ئارۆ دادگا سەروو دۆسیەو کۆبانێ قەرارشدا، ئەحمەد تورک بە تۆمەتەو “ئەندامیەتی جە ڕێکوستەینە” سزاو ١٠ ساڵا زینڎانیش سەرەرە سەپیان، سەلاحەدین دەمیرتاش ٤٢ ساڵۍ و فیگەن یوکسەکداغە ٣٢ ساڵۍ و نۆ مانگۍ سزاو زینڎانیشا سەرەرە سەپیا.
جە دۆسیەو کۆبانێنە، هامسەرۆکا وەڵینوو پارتوو دیموکراتیکی گەلا (هەدەپە)ی فیگەن یوکسەکداغە و سەڵاحەدین دەمیرتاش چنی ١٨ زیندانیا تەری جە کۆو ١٠٨ سیاسەتمەدارا کوردی، بە بەهانۍ هاندای و ۋێنیشاندای و شەرمەزار کەردەی هجوومەکا چەتەکاو داعشی پەی سەروو کۆبانێ، جە ٦ تا ٨ و تشرینوو دووەم و ٢٠١٤ دادگایی مکریا، جە دادگاو سزا قورسەکا ئەنقەرەینە پەی قەراری دماینی جە بارەو دۆسیەکەیۆ ئارۆ ئەرەنیشتەو دادگای دەسش پنەکەرد.
یاگۍ ئاماژەینە جە ئەرەنیشتەکەو دادگاینە، هامسەرۆکا پارتوو هەرێمە دیموکراتیکەکا دەبەپەی و هامسەرۆکا پارتوو یەکسانی و دیموکراسی گەلا و یاگەگیروو سەرۆکوو پارتی کۆماری گەلی (جەهەپە). عەلی ماهیر بەشاریر و بەشێوە فرە جە پەرلەمانتارا و نوێنەروو ڕێکوزیاکا گلێرگەی مەدەنی و لایەنە سیاسییەکا و حەرپاسە زیاتەر جە ٢٠٠ پارێزنەرا و زیاتەر جە ١٠ سەرۆکا جەمەو پارێزنەرا شۊنیرەلوایشا پەی ئەرەنیشتەکەی کەرد.
سەرۆکایەتیی دادگای قەراری دماینوو ۋێش ئەرەیاۋنا، چنی ئەرەیاۋناو قەرارەکەی ئامادەبیا دلۍ هۆڵوو دادگای و پارێزنەرا بە دەسکوای سەروو مێزەکا ۋەروودەمیشارە، ناڕەزایێوە گشگیرشا ئەنجامدا و بە واتەیۆ درووشمەو "بژیۋۆ مدرامانوو هەدەپەی" ناڕەزایشا بەربڕی و هۆڵەکەشا چۆڵ کەرد.
قەراری دماین و دادگای جە بارەو دۆسیەو کۆبانێ’ پێسەن:
سەڵاحەدین دەمیرتاش: بە بەهانۍ “تێکدای یۆبیەی و یەکپارچەیی دەوڵەتی ٢٠ ساڵۍ زینڎانیش پەی بڕیاوە، حەرپاسە بەبەهانۍ هاندای جەماوەری ٤ ساڵۍ و شش مانگۍ تەر سزا دریا، بە مەڵامەتوو وتارێوەش جە ٢١و ئادارو ٢٠١٦ پەی جەژنەو نەورۆزی، ٢ ساڵۍ و شش مانگۍ تەر سزا دریا، بەمەڵامەتوو وتارێوەش جە ٢٩و شوباتوو ٢٠١٦ ینە جە ئامەد، بە بەهانۍ “هاندای خەڵکی پەی یاسا ماڕای، ساڵێوە و شش مانگۍ تەر سزاو زینڎانیش سەرەرە سەپیا، بەکۆی گرڎیی کەرۆ ٤٢ ساڵۍ زینڎانیی جە ٤٧ تۆمەتۍ جیاوازەنە.
فیگەن یوکسەکداغە: بە بەهانۍ "ئەندامیەتی جە ڕێکوستەی و ڕاوەبەردەی ڕێکوستەینە، بە ١٩ ساڵۍ زینڎانیی سزا دریا، حەرپاسە بە بەهانۍ "هاندای" ٤ ساڵا و شش مانگا تەری سزا دریا، بە بەهانۍ، پروپاگەندەی پەی ڕێکوستەی، ساڵێوە و شش مانگۍ تەر سزا دریا، چنی چن سزێوە تەری کە بەگرڎیی ٣٢ ساڵۍ و ٩ مانگۍ سزاو زینڎانیش سەرەرە سەپیا.
ئەحمەد تورک: بە بەهانۍ "ئەندامیەتی جە ڕێکوستەینە" سزاو ١٠ ساڵا زینڎانیش سەرەرە سەپیا.
حەرپاسە ٢٠ سیاسەتمەدارۍ و پەرلەمانتارۍ وەڵینۍ هەدەپەی، جە ١٨ ساڵێوە تا ٣٠ ساڵۍ زینڎانیشا سەرەرە سەپیا.
