هامسەرۆکایەتی کۆنسەو ڕاوەبەری کەجەکەی داواش جە تەماموو کوردسانیا و دۆساشا جە ئەورووپانە کەرد، ١٧و شوباتی جە ڕاپیماو شاروو کۆڵنینە کە پۍ ئازاڎیی ڕابەروو گەلوو کوردی عەبدوڵا ئۆجالانی ملۆڕاوە بەشداری کەرا.
هامسەرۆکایەتی کۆنسەو ڕاوەبەری کەجەکەی ئەرەیاۋنێوەش وەڵاکەردۆ و داواو بەشداریکەردەیش جە ڕاپیماو ١٧و شوباتی جە شاروو کۆڵنینە کەرد. جە ئەرەیاۋناکەینە ئاماژە پانەی کریان: جە ١٧و شوباتینە گەلەکەما ئەوروپانە بە بەشداریی کەردەی جە ڕاپیما گۆرەکەو شاروو کۆڵنینە، وڵاتپارێزی و دڵسۆزی ۋێشا پۍ ڕابەر ئاپۆی جە بەرزتەرین ئاستەنە نیشانە بڎا.
دەقوو ئەرەیاۋناکەو کەجەکەی پی جۆرەنە:
"بەدەسوەڵێوستەی و سەرمەشقایەتی دۆسا میان نەتەوەیی گەلوو کوردی کە جە ١٠و تشرینوو یووەم و ٢٠٢٣ بە دروشمەو 'ئازاڎیی ثۍ ڕابەر ئاپۆی، چارەسەری پرسوو کوردی' دەسشپنەکەرد". هەڵمەتێوە تاریخیە سەبارەڎ بە ساڵیاڎوو پیلانگێڵنی میان دەوڵەتی دەسش پنەکەرد، جە ڕوو ئەنجامەکاوە هەڵمەتێوە تاریخیە بۍ، هەڵمەتەو ئازاڎیی نەک تەنیا پۍ گەلوو کوردی، بەڵکم پۍ گرڎوو مرۆڤایەتی دەرئەنجامی ماناڎارش وەشکەردەن. هەر جە سەرەتاو پیلانگێڵنی میان دەوڵەتییوە، گەلوو کوردی حۆڵوو ئانەی مڎۆ دەنگش بیاوۆ بە تەماموو دنیۍ. هەڵمەتەو ئازاڎیی دەنگوو گەلەکەیماش یاونا بە ئامانجوو ۋێش. سەرەتا گەلا ستەم ۋنەکریۍ جەهانی و ژەنا، کە تەژنەو ئازاڎیی و دیموکراسینۍ، بە بەدەسئاردەی فکر و ڕێکوستەی و پراتیکیوە بە هەڵمەتەو ئازاڎیی یاوۍ بە ئامانجە تاریخیەکەیشا. مرۆڤایەتی جە ڕوو فکر و پراتیکییوە چا ڕوۆ کە سۆسیالیزمی ڕئال هۊرشێویانۆ و پارچە پارچە بیەن. بە تیۆری و پارادایموو ڕابەر ئاپۆی، تا حەدێوە ۋەرچەم ئی ئاژە پارچە بیەیە، ویەریان. بەشداربیا ڕاپیماو ئازاڎیی جە گرڎوو دنیێوە و جە بەشە جیاوازەکا گلێرگەیۆ بە قسۍ و چالاکییەکاشا ئی ڕاسییە نیشانە مڎا. وەختۍ تەماشەو ئی دووە دەرئەنجامە تاریخیە کەرمۍ بەڕۆشنی پێما بەرگنۆ کە هەڵمەتەو ئازاڎیی هەنگامێوە تاریخیەنە و دەرئەنجامی تاریخیچش چنە گنۆوە. پی مەعنۍ هەڵمەتەو ئازاڎیی پۍ گرڎوو مرۆڤایەتی جە ئەڎابیەو ڕووێوە تازەیا. ئێمە پەشتگیری گرڎوو ئا کەس و لایەنا کەرمۍ کە بەشداریشا جە هەڵمەتەکێنە کەردەن، گرڎوو ئانیشا کە سەرمەشقایەتی ڕاپیمای تاریخی ئازاڎیشا کەردەن، گەلا ستەم ۋنەکریاو جەهانی، کرێکارا، ئیکۆلۆژیستەکا، ڕۆشنۋیرا، ژەنا، گەنجا، و گرڎوو ئا کەسای کە جە تەماموو دنیێوە، بەشداریشا کەردەن، سوپاس پۍ پەیام و چالاکییەکاتا. بێ گومان ئی سەرکۊتەیە بە پلەی یووەم سەرکۊتەی گەلی وڵاتپارێزوو کوردسانین. گەلوو کوردی بە دڵسۆزی و کۊشیای سەرەمڕەش پۍ ئازاڎیی ڕابەر ئاپۆی، هیواش بە مرۆڤایەتی بەخشان و کۆشیای یەکسانی و ئازاڎیی و دیموکراسیش بەقوەتتەر کەردەن. پۊکاتی بە تایبەتی پیرۆزبایی جە گەلی وڵاتپارێزوو کوردسانی کەرمۍ.
