ئارۆ جەمیل هۆرامی سەرۆكو جەمەو پێشمەرگە قەیمییەکا كوردەسانی  شارو سلێمانی بە مەبەسو مەیسەرکەردەی و یاونای هامکاریی مرۆی بە گەلو وەرنیشتوو کودەسانی کۆنگرێوە ڕۆنامەوانیش ئەنجامدا و بانگەوازش جە ئیدارەو پانیشتوو کوردەسانی کەرد بە زووتەرین کات دەروازەو سنوری سێمێڵکای بکەرۆوە.

هەورامی جە قسەکاشەنە جەختش چانەیە کەردۆ، پێسەو جەمەو پێشمەرگە قەیمییەکا کوردەسانی ڕێز جە ئیرادەو خەڵكو سوریای مگێرمێ جە دیاری کەردەی ئایندەو وێشا، بەتایبەت واڵەو برێکێما جە وەرنیشتوو كوردەسانینە، هیواڎارێنمێ جە حکومەتو تازەو سوریاینە گرد پێكئامایەکۍ نوێنەرشا بۆنە.

'دەروازەو سێمێڵکای تاکە دەروازێن پەی یاونای هامکاری'

 هەر جە قسەکاشەنە هەورامی ئاماژەش پانەیەکەرد، جە ئیسەنە تاكە ڕێوە كە تاومێنە هامكاریەكاما بیاونمێ بە وەرنیشتی دەروازەو سنووری سێمێڵكاین، كە جەلایەنو حكومەتو هەرێمیۆ وزیانەرە، بەمەڵامەتو ئانەی جەنگ جە وەرنیشتوو كوردەسانینە هەن، داواكارێنمێ دەروازەكە بکریۆوە، پەی ئانەی پەنەوازییە تەندرووسییەکا یباونمێ بە وەرنیشتی.

باسش چانەیچە کەرد، بەمەڵامەتوو ئارامی مەنتیقەکا چێرو دەسەڵاتو هێزە كوردییەكا، هامووڵاتیا سووریایی ڕووە جە وەرنیشتوو كوردەسانی مکەرا ئینەیچ بارگرانیش پەی وەرنیشتی وەشکەردەن و پەنەوازیشا بە هامكاری زیاتەری هەن.