ساڵیحە ئایدەنیزە، پەرلەمانتارەو دەم پارتی، جە دیڎارێنە چنی ئاژانسوو فوراتی زەرەرەکۍ هامکاریی بەینو پەدەکەی و ئاکەپەیش جە کورڎەسانەنە هۊرسەنگنۍ و ئەرەیاۋناش دژو گەلوو کورڎی پانیشتەنە بەدەسو پەدەکەی و سەرنیشتیچەنە بەدەسو ئاکەپەی سیاسەتو جەنگی گڵیاوی ملۆڕاوە.

ساڵیحە ئایدەنیزە ئاماژەش پانەیە کەرڎ، جەنگی جەهانی یەرەم ئینا ئارانە، ۋەرکۊتوو مېیامینیچ بییەن بە مېیانو ئی جەنگیە و واتش: "جە ساڵەو ٢٠١١یۆ مڎرامانوو گەلوو کوردی جە ۋەرکۊتوو مېیامینینە، پېسە هیواو چارەسەری و ئاشتیی ئینا وەڵێنە. بەڵام چی پرۆسەنە حکومەتوو ئاکەپە-مەهەپەی هەوڵشدان بە سیاسەتە جەنگەرانەکاش ئی مڎرامانیە دلێنەبەرۆ."

پەدەکە دەسکۆتەکۍ پانیشتیش وستێنۍ مەترسیۆ

ساڵیحە ئایدەنیزە ئەرەیاۋناش؛ مەرامی سەرەکی ئی سیاسەتا ۋەرفراوانکەرڎةی سنوورو "میساقی میللی"ن، پی سیاسەتەیە گەرەکشانە دەسکۆتەکا گەلوو کوردی جە تەماموو کورڎةسانینە دلێنە بڎا. جە چوارچێوەو ئا پلاناو سەرو پانیشتی، قەیرانەو ڕاوەبەردەیشا کەرکووکەنە وەشکەرڎ، دماتەر هەوڵدریا هۊرچنیەی دماوزا، هەرپاسە جە ئاکاموو هرووژمەکا ٢-٣ ساڵی ۋییەرڎەینە، کوردێوە فرۍ پانیشتەنە گەشمەرڎۍ کریۍ، چی مېیانەنە پەدەکە جە گرڎ ڕوانگێوە هامکاری سوپاو تورکیش کەرڎەن، داخەم نمەشۆ پەدەکە لاشۆ گرنگ نییا کە ئی هامکاری و سیاسەتۍ زەرەر بە دەسکۊتەکا گەلوو کوردی میاونا، پی جۆرە دەسکۆتەکا پانیشتی وزۆ مەترسیۆ."

ساڵیحە جە مېیانو قسەکاشەنە واتش: "چارەنوویسو پانیشتی و ۋەرنیشتی پێوەرە لکەدریان. هەرپاسە شەرتەو بیەی و مەنەیۆ گەلوو کوردی جە سەرنیشت، پانیشت، ۋەرکۊت و ۋەرنیشت پێوەرە هۊرمسەنگیا. پۊکەی سیاسەتەکۍ پەدەکەی جە درێژمەودانە ئەنجامی خراپشا چنە گنۆوە. ڕا بە وەشکەرڎةی زیاتەر جە ١٠٠ بنکا سەروازی جە پانیشتەنە و مۆرکەردەی ڕێککۆتەیە بازرگانییەکا تەنیا جە مەسڵەحەتوو ۋێشەنە زەرەرۍ گۆرەش ۋنە گنۆوە و دەسکۊتەکا کوردی جە پانیشتەنە وزۆ مەترسیوە و جە لێوەتەرۆ ڕا جە یۆبیەی نەتەوەیی کوردا مگێرۆ.

مسڵەحەتە مېیاننەتەوەییکۍ

ساڵیحە ئایدەنیزە ئاماژەش بە کوشتەی خەڵکی مەدەنی کەرڎ بەمەڵامەتوو هرووژمەکا جە پانیشتەنە و واتش ؛ بە چۆڵکەردەی دەگایەکا و تاڵانکەردەی سروشتو ناوچەکا، مەترسی دلێنەشیەی کولتوورو کوردی هەن و چا پڕۆسەنە ئەرەگیری ملۆڕاوە. پەدەکە بە هامکارییەکاش خزمەتو ئی جەنگی و کاولکاریە مکەرۆ. پەنەوازا گەل هێز و لایەنە سیاسییەکۍ کورڎەسانی مسڵەحەتی نەتەوەیی و دەسکۆتەکا گەلوو کوردی پەی ۋێشا بە بنەما بگێرا سەرو ئی بنەمایۍ خاوەن هەڵوێسۍ با

