تا مۍ ئاستەنگی و فشارەکۍ سوپاو عێراقی سەرو کامپو مەخمووری زیاتەرۍ با، سوپاو عێراقی ڕاش جە ئاژەڵدارا گێرت کە ئاڵفو ئاژەڵەکاشا گلېربکەراوە، دماو فشارکەردەی شناسنامە جە هیتیارا هۊرگیریان.
فشار و ئاستەنگییەکۍ حکومەتو عێراقی سەرو کامپو پەنابەرا گەشمەرڎە ڕۆستەم جوودی (مەخموور)ی تا مۍ زیاتەر بۆ، بەپاو هەواڵێوە ڕۆژنیوزی جە سنوورەکەنە، سەرسەعبو ئارۊی کاتێ ئاژەڵدارا گەرەکشا بیەن پوش و ئاڵف پەی ئاژەڵەکاشا گلېربکەراوە، هێزێوە سوپاو عێراقی بە ترۊمبێلی زرێپۆشۆ هۊرشا کوان سەرشا و ڕاشا ۋنە گێرتۍ، هەرپاسە شناسنامەشا جە ئاژەڵدارایچ هۊرگېرتەن.
ئینەیچ جە کاتێنە، جە ١٠و نیسانیوە تەوقۍ قورسە جە لایەنو عێراقیوە سەرو کامپو پەنابەرا گەشمەرڎە ڕۆستەم جوودی (مەخموور)ی ملۊڕاوە، سەبارەت پا تەوقێچە، شاندێوە جە ڕاوەبەرا کامپەکەی پەی چارەسەرکەردەی کێشەکا کامپەکەی جە ١٤و ئایاری سەرشا ۋنەو بەغڎای دا و چنی خالید شوانی، وەزیرو دادو عێراق گلېرۍ بیێوە، دماو گلېرۊبیەکەیشا جە گێڵایۊیشانە پەی مەخمووری، ئا شاندە جە لایەنو سوپاو عێراقیوە باڵبەسۍ کریۍ.
سەرەڕاو قەولەکا ۋەرپەرسا عێراقی، تا ئیساتۍ شاندەکەو کامپەکەی ئازاڎۍ نەکریێنۍ، عێراق ڕا بە نەوەشەکا نمەڎۆ پەی هۊرگېرتەی چارەسەری پزیشکی جە کامپەکەنە بلا جبەر، نمازۆ کرێکارۍ بلانە سەرو هەرمانۍ و کەرەسەو ئاواڎانکەردەیۆ و بیناسازیی بلۊ دلۍ کامپەکەیۆ.
