گروپێوە جە ڕۊشنویرا، ڕۊنامەنوویسا، نویسەرا، هونەرمەڼا و ڕامیاریمەدارا ئێراقی بە مەرامو ئازادی رابەر ئاپۆی دەسوەڵې وستەیۍ پەی وەڵاکەردەیۆ فکر و فەلسەفە و داواکاری ئازادی جەسەیی رابەر ئاپۆی ئەرەیاۋېیا. ئەرەیاۋناکەو دەسوەڵې وستەکەی پی جۊرەنە:

"عەبدوڵا ئۆجالان نەک تەنیا پەی کوردی، پەی ئازادی و واڵە و برایەتی گەلا جە ۋەرکۊتوو مېیامینینە ئەوەکۊشای مکەرۆ. هەرپاسە پەی مافەکا ژەنا ئەوەکۊشای مکەرۊ. ئێمەیچ پەی ئازادی ڕابەر عەبدوڵا ئۆجالانی هەڵمەتێوەما ئەرەیاۋنا. جە ڕاو چالاکییەکا کەلتوور و فکری پەی ئشناسای و وەڵاکەردەیۆ فکرو ئۆجالانی ئەوەکۊشای ڕاوەبەر مکەرمۍ و داواو ئازادی جەسەیی ئاڎیی مکەرمۍ. ئۆجالان پەی دۆزو گەلەکەیش ڕەنجێوە گۊرەش دا و پەی مرۆڤایەتیی کە دۆزو ئازادی و ڕزگاری جە دەسو ناهەقی و زوڵمی ئەوەکۊشای فرەش کەرڎەن و هەمیشە پەی سەرکۊتەی ئەوەکۊشۆ.

٢٦ ساڵێن ئینا زیینانێوە نامرۆڤانەنە. کاتێوە فرەن جە جەهانی، گەلەکەیش و گەلا ۋەرکۊتوو مېیامینی دوورا و زیاتەر جە ٣٠ ساڵان پەی ئازادی ئەوەکۊشۆ. فکرو عەبدوڵا ئۆجالانی بە ئەوەکۊشای لایەنگر و کادرەکاش دلۍ گەلەکەیش و گەلا ئازادی جەهانی، جە مېڎانی مېیاننەتەوەیینە دەنگش دانۆ و ڕاگیری جە ئەرەگیرا مکەرا. تەنانەت ئانێچ کە زینانیشا کەرد گفتوگۆش چنی مکەرا. عەبدوڵا ئۆجالان نە نەتەوەپەرسێوە شۆڤێنی کۆنەپەرسا، نە تنڕەوێێوە ئایینیا، چەپێوە دادپەروەر بۍ.

گروپێوە جە ڕۊشنویرا، ڕۊنامەنوویسۍ، نویسەرۍ، هونەرمەڼۍ و ڕامیاریمەداراێنمۍ کە وەرگری جە ئازادی و یەکسانی گلېرگەی مکەرمۍ، 'دەسوەڵێوستەی ئێراقی پەی ئازادی ئۆجالانی' ئەرەیاۋنمۍ کە پەی ئشناسای و وەڵاکەردەیۆ فکرو ئۆجالانی ئەوەکۊشای مکەرمۍ.

کات کاتو ئانەینە کە گرڎو جەهانی چنی ئی فەیلەسوفەیە و سەرۆکە سیاسیی و زینانییە کە ئازادیش گەرەکا و ئەوەکۊشایش پەی مکەرۆ، پېسە مافێوە پیرۆزو گرڎو گەلا، جە گرڎو گلێرگەکانە بە ئازادی و دیموکراسی ۋێشا یۆگێرا. کاتو ئانەی ئامان کە ئی فەیلەسوفە گۊرە و گەلەکەش ئازاڎ بژیوا".