ئا پەرلەمانتارۍ دەم پارتیە ئاماژەش بە فشارەکا حکومەتوو ئاکەپە-مەهەپەی سەرو شناسنامە و زۋانی و کلتوورو گەلوو کوردی کەرد و واتش: "سیاسەتو پەرەپنەدای بە جەنگی جە ۋەرنیشتوو پانیشتەنە، دۆسیەکاو تاوانبارکەرڎەی سیاسەتمەدارا، فشارەکا سەرو جمیەرو ژەنا و گێرتەی جە سەرنیشتەنە  جە ۋێشەنە نیشانۍ جەنگی تایبەتینۍ دژو ژەنا و جوانا کوردی جە پانیشتوو ۋەرنیشتەنە درێژەش هەن، هەرپاسە تاڵانکاریی و بڕفانای جە سەرێکانی، گرێ سپی و عەفرینەنە پەی فاڕای دیمۆگرافیاو ناوچەکەی جە هەمان چوارچێوەنە ملۆڕاوە.

ڕژێموو گۆشەگیری

ساڵیحە ئایدەنیزە سەرو مەسەلۍ گۆشەگیری ئەرەیاۋناش؛ هامکات چنی تاڵانکەرڎەی سروشتی و هرووژمە سیاسی و سیاسەتە جەنگەرانەکا، حکومەتو ئاکەپە-مەهەپەیچ هرووژمی کولتووریش دەس پنەکەرڎەن و واتش: "ئا قسۍ کە ماچا ئاکەپە کولتوور و زۋانی کوردی بە ڕسمە مکەرۆ ، دوورێنۍ جە حەقەتینیۆ. گەرەکشانە کێشەو کوردی بە سیاسەتو جەنگی و گۆشەگیری چارەسەر نەکەرا و درێژە بە دەسەڵاتی و مەنەیۆیشا بڎا. تورکیا بە مەڵامەتوو سیاسەتو چارەسەرنەکەردەی کێشەو کوردی و بنیاڎنیای فاشیزمی و گۆشەگیرییوە بەرەو قەیرانێوە کۆمەڵایەتی، سیاسی و ئابووری لووان.

گۆشەگیری بیەن بە گۆرەتەرین کۆسپ ۋەردەمو چارەسەری سیاسی و ئاشتیانەو کێشەو کوردینە

ساڵیحە ئایدنیزە جە دمادمایی قسەکاشەنە واتش: " ئیمرالینە گۆشەگیری سەرو بەڕێز عەبدوڵا ئۆجالانیرە مسەپیۆ و کە مەبەس چنەش ڕاگێرتەین جە پرۆسەو دیپلۆماسی جە چارەسەری ئاشتیانەو کێشەو کوردینە.

گۆشەگیری تەنیا پاشێلکەردەی مافی کەسیی بەڕێز ئۆجالانی نییا، بەڵکم هرووژمێوە سیستماتیکا پەی سەرو مافو گلێرگەو کوردی. پۊکەی پەنەوازا داواو ماڕای و هۊرگێرتەی گۆشەگیری و ئازادی جەستەیی بەڕێز ئۆجالانی بۆ بە بنەماو ئەرەکۊشای سیاسی گەلوو کوردی. ۋەرو ئانەی گۆشەگیریی دژو داواکارییەکا زۋان، کولتوور، سروشت، جوانا و ژەنان و پېسەنە کۊسپێوە ۋەردەمو داواو ڕەواو ئازادینە. بە ماڕای گۆشەگیری ئەرەکۊشای گەلوو کوردی قەوەتتەر و کاریگەرتەر مەبۆ. پۊکەی پەی ژیۋایۍ ئازاڎی مشۆم هۊرگێرتەی گۆشەگیری بۆ بە خاڵەی هامبەشەو هێزە دیموکراتیکەکا و گەلا تورکیای و کورڎەسانی. هەرپاسە بۆ بە ناوەندو ئەرەکۊشای دیمۆکراتیکی پەی گرڎ کەسۍ. پۊکەی هامکاری و پەشتیوانیەکۍ ئڼەو دلێینەی پەنەوازا جە ئاستی مېیاننەتەوەیچەنە بەرەو وەڵۍ بلۆ."