هێزوو پارێزناو ژەنا ۋەرکەوتوو کوردسانی (هەپەژە) بۊنەو ڕۊو جەهانی ژەناوە پەیامێوە مبارەکبایش وەڵاکەرڎۆ و ئەرەیاۋناش: مشۊم ژەنی بە یەک دەنگ و یەک رۆح مجیارە مێڎانەکا و گرڎ ڕووێشا فاڕا پۍ ٨و مارسی.
فەرماندەیی هەپەژەی بۆنەو ٨و مارسی ڕۊو جەهانی ژانا کۊششکاری و رەنجدەریوە پەیامێوە مبارەکبایش وەڵا کەردۆ و چنەشەنە ئەرەیاۋنانش: " جە گرڎ وەختۍ زیاتەر بە ئەنەیاوای و زانیاریشا سەروو ئشناسنامەو ۋێشا جە گرڎوو مێڎانەکا کۊشیاینە بە شێوە و رەنگوو ۋێشا بەشدارۍ با و جە ۋەرا ۋەروو گرڎ جۆرە کۆیلایەتیێوەنە بە ئیراڎێوە بێ هامتاوە مرداوە".
جە پەیامەکەنە ئامان: ئێمە ٨و مارسی چا ژەنا کە بە ئازایەتیوە جە سەنگەرەکانە ئەرەگیرا ماڕا، ئا ژەنۍ کە دلۍ چوار دیوارا فاشیزمینە بە ئیراڎێوە ئاپۆییۆ ۋێڕاگری کەرا، ئا ژەنۍ کە بە بێ مردای جە جاڎەکانە پۍ ئازاڎیی هاوار کەرا، ئا ئەڎایاما کە جە گرڎ قۆناغێوەنە بە گیانبازییوە کۊشیایما ڕازناوە، ژەنا کوردی، عەرەبی، فارسی، تورکی، بەلوچی، ئەفغانستانی، ئازەری و تەماموو ئا ژەنا کە پۍ ئازاڎیی کۊشیانە، مبارەک کەرمۍ.
ئاماژە پانەیچ کریان کە، پێویسا جە گرڎوو مێڎانەکانە پارێزنای ژەنا مسۆگەر کریۆ و جە ۋەرا ۋەروو گرڎوو هجوومەکا مۆدێرنیتەی سەرمایەدارینە کە بێجگە جە باڵادەسی پیای و قڕکەردەی ژەنا حیچ چێوۍ تەری پۍ مرۆڤایەتی بە رەوا مەوینۆ، گور بە کۊشیای بڎریۆ.
ئەرەیاۋنانیچش: ئێمە قەناعەتما پاسەن کە چی ٨و مارسیچەنە گرڎوو ژەنا کوردسانی و جەهانی بە شێوەو وەهاری مجیارە جاڎەکا و بەیەک ڕوحوو، یەک دەنگ پا گیری ۋێشا سەروو ئاخێزوو ژەنا بە دروشمەو ''ژەنی، ژیۋای، ئازاڎیی'' گرڎوو ڕووەکا فاڕا پۍ ٨و مارسی.
