دژوو ئا تەرسۍ و تۊقنایە، کە دەسەڵاتو ئاکەپە-مەهەپەی ۋەششا کەرڎەن، جەمەو ژەنا دلۍ پارتو چەپی سەوزینە دژوو ڕژێمو تاک پیای و دەسگېرتەی سەرو دەستکۊتەکا ژەنارە کۊباۋە. ژەنی ماچا ھورچنیەو ئیجاریە گرنگتەرین ھورچنیەین پۍ ژەنا.

"گوڵجان تارکان"ە قسەکەرەو پارتو چەپی سەوزی بە ئاژانسو هەواڵی فورات (ANF)یش ۋات، ئامانجشا دیموکراتیکەرڎەو کۊمارین و ۋاتش: "کریۊ ڕوانگەو سیاسی پارتو چەپی سەوزی چێرو چۋار نامونیشانی ئەساسینە پێناسە کریۊ. داڎپەروەریی ئابووری، داڎپەروەری ژیۋگەیی و کەشوهەوا، دڎان نیای بە داڎپەروەری و داڎپەروەری بەشڎاریکەردەینە. بیەو پارتو چەپی سەوزی جە پەرلەمانەنە ماناش ئانێنە، کە خەبات پۍ دیموکراسیکەرڎەو کۊماری جە گرڎ یاگېۋەنە پەرەش پنە بڎریۊ. ئامانجو ئێمە ئانەن کە ڕژێمو کۊماری بە دیموکراسی بیاۋنمۍ".

پۍ ئازاڎیی ژەنا

"گولچین پۊڵات"ە سەرۊکەو مەنتیقەو پارتو دیموکراتیکو گەلان (هەدەپە)ی ۋاتش، "ئی ھورچنیایە پۍ ڕزگاربیەین جە کارەساتو سەڎەی و بنیاڎنیاو سەرەتاو سەڎەی دیموکراسی. بە تایبەتی پۍ ژەنا، ئینە ھورچنیێۋە گرنگا. ئێمە ئینەی پۍ ئازاڎیی ۋێما، پۍ ڕزگاری جە دەسەڵاتو ئاکەپەی فرە بە گرنگ مزانمۍ. ئێمەی ژەنی بە قووڵی هەست بە کارەساتەیە مکەرمۍ کە ٢٠ ساڵېن ئینایمېش چنە، پۊکەی ئەشۊ پەشتیوانی جە پارتو چەپی سەوزی بکەرمۍ."

"یاگمۊر ئالاز گولڤەرەن"ە ئەرەیاۋناش، دەنگ بە پارتو چەپی سەوزی مڎۊ و پۍ مەڵامەتو دەنگدایش بە پارتو چەپی سەوزی ۋاتش، "ئێمە بە چەمۍ ۋێما فاڕیای جە زانکۊکانە ۋینمۍ. ئێمە بێزارێنمۍ چا تەرسۍ، کە دەسەڵاتی ۋەشکەرڎێنە و بێزارێچەنمۍ چا فاڕیایە کە جە زانکۊکانە ئەنجامدریان. هەمان ۋەختەنە، بەپەی لوواو من ئی ھورچنیە گرنگا پۍ گېڵایۊ پۍ ڕێککەوتەو ئیستەنبوڵی و ھەرمانکەرڎەی پا رێککەوتەیە. پۍ گېڵنایۊ مامۊساکاما پۍ زانکۊکا، پۍ دمایی ئارڎەی بە کوشتەو ژەنا و دەستدرێژیکەرڎەی سەرو ژەنا و جە هەمان  ۋەختەنە پۍ ئانەی زینڎانییە سیاسییەکۍ ئازاڎۍ کریا دەنگ بە پارتو چەپی سەوزی مڎەو."

ھ.ش