جە شارو هەڵەبجەی، بە چەمداری و سەرپەرشتی وەزارەتو ڕۆشنۋیری و لاوانی، ڕاوەبەری ڕۆشنویری هەڵەبجەی کۆڕیادێو پەی شاعیر، نویسەر، پەیجورکار، میدیاکار، زوانشناس، پەروەردەکار و مامۆستا (عوسمان موحەمەد ساڵح فەرەج ئەشناسیا بە عوسمان موحەمەد هەورامی)  ساز مەکەرۆنە کە ساڵێ ویەردێ کۆچی دماییش کەردەبێ.
کۆڕیادەکە سەرسەبای دۋەشەممەی سەعات 10:30و ڕێککەوتو 2021/02/01ی، جەهۆڵو ڕاوەبەری ڕۆشنۋیری هەڵەبجەیەنە مەبریۆنەڕاوە و جە میانشەنە سەرەتا چەنڎین وتارێ و شیعرێ سەبارەت بە کۆچکەردەی پێشکەشێ مەکریانێ.
دماتەر جە باغچەو ڕاوەبەریەکەیەنە بە مەڕاسیمێ پەردە سەرو پەریکەرو کۆچکەردە (عوسمان محەمەد هەورامی) لامدریۆن کە بەسپۆنسەری ڕاوەبەری ڕۆشنۋیری هەڵەبجەی پەیکەرساز (عومەر جەمیل)ی ساز کەردەن.

یاگێ یادئاوەرییەن، جە سەرسەبای پەنجشەممەی ڕێککەوتو 2020/10/15ی، جە شارو سلێمانیێ، شاعیر، نویسەر، پەیجورکار، میدیاکار، زوانشناس، پەروەردەکار و مامۆستا (عوسمان موحەمەد ساڵح فەرەج ئەشناسیا بە عوسمان موحەمەد هەورامی) بە فایرۆس و نەوەشی کۆرۆنای گیانش ئەسپارابێ.
هەورامی، ساڵەو ١٩٤٠ی جە شارچەو تەوێڵێ سەر بە هەرێمو هەورامانی جەڎێ بییەن و ساڵەو ١٩٤٨ی یانەشان لوان شارو سلێمانیێ. کۆچکەردە، قۆناخەکێ وانایش جە تەوێڵێ، سلێمانییە و بەغداد تەمامنێنێ و دەرەنجام بییەن بە مامۆستا و فێرکار و پەروەردەگار و نزیک بە نیم سەدە جە ئا بوارەنە خزمەتش کەردەن. هامتەریب چەنی ئانەیە، شیعرێ، نویستێ، پەیجۆرێ فرێش هەنێ و بە تایبەتی گرنگی فرەش بە دنیاو زارۆڵان دابێ. بەگردی زیاتەر جە ٢٥ کتێبێ و نامیلکێش چاپێ یاونێنێ و وەڵاوێش کەردێنێوە و ژمارێوی فرێ کتێبێچش ئامەدێنێ و چاپێ و وەڵاوێ نەکریێنێوە.
هاموەخت ڕۆچنامەنویس و میدیاکاریێوی بەتوانا بییەن و جە چەندین ڕادوینێنە چوون، (دەنگی گەلی کوردستان، بەغداد، خاک و مەدەنیەت) بەرنامێش بە هەورامی و سۆرانی ئامادێ و پێشکەشێ کەردێنێ.
هەورامی، ساڵەو ١٩٦٠ی چەنی خاتوو گەلاوێژ ئیسماعیل مەلا بەکر تەوێڵەیی هامسەرگیریشان کەردەن کە بەرهەمەکەش ٦ کناچێ و ٤ کوڕێ بییەن.