شاندێوە ئاکەپەی کە پێکئامابێ جە؛ یاگەگیرو سەرۆکو ڕێکوستەی گلێرگەی مەدەنی و پەیوەندییەکا گەلی ڕەسوڵ کورت، ئەندامۆو لوجنەو راوەبەری مییانو لقەکا ژەنا مییانو گرڏی توبا ئۆزدەمیرە و ئەندامۆو کۆمیتەو مییانو لقو جوانا ئۆزگە چەلیک، جە دووەم ڕۆو جەژنێنە جە بالگاتی ئەنقەرەی سەرشا ونەو پارتو یەکسانی و دیموکراسی گەلا (دەم پارتی) دا و جە لایەنو یاگەگیرو هامسەرۆکا گردیی دەم پارتی مەحمود ڕوشدو تریاکی و ئەندامۆو ئەنجومەنۆو دەم پارتی زینۆ بایارمۆگلووێ و ئیحسان سەیلانیوە پێشوازیشا ونە کریا.

'دەم پارتی پاڵپەشتێ بەهێزو پرۆسەکەیا'

دماو پیرۆزکەردەی جەژنێ جە سەرداکەینە جە شاندو ئاکەپەی ڕەسوڵ کورت باسو پرۆسەو چارەسەریش کەرد و دەسنیشانش کەرد قەرارەکێ پەکەکەی دلێ گلێرگەینە پێشوازیێوە بەهیزش ونەکریا و واتش، پەنەوازا گردو پارتە سیاسییەکا پاڵپەشتی جە پرۆسەکەی بکەرا. کورت ئاماژەش بە هەوڵەکا دەم پارتی جە پرۆسەکەنە کەرد و واتش: "دەم پارتی پاڵپەشتێوە گۆرەو پرۆسەکەیا، پەنەوازا ئینسان ڕێزو یۆترینی گێرۆ و دلێ یۆبیەی و واڵەو-برایەتینە بژیوۆ. جە ئیساتێنە ئینایمێ سەردەمێوە تازەنە و یاگێ هیوا و دڵوەشیمانە."

'ئاکەپە وەرپرسیاری فرەش گنۆسەر'

دماتەر جە شاندو دەم پارتی محمەد ڕوشدو تریاکی قسێش کەردێ و ئاماژەش بە پەنەوازی پاڵپەشتی گردو لایەنەکا کەرد پەی پرۆسەکەی و دەسنیشانش کەرد وەرو ئانەی ئاکەپە ئینا دەسەڵاتەنە، پۆکەی پەی وەڵێکۆتەی پرۆسەکەی وەرپەرسا و فرەتەرین ئەرکش گنۆ سەرو شانا.