گەشمەرڎە ڤیانە بە سەرمەشقایەتی تەڤگەروو ژەنا ئازاڎیی کوردسانی (ڕژاک) سەروو قەبرەکێشۆ جە قەبرسانوو سەیوانوو شاروو سلێمانینە یاڎش کریاوە، هاموڵاتیا و بنەیانەو گەشمەرڎە ڤیانۍ و هەڤاڵا کۊشیاو گەشمەرڎۍ بەشدارۍ بێنۍ. 

سەرەتا گوڵۍ سەروو قەبرەو گەشمەرڎە ڤیانێوە نریێرە، جە کەسایەتی گەشمەرڎە ڤیانێنە تەماموو گەشمەرڎا کۊشیای ئازاڎیی کوردسانی یاڎشا کریاوە.

بە نامۍ ڕژاکیۆ، ڕوناک مەجیڎە، واتش: "ئارۆ ١٨ ساڵۍ ویەرۆ سەروو چالاکیە گیانبازییەکەو گەشمەرڎە ڤیانێرە، ئا چالاکییە جە وەڕسیی و بۍ تاقەتینە نەبۍ، بەڵکم پا چالاکییە ۋەرگرییش جە قەزیەو ژەنۍ کەرد، شاروو سلێمانی و کوردسانش بە ئاگا ئارد دژوو زوڵمی و ئەرەگیری."

حەرپاسە واتش: " گەشمەرڎە ڤیانە، بە فکرێوە قوڵ و تازۆ، چێگۆ هەنگام بە هەنگام قوڵە بۊوە جە پرسەکا گلێرگەی، چا قوڵبیەیۆ ۋێشەنە پەیوەسە بۆ بە ڕیزەکا گەریلایۆ، چنڎین پەروەردۍ فکریی موینۆ و هەتا میاوۆ پا ئاستەی کە چالاکی گیانبازیی ئەنجام بڎۆ، دژ پا پیلانگێڵنییە چەپەڵەو سەروو ڕابەر ئاپۆی بۆنە بە جوابێوە، پۊکەی ئێمەیچ وەعد مڎەیمۍ ڕاو ڕێبازوو گەشمەرڎە ڤیانۍ بەردەوامیی پنەبڎەیمۍ."

حەرپاسە ئەرەیاۋناش ڤیان جافە، پۍ شەرمەزارکەردەی پیلانگێڵنیی میان نەتەوەیی دژوو ڕابەروو گەلوو کوردی عەبدوڵا ئۆجالانی، جە ٢ۍ شوباتوو ٢٠٠٦ینە، چالاکیێوە فیڎاکاریش ئەنجامدا و گەشمەرڎۍ بیە.

گەشمەرڎۍ لەیلا والی حسێن ئشناسیۍ بە (ڤیان جافۍ یان ڤیان سۆران)ی، ساڵەو ١٩٨١ی سلێمانینە جە ئەڎۍ بیێنە، ساڵەو ١٩٩٧ بەشدارەو ڕیزەکا دلۍ گەریلاکا ئازاڎیی کوردسانی بۆ، حەر جە زارۆڵەیۆ فامش بە زوڵمی و ستەموو سیستمیی کۆمەڵایەتیی کەرد و پنەش هەزم نەکریۍ، حەرپۊکەی هەمیشە ڕووبەڕوو ئا ئەقڵییەتە کۆنەپارێزەیە بیێنۆ، کە ژەنیش بێ ئیراڎە کەردێنە.

جە شەوەو یۆ سەروو ٢ۍ شووباتوو ساڵەو ٢٠٠٦، جە دژوو پیلانگێڵنییی میان نەتەوەیی دژوو ڕابەروو گەلوو کوردی عەبدوڵا ئۆجالانی، جە مەنتیقەو حەفتانینینە جە چالاکیێوە فیداکارینە ئاێر وەرمڎۊنە جەسڎەیش و گەشمەرڎۍ بۆ.