ئەسرین قادرە، چالاکەی سیاسییە ناڕەزایەتییش وەراوەروو گۊشەگیریی سەروو ڕابەروو گەلوو کوردی عەبدوڵڵا ئۊجالانی بەر وست واتش: "هەرمانەو چالاکاو سیاسی و مافوو ئینسانین دەنگوو بەڕێز ئۊجالانی بیاونا بە دنیۍ".
دیمانێوەشنە چەنی ئاریەن تی ڤی ئەسرین قادرە چالاکەی سیاسییە و چالاکەو مافەکاو ژەنا سەبارەت بە گۊشەگیریی ڕەهای سەروو ڕابەروو گەلوو کوردی عەبدوڵڵا ئۊجالانیوە ئاماژەش پانەیە کەرد، بۊنەو کاریگەریی ئۊجالانیوە بەتەمامەتی پەیوەندییەکێش کە چەنی جبەری پڕچنیێنۍ و واتش: "ڕەوتوو ڕووەدایەکاو وەرکەوتوو دلێڕاسەی و تورکیای فرە ناسەقامگیر و پەشێوا، پەوکای ڕا مەدا پەیامێوە تازە جە بەڕێز ئۊجەلانیوە بیاوۊ ڕای گردینی".
ئا چالاکە داوایچش جە چالاکە سیاسییا و داکۊکیکاراو مافەکاو ئینسانی کەرڎە، کە سەروو ئاستی میاننەتەوەیی دەنگوو ڕابەروو گەلوو کوردی عەبدوڵڵا ئۊجالانی بگیاونا بە دنیۍ و "پێویسا داوا کەرا فشاری زیاتەر بوزیۊ سەروو حکومەتەکەو ئەرڎۊغانی تادمایی پا نادادپەروەرییە بارۊ، کە ساڵانێوەن سەروو ئۊجالانیرە کریۊ و ویرۊکەرڎەیەکێش قەدەغۍ کریا. ئینەیچە جە ڕاو ئەرەیاونای و ڕێکوزیایە میاندەوڵەتییەکاوە کریۊ".
تەماموو قسەکا:
خاتوو ئەسرین قادرییە، پێسە مزاندۍ بەڕێز ئۊجەلان زیاتەر جە ٢٤ ساڵان ئینا زیندانەنە، دووۍ ساڵێن گۊشەگیریی تندش ملەرە سەپییان، بنەیانەکەش و پارێزنەرێچش مافوو ئانەیشا سەرێش بدا. شیکاریییتا چێشا سەروو ئی بابەتەیە؟
" پێسە ئاماژەت پەنە کەرد بەڕێز ئۊجەلان زیاتەر جە ٢٠ ساڵان ئینا زیندانەنە. ئی دووە ساڵە کە فشار و زوڵمێوە فرە دژش کریان. پێسە موینمێش ئێمە شایەتۍ فاڕایۍ فرەینمۍ مەنتێقەکەنە، بەتایبەتی تورکیانە. مزانمۍ حکومەتەکەو ئەرڎۊغانی ڕوانە ڕووبەڕوو گۊشەگیری و شکستی بۊوە. حەر وەروو ئینەیچا ئجۊم تەرسەو ئینەینە گەرەکشا نیا بەڕێز ئۊجەلان پەیوەندییش بۊ چەنی پارێزنەرا و بنەیانەکەیش، تا هاگادارێش نەکەراوە جە پەیامەکا یان وەڵێئامایەکاو ئیساتۍ مەنتێقەکەی، یان ئانە کە پەیامێوە بە جبەری مدا. هۊکاروو فشارەکاو دووە ساڵی ویەرڎەی پەیوەندییش پا بابەتاوە هەن".
ئایا ئجۊتا ئەگەر بتاوا پەیوەندی چەنی جبەری بکەرانۍ، کاریگەرییشا سەروو پەرسا و ڕووەدایەکا بۊ؟
" بەڵۍ، پاسەنە. زیاتەر جە ویس ساڵان ئینا زینداننە و هەمیشە کەسایەتیێوە کاریگەر بییەن، بۊنەو کاریگەریی بەڕێز ئۊجەلانیوە ڕاش مەدا پەنە پەیوەندییش چەنی خەڵکوو بەروو زیندانی بۊ. پڕۊسەو ڕووەدایەکاو وەرکەوتوو دلێڕاسەی و تورکیای فرە ناسەقامگیرۍ و پەشێوێنۍ، پەوکای ڕا مەدا پەیامێوە تازە جە بەڕێز ئۊجەلانیوە بیاوۊ بە ڕای گردینی".
بە ڕۊشنۊکەرڎەی شمە هەرمانەو چالاکای سیاسی و مافوو ئینسانی چی بابەتەنە چێشەنە؟
"من بە شەخسی ئجۊم ئانۍ ئینۍ جبەروو زیندانیوە و تواناو هاوارکەرڎەیشا هەنە، هەرمانەو سەروو شانەیشا ئانێنە چەنی ئانیشا ساڵانێوە شانە بەشانەو یۊترینی کۊشیێنۍ، دەنگوو بەڕێز ئۊجالانی بیاونا بە دنیۍ. ئجۊم ئا پەرسۍ تایبەتەو ئۊجەلانینە و مشۊم زیاتەر ڕێکوزیا میاندەوڵەتییەکۍ بژنەواش. پێویسا داوا کەرڎۍ کە فشاری زیاتەر بوزیۊ سەروو حکومەتەکەو ئەرڎۊغانی تا دمایی پا نادادپەروەرییە بارۊ، کە ساڵانێوەن سەروو ئۊجالانیرە کریۊ و ویرۊکەرڎەیەکێش قەدەغۍ کریا. ئینەیچە جە ڕاو ئەرەیاونای و ڕێکوزیا میاندەوڵەتییەکاوە کریۊ".
