دۆناڵد ترەمپ دماو هرووژمەکەو هێزی شەوۍ ئەمریکای پەی سەرو ئەرەمەرزیاو ئەتۆمی فۆردۆو ئێرانی، سەرو دیجیتاڵ میدیایۆ پەیامێوەش وەڵا کەرڎۆ و چنەشەنە واتش: "پېسە ئانەی جە دیمەنەکانە بەرگنۆ، زەرەرێوە فرەر ۋەرو گرڎو مېیانە ئەتۆمییەکا ئێرانی کۊتەن. عالتەریچا واچمۍ گرڎو مېیانە ئەتۊمیەکاشا بەتەمامی دلێنەبریۍ."

ترەمپ بە دیاریکریای ئاماژەش بە دەرەنجامەکا گورزەکۍ سەرو فۆردۆی کەرد و واتش: "زەرەری فرە گۊرە چېرو خاکینە کۊتەنۆ، بە تەمامی ۋەرو گورزەکې کۊتەن."

'چی فاڕیای جە ڕژێمەنە نەکریۆ؟'

وەڵتەرێچ چڼین ۋەرپەرسې باڵاو واشنتۆنی بانگەشەو ئانەی کەرێنۍ؛ ئامانجو دەسوەردایەکا ئەمریکای پەی فاڕای ڕژێمی نییا، بەڵام ترەمپ سەرنجش وست سەرو نیازو ۋێش کە مەبەس جە فاڕای ڕژێمین. ترەمپ سەرو پەلیانەو (Truht)و ۋێشەنە واتش، "ئەر ڕژێمو ئیساتۍ ئێرانی نمەبۆ بە نوێنەرو شکۆو ئێرانی، ئا وەختە چی فاڕیای جە ڕژێمەنە نەکریۆ؟".

هۆشداری ئەمریکای جە بارەو تەنکەبەرو هورمزیۆ

وەزیرو جبەرو ئەمریکای مارۆکۆ ڕوبیۆ ئێرانش ئاگاڎار کەردۆ چانەی دەسبەردارو نیازو وستەیرەو تەنکەبەرو هورمزی بۆ، کە بەشێوە فرەو نەوتەو جەهانیش پۊرە موېیەرۆ و ڕێوە بازرگانی کاریگەرەنە سەرو ئابووری جەهانی.

ئەمریکا داواش جە هاموڵاتیاش کەرد زیاتەر وریێبا

دماو هرووژمەکەو ئەمریکای پەی سەرو ئەرەمەرزیا ئەتۆمییەکا ئێرانی و کاروەدای و هەڕەشەکا ئێرانی پەی سەرو ئەمریکای، واشنتۆن داواش جە گرڎو هاموڵاتییا ئەمریکای کەرد جە سەرانسەرو جەهانینە زیاتەر ئاگاڎارۍ و وریۍ با.

هرووژموو ئیسرائیلی؛ گورزە جە مېیانو سەروازیی ئێرانی دریا جە کرماشانەنە

سوپاو ئیسرائیلی سەرسەعبو ئارۆ دووەشەممەی جە یازدەهەمین ڕۊو هرووژمەکاشەنە ئەرەیاۋناش گورزەشا ۋنەو چېرخانێوە سەروازی ئێرانی دان جە کرماشانەنە. ئاماژەیچ پانەی کریان گورزە جە چێرخانو سەروازی مانگەی دەسکردە و ڕادارو ئێرانی دریان جە ۋەرنیشتوو ئێرانینە.

جوابدایۆ ئێرانی؛ درۆنێوە ئیسرائیلی جە لوڕستانەنە وزیارە واری

سوپاو ئیسرائلی پەشتراسش کەردۆ فڕۆکێوە سەروازییشا جە پارێزگاو لوڕستانینە جە کاتو ئۆپەراسیۆنی سەروازینە کۊتەنەرە واری.

ناتانیاهۆ: بە بەهێزییوە درێژە بە هەرمانەکاما مڎەیمۍ جە ئێران و غەززەنە

بنیامین ناتانیاهۆو سەرۆکوەزیرانو ئیسرائیلی وێرەگاو یەکشەممەی جە کۆنگرێوە ڕۆنامەوانیینە کە وەڵتەر تۆمارکریابۍ، باسش چانەی کەرڎ ئیسرائیل بە گرڎو هەرەکەتو ۋێشۆ درێژە بە هەرمانەکاش مڎۆ جە ئێران و غەززەنە.

ئێران: جوابی یەکلاکەرەوەما بۆ

ئاژانسوو هەواڵوو عەرەبی جە ئێرانەنە ئەرەیاۋناش، فەرماندەو سوپاو ئێرانی ئەرەیاۋنانش، "ئەمریکییەکۍ هەرکاتێ تاوانێوەشا کەردې بۆ جوابێوە یەکلاکەرەوەشا هۊرگێرتەن، ئیجارەیچە هەمان چێو ڕووە مڎۆ."

ئایا میلیشیا عێراقییەکۍ ۋێشا پەی حیچ جوابدایۆیۍ ئاماڎە مکەرا؟

ڕۆنامەو ئەل ئەخباری لوبنانی کە سەر بە حیزبوڵاین ئەرەیاۋناش، میلیشیا لایەنگرەکې ئێرانی جە عێراقەنە ۋێشا ئاماڎە مکەرا کە جوابو هرووژمەکەو ئەمریکای پەی سەرو وێستگە ئەتۆمییەکا بڎاوە.

حیزبوڵا بەشداریی جە جەنگەنە نمەکەرۆ

چن سەرچەمېوە لوبنانی پەی ڕۆنامەو سعودی ئەشراق ئەل ئەوساتی، ئاماژەشا پانەی کەرد حیزبوڵا سەرو هەڵوێسو ۋێش سوورا کە بەشدارو جەنگو دژ بە ئیسرائیلی نمەبۆ.

ئێران و ڕوسیا تاوتوێ هەڵوێسو ۋێشا مکەرا و ئینۍ هەماهەنگینە

ڕۊو دووەشەممەی عەباس عێراقچی، وەزیرو جبەرو ئێرانی سەرش ۋنەو مۆسکۆی دا. بەپاو ئاژانسوو هەواڵوو ڕوسی تاس، ڕوسیا و ئێران تایبەت بە پشێویە هەنووکەییەکا جە ۋەرکۊتوو مېیامینی " تاوتوێ هەڵوێسو ۋێشا مکەرا".