حافز ئەحمەد تورهاللی ئەرەیاۋناش، کە ئاکەپە ٢١ ساڵېن ئایینش بەکارئارڎەن، پی جۊرەیچ سەرو حوکمیۋە مەنەنۊ و ۋاتش، "ئەشۊ گەلەکەما فریوو ئا کەسا نەۋەرۊ کە ئایینی پۍ ھورچنیای بەکار مارا و سیاسەتش سەر بنیاڎ منیا".
سەرۊکو گرڎی جەمەو ئیسلامی کورڎسانی (جیک) حافز ئەحمەد تورهاللی باسش چانەی کەرڎ کە ھورچنیێکۍ ١٤و ئایاری پۍ گەلوو کورڎی و گەلا تورکیای یەکلای کەرەوەن و زەرورا خەڵک بەشڎاری جە پرۊسەکەینە کەرا و قەرارۍ ئەرێنی سەرو ئاینڎەو ۋێشا بڎا.
تورهاللی ۋیرش ئاۋردۊ کە زیاڎ جە ٢٠ ساڵان ئاکەپە ۋڵاتەکەی ڕاۋەبەر کەرۊ، چا ماۋەیچەنە بە نامۍ ئایینیۋە زەرەرۍ گۊرەی کۊمەڵایەتیش دان و ۋاتش: "دەسەڵاڎ داری ئی سەردەمیە جە کورڎسان و ئاناتۊلی سەوڎا و بازرگانی بە ئیسلامیۊ کەرا و مرۊڤەکاش پنە ھورخەڵەتنا. ئینەیچ ئاژێۋە خراپ و قیزەونا. خوڎا جە قورئانەنە فەرماۋۊ "ئایەتەکا خوڎای مەورەشدۍ". حەرپۊکەی ئەشۊ گەلەکەما و مسوڵمانە بەتەقواکۍ وریۍ با. ئەگەر ئا ئینسانۍ ئیسلامشا ۋەشسیابیۍ بازرگانیش پۆۋە نەکەرێنۍ. ئەگەر ئاڎۍ بەهاکۍ ئارامی و داڎپەروەریشا پێشکەش بە گلېرگەی کەرڎۍ پێویس نەکەرۍ بە نامۍ ئایینیۋە بازرگانی کەرا. ئیجارەیچە پلانەشا نیێنەرە تا چی ھورچنیەیچەنە بازرگانی بە ئایینیۋە کەرا، پۊکەی ئەشۊ گەل سەرنجش سەرو کردەوەکا پارتەکا دەسەڵاتیۊ بۊ و بە پاو ئا کرڎەوا مامەڵە کەرا. کردەوەکێچشا ئینۍ ۋەرو چەماۋە. ئی ھورچنیە گرنگا و ئەشۊ مسوڵمانۍ ئاگاڎار و وریۍ با، ئەشۊ فریوو ئاڎیشا نەوەرا کە بازرگانی بە ئایینیۋە کەرا و سیاسەتش سەر بنیاڎ منیا".
هامپەیمانی ئاکەپە-مەهەپە ئینا جبەرو ئیسلامیۊ
تورهاللی ئەرەیاۋناش؛ کە ئا ھامپەیمانیۍ پۍ ھورچنیەی پېک مەیا پێویسا سەرو بنەماو مافی و داڎپەروەری با و ئانەیچش وست ڕوۋە کە "جە ماۋەی ۋیەردەنە حۊڵ دریان ھامپەیمانیەکەو ئاکەپەی پېسە هامپەیمانێتیۍ ئیسلامی بە گلېرگەی بشناسیۊ، بەڵام ئینە فریودای و ھورخەڵەتناین. ئا هامپەیمانیە ئینا جبەرو ئیسلامیۊ و پەیوەنڎیش نیا پا ئایینیۋە. هامپەیمانی ئیسلامی ئامانجش ئارامی و یەکسانیا، ئاخۊ ئا هامپەیمانیەو ئاکەپەی حیچ جۊرۍ چانەش چنەن؟ ھەرمانەو ئاڎیشا کوشتەین، نەژاڎپەرستین، ھەرمانەکېشا دزیا. پێغەمبەرو ئیسلامی(د.خ) سەربۊ گرڎ جۊرە نەژاڎپەرستێۋەش رەڎ کەرڎەنۊ، ئینە چنی بۊ کە تۊ بەی و هامکاری نەژاڎپەرستێۋی پېسە مەهەپەی کەری و دماتەر بە ۋێچت ۋاچی مسوڵمان. ئانەی زەڕێۋە مەژگش بۊ مزانۊ کە ئانە مسوڵمانێتی نییا".
ۋاتیچش: "گەلوو کورڎی باوەڕمەنڎا، خۊتان بڕوا و ئایینێۋی کۊمەڵایەتی و ئاشتیانەین، پۍ ئانەی گەلوو کورڎی جە خشتە بەرا سیاسەتۍ چەپەڵشا گېرتەنەنە ۋەر، بەڵام ئیتر گەلوو کورڎی بڕواشا پنە مەکەرۊ. ئانەی بەرژەوەنڎی تایبەت و حزبیش بۊ شۊنیشا گنۊ، بەڵام مرۊڤە بە ئیمانەکۍ تەماشەو کرڎەۋەو پارتەکا مکەرا، با گەلوو کورڎی و مسوڵمانا ئیتر بڕوا پا پارتا دەسەڵاتیە نەکەرا. گرڎما مۋینمێش، بێجگە جە بازرگانی مادڎەی هۊشبەری و سوود وریباو بانقەکا و جەنگی حیچ ھەرمانێۋە تەر مەکەرا. ئاڎۍ خەریکو فریوداینۍ و سیاسەتیچشا حەر فریودای بیەن. پێغەمبەرما(د.خ)سەربۊ فەرماۋانش '' ئانەی ئێمە خەڵەتنۊ جە ئێمە نییا'' ئا سیاسەتەی گېراشەنە ۋەر بە پاو بەرژەوەنڎی گەلی نییا".
هـ . ش
