دەم پارتی جە ئامەڎەنە کاندیدەکێش پۍ هامسەرۆکوو شارەوانیەکا ئشناسۍ. هامسەرۆکەو دەم پارتی تولای حاتەم ئۆغۆللاریە سڵامش جە مدرامانوو زینڎانەکا کەرد و واتش: "ئێمە بێگومان سەرۍ گنمۍ. جە ٣١ و ئادارینە سەرکۊتەی کەرمۍ دیاریی پۍ گەلا".
پارتوو یەکسانی و دیموکراسی گەلا (دەم پارتی) پۍ ئشناسای کاندیدەکاش پۍ هامسەرۆکوو شارەوانی ئامەدڎیی بەرنامێوەش ڕێکوست. جە بەرنامەکەنە، هامسەرۆکا دەم پارتی و هامسەرۆکا دەبەپەی و فرێوە جە کەسایەتی و پەرلەمانتارەکا ئاماڎۍ بێنۍ.
جە بەرنامەکەنە هامسەرۆکەو گرڎیی دەم پارتی تولای حاتەم ئۆغللاریە سەرنجش وست سەروو ئێشکگیری دادپەروەری، واتش: "قەزیەو ئێمە قەزیەو گەلوو کوردی کە کۊشیۊنە پەی چارەسەری قۊرتەکا و قەزیەو عەلەوییەکا پەی هاموڵاتیبیەیۍ یەکسانی. کۊشیایما، کۊشیای ژەنا و چالاکا ئیکۆلۆژی و کرێکارا و هەژاران. جە ٣١ و ئادارینە بێگومان سەرۍ گنمۍ. بەبێ دوور وستەیۆ حیچ کەسۍ، خزمەتوو کوردی و تورکی و عەلەوی و سوریانی و گرڎ کەسۍ کەرمۍ. ٣١ و ئاداری شارەکاما جە قەیومی پاک کەرمېوە". حاتەم ئۆغۆللاریە ئەرەیاۋناش جە ٣١ و ئادارینە سەرکۊتەی کەرمۍ بە دیاری پۍ گەلا و واتش: "پۍ سەرکۊتەیۍ تاریخی مشۊم یانە بە یانە گێڵمۍ. کۊشیایما پۍ هۊرچنیەی نیا، کۊشیایما پۍ ئازاڎیی گرڎوو کرێکارا و ژەنا و ڕەنجدەرا ئی جوگرافیاینە کە ئینۍ چێروو فشارینە. هامسەرۆکا و گرڎ کەسۍ بە ۋەرپرسیاریی ۋێشا هۊرمێزا و بە ڕۆحوو سەفەربەریوە هەڵسووکۊت کەرا، پی قەناعەتۆ سڵام جە گرڎ لېوە کەروو، بێگومان سەرۍ گنمۍ".
لاو ۋێچشۆ هامسەرۆکوو دەم پارتی تونجەر باقرخان ئەرەیاۋناش، گەلوو کوردی دیموکراسی مارۆ وڵاتۆ ۋەران ۋەر بە دەوڵەتوو ستەمکاری، جەختش کەردۆ کە کورد بە مدرامان و کۊشیای ۋێشا و درووشمەو "ژەنۍ، ژیۋای، ئازاڎیی" جە دنیانە بیێنۍ بە نموونە، با جارێوەتەریچ جە ڕاو سیستموو هامسەرۆکایەتی و چەسپنای دیموکراسییوە باوە بە نموونە.
ئەرەیاۋناش ئی قۆناغۍ دژوارەنە و سیسەم گرەو سەروو ماڕاو ئیراڎەو کوردی کەرۆ، واتش: "تەسەورشا پاسەبۍ کە بە گێرتەی دەمیرتاشی و کشاناکۍ کورد پاشەکشە کەرۆ. قەیوم واتە دزی و هەژاری و گەندەڵی، دوژمنوو نامۍ موسا عەنتەری و بیەو کوردان".
حەرپاسە ئەرەیاۋناش باوەڕما پاسەن، جە ٣١ و ئادارینە گەلاو چێردەسی و هەژارا و کورد و زیهنیەتوو دیموکراتیکی و ئیدارە هەرێمییەکا سەرۍ گنا، یۆ بە یۆ ۋنەپەرسایۆ جە گرڎوو قەیومەکا کەرمۍ
