جە شاروو مارسیلیاو فەڕەنساینە جە چوارچێوەو هەڵمەتەو "١٠٠ هەزار نامانە" پۍ ڕابەروو گەلوو کوردی عەبدوڵا ئۆجالانی، جە شاروو مارسیلیاو فەڕەنسایچۆ نامۍ ڕووانەو زینڎانوو ئیمراڵی کریۍ.

جە چالاکیەکەنە کە بە سەرمەشقی ئەنجومەنوو ژەنا ئارین میرکانی سازکریا، ژمارێوە فرە جە کوردسانیا بەشدارۍ بێنۍ و نامۍ ڕووانەو دوورگەو ئیمراڵی کریۍ.

بە نوێنەرایەتی ئەنجومەنوو ژەنا ئارین میرکانۍ ئایسەڵ بولانکە قسێش کەردۍ و سەرنجش وست سەروو ئامانجەکا هەڵمەتەکۍ. بولانکە ئانەش وست ڕووە کە رابەروو گەلوو کوردی عەبدوڵا ئۆجالان ماوێوە فرەن بە تنی گۆشەگیری کریان و واتش، "یەرۍ ساڵێن حیچ هەواڵێوەما جە رابەریما نییا. گەلوو کوردی و دۆساشا جە سەرانسەروو ئەوروپاینە پۍ ئازاڎیی رابەر ئاپۆی دەسشا بە هەڵمەتەو ئازاڎیی کەردەن. چا چوارچێوەنە ئێمەیچ ئارۆ نامۍ پۍ ڕابەریما کیانمۍ. بە شەو و ڕۆ پۍ ئازاڎیی رابەریما کۊشیەیمۍ و پەرە بە خەباتی و کۊشیای مڎەیمۍ. داوا جە گرڎ لېوە کەرمۍ، پۍ ئانەی هەڵمەتەکۍ بیاوۆ ئامانجەکاو ۋێش گنانۍ حاڵەتوو ئاماڎەیۆ و بەشداری جە هەڵمەتەکێنە کەرا".

دماو پێشکەش کەردەی قسەکا، کوردسانیا بە دروشمەکاو "بێ سەرۆکی ژیۋای مەبۆ" و "بژیۋۆ سەرۆک ئاپۆ" لوۍ پۍ پۆستەخانەی و نامەکېشا پۍ دوورگەو ئیمراڵی کیاستۍ.