هەڵمەتەو ئازاڎیی پرۆسێوە تاریخیا
ئێمە ئینایمۍ پرۆسێوە گرنگوو تاریخینە. چی پڕۆسەنە هەڵمەتەو ئازاڎیی ئا گەلەی کە پەی یەکسانی و ئازاڎیی و دیموکراسی جە دژوو ستەمی، چەوەسیایۆ و کۆیلایەتی کۊشیای کەرا بە قوەتتەر کەرد. چی پرۆسەنە کە ملەملانێ و جەنگوو بەینوو هێزەکا مۆدێرنیتەی سەرمایەداری کە دوژمنوو مرۆڤایەتی و سروشتین، قووڵتەر بیەنۆ، یەکڕیزی و تەبایی بەینوو هێزەکا مۆدێرنیتەی دیموکراتیکی کە پەی یەکسانی، ئازاڎیی و دیموکراسی کۊشیا، ئانڎەیتەر گەشەش کەردەن.گەلاو جەهانی بە هیواو ژیۋایۍ تازەی، جیهانێوە ئازاڎ بەبێ ئەرەگیری، جە هەڵمەتەو ئازاڎینە کوۍ بیێنێوە. ئێمە ئینەی پێسە وەڵێکۊتەیۍ گرنگ و تاریخی وینمۍ. ئێمە تەسەورما پاسەن گرڎ کەسێ پی جۆرە تەماشەش کەرۆ و قیمەتش مزانۆ. ئیسە وەختوو ئانەین کە ئی پڕۆسە تاریخیە بلۊنە دلۍ قۆناغێوی تازەیۆ، بەرەو ئاستێوە بەرزتەرش بەرمۍ. گەلەکەما و گرڎوو دۆساشا بە ڕاپیمای و گلێرۆبیەی گۆرەو کۆڵنی ئی ئیراڎەشا نیشانەدان.
بە گلێرۆبیەی کۆڵنی قۆناغێوە تازۍ دەس پنەکەرۆ
هەڵمەتەو ئازاڎیی، گۆشەگیری ڕەهاو سەروو ڕابەر ئاپۆی، ئازاڎیی جەسڎەیی ڕابەر ئاپۆی و چارەسەری سیاسی پرسوو کوردیش ئارڎ دلۍ ڕۆژەڤی و پی جۊرە دەسشپنەکەرد. ئێمە تەسەورما پاسەن ، پا چالاکییا کە تا ئیسە ئەنجام دریێنۍ، ئی ئامانجە بەدەس ئامان و قۆناغێوە تازۍ بە گلێرۆبیەی گۊرەکەو کۆلنی جابەجێ کریۆ. گلێرۆبیەی گۊرەکەو شاروو کۆڵنی چی ڕوۆ فرە گرنگا کە بە ئاست و کوالیتیوە بلۆڕاوە. داوا جە گرڎوو گەلەکەیما کەرمۍ جە ئەوروپا، چنی دۆسەکاشا بەشدارۍ گلێرۆبیە گۊرەکەو ١٧و شوباتوو شاروو کۆڵنی با و وڵاتپارێزی و دڵسۆزی ۋێشا پۍ ڕابەر ئاپۆی جە بەرزتەرین ئاستەنە نیشانە بڎا.
