هامسەرۆکو وانو پارتو هەرێمە دیموکراتیکەکا (دەبەپە)ی جەمال دەمیر دەربارەو مژارو 'مافو هیوا'ی و گۆشەگیری پەی ئاژانسیما قسێش کەردۍ و جەختش کەردۆ چانەی گۆشەگیری بە چەمپنەکۊتەی بنەیانەی و پارێزنەرا بە کۆتا نمۍ و دەسنیشانش کەرڎ پەی ئانەی ڕابەر ئاپۆ بتاوۆ جە ئاشتی کۆمەڵایەتینە دەور گێڵنۆ، مشۆم جە ڕوو بەڎەنیۆ ئازاد بۆ.

'نمەبۆ مافو هیوای پېسە ئامرازێوە ساتو سەودای بەکاربێنە'

دەمیر دەسنیشانش کەرڎ جە کاتو پیلانگێڵنی مېیاننەتەوەییوە کە ساڵۆو ١٩٩٩ی بە گێرتەی ڕابەر ئاپۆی دمایش ئاما، چا کاتۆن ڕابەر ئاپۆ گرڎو کۊششەکاش پەی پێکئاوردەی ئاشتی کۆمەڵایەتییا، بەڵام ئی بانگەوازیۍ جە لایەنو دەسەڵاتدارییوە بە گرنگ هۊرنمەگیریا و واتش: "پېسە ئاشکران سەرنجە چارەسەرییەکۍ ئێژا ئۆجالانی تەنیا پێوەس بە کوردی و تورکیوە نییا بەڵکم پەی ۋەرکۊتوو مئیامینی گرنگیێوە گۊرەش هەن. پەی کۆو ڕووەدایەکا ناوچەکەی چارەسەرییا. پێوەس بە کۆمکوژی ئێزدییەکا ئاگایش دا. هەرپېسە چنی پەی جەنگو سووریایچ سەرنجش وست سەرو چن خاڵێوە. فکرو ئێژا ئۆجالانی فرە سەنگین و کاریگەرا."

دەربارەو مافو هیوای، دەمیر ئاماژەش پانەت دا نمەبۆ مافو هیوای پېسە ئامرازێوە سیاسی بەکاربۍ و داداگا ئانەش پەشڕاس کەردەنۆ کە مافێوە سروشتیی گرڎ زیڼانیکریێوەن.

'پەی بەرقەراربیەو ئاشتی مشۆم ئێژا ئۆجالان بە جەسەیی ئازاد بۆ'

دەمیر ئاماژەش پانەی دا نمەبۆ گۆشەگیری تەنیا جە چوارچێوەو چەمپنەکۊتەی بنەیانەی و پارێزنەرانە هۆرسەنگیۆ. جەختش چانەی کەرڎۆ پەی پێکئامای ئاشتی کۆمەڵایەتی مشۆم دەرفەتەکۍ پەی ڕابەر ئاپۆی بڕەخسیا و ئینەش وات: "تەنیا چەمپنەکۊتەی پارێزنەرا بە ماناو دەرفەت پنەدای نمۍ. ئێژا ئۆجالان کەسایەتی و ئاژێوە تایبەتش هەن کە نوێنەرو گلێرگەی و سیاسەتیا. پەی ئانەی بتاوۆ دەورو ۋێش گێڵنۆ مشۆم بتاوۆ سەرنجەکاش بیاونۆ بە گلێرگەی، یانی مشۆم جە ڕوو بەڎەنیۆ ئازاد بۆ."