جە ئیستەنبوڵ کە یۊ جە شارە گۊرەکا جەهانیا رێژەو هەژاری ساڵ دماو ساڵی زیاتەر بەرز بۊۋە. بە پاو ئامارە ڕەسمیەکا دەوڵەتی جە ساڵەو ٢٠٢٢ېنە رێژەو هەژاری چا شارەنە بە سەڎەنە ١٨.١ دیاری کریان.

جە کوچوک بازاڕ کە ۋەڵتەر پېسە کۊڵانەو سولەیمانیەی ئشناسیۍ، سەرەڕاو ئانەی فرەو یانەکاش وڕېنۍ و بڕۍ یانېچشا هەنۍ و بڕۍ تەریچ ئینۍ لێوارو وڕاینە، بەڵام هەڵای ژیای و جمای کۊڵانەکېنە هەن.

کوچوک بازاڕ کە فرەو ئا کورڎا کە نەوەڎەکا سەڎەی ۋەڵینیۊ بە مەڵامەتو فشاری و سۊچنای دەگاکاشاوە و حەرپاسە بە مەڵامەتو بێهەرمانیۊ ڕووەشا کەرڎەبۍ ئیستەنبوڵ چی کۊڵانېنە ژیۋېنۍ. ئیسە بیەن بە پەناگەو کۆچبەرا و پەنابەرا نایاسایی. تا ئیسەیچ بەشێۋە فرەو ئەرەنیشتا کۊڵانەکۍ کورڎېنۍ. هەڵایچ فشارو پۆلیسی وەردەواما. وەختۍ فرەینە کورڎۍ بېنۍ، بنکەو پۆلیسو کوچوک بازاڕی میانگەو ئەشکەنجەی بۍ. ئیسە بنکەکە نەمەنەن، بەڵام پۆلیسەکۍ گرڎ ڕوۋۍ فشار وزا سەرو ئا کۆچبەر و پەنابەرا کە قاچاخەڕارە ڕوۋەشا کەرڎېنە یاگەکۍ.

هـ .ش