ئەرەیاونایەکەو کەجەدەکە-ئەینە موچیۆ: "بانگەواز وەنەو گەلەکەیما مکەرمێ دژوو هجوومی ئەرەگیرکاریی دەوڵەتی تورکی قڕکەری پەی سەروو پانیشتوو کوردستانی و شەنگالی و مەیدانەکاو گەریلای سەفەربەرێ بانە و گرد یاگێوەنە چالاکیی ناڕەزایەتیی بکەرا".

"پانیشت و شەنگال ئینێ چێروو هەڕەشێوی جیددیێنە"

ئەرەیاونایەکەنە ئامان:

"هامپەیمانیی فاشیستیی ئاکەپە-مەهەپەی هجوومە سەرتاسەری و پاکتاوییەکاش پەی سەروو گەلوو کوردی سەرنەکەوت، پەی دلێنەبەردەی گردوو دەسکەوتەکاو گەلوو کوردی پا سەروو جەنگی مگێرۆرە.

دەوڵەتی قڕکەروو تورکی بە هامکاریی هێزە هامکارەکا و دەوڵەتاو هەرێمەکەی ئی جەنگەشە یاونا قۆناغێوی تازە. پەی ئینەیچە گردوو هەوڵەکاو ئاژاوەگێڵنی و دەرفەتەکا بەکار مارۆ.چی هجوومانە، کە بە پەشتیوانیی تەماموو پەدەکەی مکریانە، دەسکەوتەکێ و ئازادیی گەلوو کوردی مکریانە ئامانج.

پانیشت و شەنگال ئینێ چێروو هەڕەشە جیدییانە، دەوڵەتوو تورکی گەرەکشەن پانیشتی و شەنگالی ئەرەگیر بکەرۆ و بلکنۆش بە وێشۆ و هامشێوەو عەفرینی قڕش بکەرۆ. پەدەکە شانەبەشانەو دەوڵەتوو تورکی هەرمانە مکەرۆ، زەمینە پەی ئەرەگیرکاری وەش مکەرۆ و پەی ئینەیچە گردوو دەرفەتەکاش سەفەربەرێ کەردێنێ.

جووڵەی سەروازیی فراوان پانیشتوو کوردستانینە، بە پەشتگیریی پەدەکەی بەردەواما. پەدەکە ڕای ڕسمییەش پەی سوپای ئەرەگیرکەرەو تورکی کەردێنۆ و گرد کۆنتڕۆڵێوەش وستەن دەسوو سوپاو تورکی. دەوڵەتوو تورکی بە فراوانکەردەی هجوومەکاو ئەرەگیرکاری گەرەکشەن ئیدارەو پانیشتوو کوردستانی بوزۆنە چێروو خاتە ڕکێفوو وێشۆ.

حکومەتوو عێراقی جیای ئانەیە وەراوەروو سەپنایەکاو دەوڵەتوو تورکیوە هەڵوێست وربگێرۆ، بەشداریی جە سیاسەتی ئەرەگیرکاری و قڕکەردەی دەوڵەتوو تورکینە مکەرۆ. ئی هامکارییە کە هەڕەشێ وەنەو دماڕۆو  گەلوو کوردستانی مکەرۆ، هەڕەشێوی جیددییەنە و بەرژەوەندیی گەلاو عێراقینە نییەنە.

"خاکوو کوردستانی و دماڕۆو گەلوو کوردی ئامانجوو هجوومەکان"

تەڤگەروو ئازادیی کوردی زیاتەر جە ٤٠ ساڵان پەی بۆ دماڕۆو ئازادیی گەلەکەیما کۆشیاێوی ڕەوا مکەرۆ. ئانە کە مکریۆ ئامانج دەسکەوتەکاو گەلوو کوردستانی و گردوو بەهاکاو کوردستانینێ. دماڕۆو ئێمەن و خاکەکەما و تارێخوو ئێمە ئامانجوو هجوومەکان. جیای دماڕۆیێوی ئازادی، ئاسیمیلاسیۆن و قڕکەردەی سەروو گەلوو کوردیوە مکەرا.  

تا هجوومەکێ بمەڕیا و گەلوو کوردی هەلومەرجی ئازادەنە بژیوانە، پێویسا گردوو گەلی وەڵاتپارێزنوو کوردستانی هەست پی کارەساتەیە بکەرا و بە خاوەندارێتیێوی ڕۆشن و قەوەتۆ دژوو هجوومەکا بمدراوە، تەنیا پێسە متاوانە ئا خاکەیە بپارێزنا، کە هەزاران کەسێ گیانشا پەی بەخشان.

"گرد یاگێونە ئەرەپڕدێ"

پێویسا گەلەکەما هاگاداروو دەرئەنجامەکاو زیادبییەی هەڕەشەکا بۆ و گرد یاگێوەنە ناڕەزایەتیی دیموکراتیک نیشانە بدۆ و بەتندی دژوو ئەرەگیرکاری و خیانەت و قڕکەردەی بمردۆوە. پێویسا گرد یاگێوی بەروو وەڵاتینە دژوو ئەرەگیرکاری هەڵوێست و ناڕەزایەتی بەرموزمێ و مەیدانەکانە دەنگما بەرز مکەرمێوە. دژوو هجوومی سەرتاسەری و خیانەتوو هامکاری، بانگەواز مکەرمێ پەی مدرامانی سەرتاسەری.

سەروو ئی بناغەیە پێویسا گردوو ئا چالاکییە جەماوەرییا ئاخروو هەفتەینە، کە ئەوروپا نە پلانەشا پەی نیێنەرە، بکریا بە بۆنیوی پەی بەروستەی ناڕەزایەتی، بەردەوامێ با جە کەردەی چالاکی و دژوو قڕکەردەی دەوڵەتوو تورکی بمدرانێوە".