ڕۆنامەوانا ئەرەیاۋنای ئازادی ناڕەزایشا دژ بە تیرۆرکەردەی هەردووە ڕۆنامەوان جیهان بیلگینۍ و نازم داشتانی نیشانەدا و واتشا: "درێژە مڎەیمۍ بە ئەرەکۊشای ئەرەیاۋنای ئازادی."
ڕۆنامەوانا ئەرەیاۋنای ئازادی جیهان بیلگینە و نازم داشتان کە بە شۆنیرەلوای ڕۆنامەوانی پەی هرووژمەکا دۆڵەتو تورکی و چەتەکاش پەی سەرو بەنداوو تشرینی و سردەو قەرەقۆزاقی کەرێنۍ. جە کاتو ئاماڎەکەردەی مژارو ڕۆنامەوانینە جە ١٩و کانوونو یووەمینە بیۍ بە مەرامو فرۆکەی بێفڕۆکەوانو دۆڵەتو تورکی ئەرەگیری و گەشمەرڎۍ بیۍ. هەمڕایا هەردووە ڕۆنامەوانا ناڕەزایشا جە ۋەرا ۋەرو ئا کردەوە تیرۆرکارییەو دۆڵەتو تورکینە نیشانەدا و جەختشا چانەی کەرڎۆ حەجگیز بێدەنگۍ نمەبا و بەردەوامۍ با جە هەرمانەو رۆنامەوانی ۋێشا.
'سەرمەشقۍ کاتە سەختەکا بێنۍ'
واتەواچەو یۆبیەی ئەرەیاۋنای ژەنۍ (یەرەژە) ئارین سوێدە: جە سەختتەرین کاتەکانە جیهانە و نازم جە بەرەو ئەرەکۊشاینە بێنۍ. سەرمەشقۍ کاتە سەختەکا بێنۍ و وەحشیەتو هرووژمەکا دەوڵەتو تورکی و مڎرامانو جەنگەوانا یاونێنۍ بە جەهانی. پەی نیشاندای کۆمکوژییەکا گیانو ۋێشا فیدا کەرد. پەی ئانەی لایەق بە ئەرەکۊشای هەردووە هامڕایاما بیمۍ مشۆم ئەرەیاۋنای ئازاد وەرفراوان بکەرمۍ. ئینە ئەرک و ۋەرپرسیاری ئێمەن. ئاڵاو حەقیقەتیشا بەرزتەر مکەرمێوە. گەشمەرڎە بیەیشا مەبۆ بە قەولو حەقکەردەیۆیما.
'سەرەمڕە دژوارتەرین کاتەکا جە ئەستۆ گێرێنۍ'
ڕۆنامەوان زنار جافەر: جە هەرێمەکەنە تاوانەو جەنگی ئەنجام مڎریۆ. دۆڵەتو تورکی هرووژمش کەرڎ سەرو هەردووە ڕۆنامەوانا کە هرووژمە وەحشیانەکا فاڕێنێوە پەی بۆ ڕای جەهانی و درووەکاشا ئاشکرا کەرێنۍ. هەردووە هەمڕاما پەی ئانەی ڕەنجێوە فرەشا دا. مەرامی بنەڕەتیشا ئاشکراکەردەی حەقیقەتی بۍ پەی ئانەیچ گیانو ۋێشا بەخشا. بە کامێراکاشاوە جە دژو هرووژمەکا مردێوە و بیۍ بە دەنگو حەقیقەتو هەرێمەکەی. جە ئاژێوە سەختو جەنگینە ئەرکو ڕۆنامەوانی ئازادی ئاسان نییا. ۋەرو ئانەی ڕووەی حەقەتینەو دۆڵەتو تورکی هۆرماڵێنۍ بیۍ بە مەرامو هرووژمەکا.
'دۆڵەتو تورکی جە ئەرەیاۋنای ئازادی تەرسۆ'
ئەندامو دەسەو ڕاوەبەری یۆبیەی ئەرەیاۋنای ئازادی (یەرەئا) ئەڤین ئیبراهیم: دۆڵەتو تورکی چڼین جارۍ هرووژمش کەرڎەن سەرو ڕۆنامەوانا ئەرەیاۋنای ئازادی. تەنیا مەرامو هەمڕایاما بیەی بە نوێنەرو دەنگو گەلین. چی هرووژماوە جارێوە تەر ڕۆشنبیۆ دۆڵەتو تورکی جە ئەرەیاۋنای ئازادی تەرسۆنە و پېسە هەڕەشێوە سەرو ۋێش موینۆش. هەمڕایاما جە بەرەو تشرینی و قەرەقۆزاقی مڎرامانی ڕۆنامەوانی کەرێنۍ و سات بە ساتو هرووژمەکا فاڕێنێوە. جەخت مکەرمێوە چانەی دۆڵەتو تورکی پی هەرمانێشە نمەیاوۆ بە مەرامو ۋێش کە ویستو کپکەردەی دەنگی ئازادین، جوابەکێما جە ۋەرا ۋەرو هرووژمەکانە بەهێزتەرۍ با.
'بیۍ بە دەنگو پارادایمو نەتەوەی دیموکراتیکی'
پەیامکیانو ئاژانسوو هەواڵوو هاواری (ئانها) ڕێناس ڕەمۆ: ئینە یووەم هرووژمو دۆڵەتو تورکی نییا سەرو ڕۆنامەواناو سەرنیشتوو ۋەرکۊتوو سووریای. جە کاتو هرووژمەکا داعشیوە ئی هرووژمۍ بەردەوامێنۍ. جە دماو شکسپنەئارڎةو داعشی، دۆڵەتو تورکی هرووژمو سەرو ڕۆنامەواناش زیاتەر کەرد، دیارا مەرامەکەش ئانەنە کە نازۆ دەنگو حەقیقەتو شۆڕشو ۋەرنیشتی بیاوۆ بە جەهانی. ڕۆنامەوانا بیۍ بە دەنگو سەرنیشتی و ۋەرکۊتوو سووریای. برایەتی بەینو گەلا و پاردایمو نەتەوەیی دیموکراتیکیشا بە جەهانی یاونا. ویستو دۆڵەتو تورکی ئەرەگیری ڕا گێرتەین جە یاوای دەنگو حەقیقەتو گەلا بە جەهانی.
