەو کۊشیای ئێمە کە دژوو داعشی لوان ڕاوە، ئێمە ناکۊکیی نەتەوەپەرەسی گەلاو هەرێمەکەی، کە بییەن بایسوو جەنگوو دلۍ گێرت. پێسە ئێمە پێوە ژیوای گەلامان ورچنیەن، کە بە 'نەتەوەی دیموکراتیک' پێناسەش کەرمۍ، هەنگامەکاو یاگەدارکەرڎەی ئی مۊدێلە کیانیایە. هێزوو هەژموونوو سەرمایەداری و دەوڵەتە هەرێمییەکا، کە دژایەتیی شۊڕشەکەیمانۍ، بێمرڎای هجوومی کۊکوشی دژوو گەلوو کوردی کەرا. بۊنەو ڕێبازوو ئایدیۊلۊژی و مۊدێلوو ئێمەوە، کە تواناو چارەسەرکەرڎەی گردوو کێشەکاش هەن، سەرجەموو هێزە هەژموونییەکاش تەرسنۍ، هەرپاسە بۊنەو نکۊڵیکەرڎەی جە شناسنامەی نەتەوەیی، وەروو چەماو جیهانیوە ڕووبەڕووۍ هجوومی چانەیە بیمێوە.  

شمەیچ پێسە گەلوو میانماری شناسنامە و کولتوورۍ فرەتا هەنۍ، فرە دینامیکی دیموکراسیۍ قەوەتێتا هەنۍ وەروو ئینەیە بە شێوەکاو جونتای فاشیستی، سەروزی هەوڵۍ کۊنترۊڵکەرڎەی و چەوسنایۊتا مدریۊ. چونکوم شمە داراو ئەنەیاوای شۊڕشگێڵنانەیندۍ، چونکوم فرسەت هەن پەی وەڵاکەرڎەیوە ئازادی و دیموکراسی سەرانسەروو هەرێمەکەی و جیهانینە، پی شێوازە هجوومکەرڎەیانا هەوڵۍ مدا وەرڎەمتا گێرا. ئێمە بەوردی کۊشیایتا موینمۍ وەراوەروو ستەمی و جەنگی گڵیاو و هجوومی ناڕەواینە لاو ئیدارەو جونتای فاشیستیوە دژوو گەلەکەیتا، پەوکای بێدەنگیی جیهانی وەراوەروو ئا هجوومانە شەرمەزار کەرمۍ. کە متاودۍ بە شێوازوو 'وێپارێزنای' وەرگێری جە وێتا کەرڎۍ. بەزوویی وێتا ڕێکۍ وزدۍ و هاگاتا مافوو وێتا بۊ. بۊنەو کەمیی فرسەتەکاوە،  خێرامای جە هەڵوێستی فیداکارانەیتا کەرمۍ. شناسنامەی فرەنەتەوە و دەوڵەمەندتا ئی ڕاسییەشە کە چەنی وێش ئارڎەنش بۊ بە نموونەو یۊگێرتەیی گەلا پەی ئازادی پەی گردوو هەرێمەکەی و جیهانیچ.  کە گلێرگەکەتا وێش تایبەتمەندیێوە قەوەتش چی بوارەنە هەن. بەتایبەت چەنی ڕێبازوو 'نەتەوەی دیموکراتیک'ی متاودۍ ساعیبوو شناسنامەو وێتا بیدۍ و هەم وێتا پێسە کۊبییەیوێوە هامبەشی بشناسندۍ. پی ئەنەیاوایۊوە و بە قوەو ئازادیوازی و بە کۊشیاێوە  بەرزۊ دژوو سیاسەتەکاو هێزە هەژموونوازەکا و ئیدارەو جونتای فاشیستی مرددێوە.  

ئێمە ئازادیی ژەنۍ پێسە جەوهەروو گلێرگەی مشناسمۍ. پی مانۍ بە شێوێوە ستراتیژی نزیکۍ بیمێوە. ئێمە پێسە یەپەگە-یەپەژەی سوپێوەما هەنە، کە سەروو ئی بنەمۍ ئەرەمەرزیێنە. پەیامەکەتانە سەرنجتا وستێنە سەروو گرنگیی ڕێکوستەی ژەنا دلۍ سوپێنە، هەرپاسە جە کۊشیای شمەنە هێزوو ژەنا بەشداریێوە گرنگش هەن، ئینە پەی ئێمە فرە بەنرخا. ئێمە لاماوە چانەن، ئازادیی ژەنۍ متاوۊ گلێرگەی ئازاد کەرۊ و ناکۊکیی جێندەری چارەسەر کەرۊ، سەروو ئی بنەمێوە سڵام وەنەو هامڕا ژەنا کەرمۍ. ئێمە دڵنیێنمۍ کە ئا کۊشیایە سەروو بنەماو ڕاو ئازادیی ژەنا ئەرەمەرزیان، بەدڵنیاییوە سەر گنۊ و هێزوو ڕزگاریی گلێرگەیشا هەن. ڕێکوستەی و فەلسەفەو ژەنۍ ئازادۍ نوێنەروو ویژدانی، مدرامانی و ئیرادەو گلێرگەی کەرۊ. سەروو ئی بنەمێوە دڵنیێنمۍ، کە شمەیچ بە سەرکەوتەیی ژیواێوە شکۊمەندانە جە دۊزی ڕەواو وێتانە بنیات منیەیدۍ.

پی هەست و ویرۊکەرڎەیوە ئێمە مدرامانوو شمە موینمۍ و ئندەو یۊگێرتەیما چەنیتا، متاومۍ هامکاری وپەشتیوانیی پەنەوازتا پێشکەش کەرمۍ چا بوارانە کە با خاسش مزاندۍ. ئێمە پیسە هێزوو پارێزنای، بە ستراتیجوو 'جەنگوو گەلی شۊڕشگێڵنی' هێزوو کۊشیای گەلی ڕێک وزمۍ، بە شارەزایی تاکتیکی بە گرد نۊعێوە تەکنیکوو دوژمنی پووچەڵ کەرمێوە، بنەڕەتنە بە باوەڕیما بە ئازادی، بە ئیرادێوە قەوەتۊ تا ئاخر گژیەیمۍ و قەت نمەیمۍ دما و نرخەکاو ئازادیی کە پێوە نوێنەرایەتییشا کەرمۍ پارێزنمێشا. تا ئی شۊڕشە بکریۊ بە شۊڕشێوە هەرێمی و جیهانی، تا ئاخر کۊشیەیمۍ  و بەدڵنیاییوە سەرۍ گنمۍ. بە شانازی و ئیرادەوە سڵامتا وەنە کەرمۍ و باوەڕما پاسەن ڕژێمی جونتای و هەر سیستمێوە کی دیکتاتۊری دلێنە بەردی. هومێدوو سەرکەوتی پەی کۊشیایتا موازمۍ و ڕێزوو وێماتا پێشکەش کەرمۍ."