هونەرمەڼەو کورڎی بەسەر شاهینە پەی یاڎو ژینا ئەمینیۍ بەرهەمێوەش بە نامۍ 'ژینا ئەمینی'ۍ وەڵا کەرڎۆ و ماوۍ چێوەڵتەریچ کلیپش پەی ئا گۆرانیۍ کەرڎ. هۆنیەو گۆرانیەکۍ هەر جە لایەنو بەسەر شارینێوە نویسیێنە و موزیقاکەیچش جە لایەنو هونەرمەڼ مەمۆ گوڵیۆ ئاماڎەکریان.

جە قۆناغەو بەرهەمئاورڎەو گۆرانیۍ و کلیپەکەینە ژمارێوە فرە جە هونەرمەڼا بە شێوەی جیاجیا بەشدارۍ بێنۍ.

گۆرانیەو 'ژینا ئەمینی'ۍ هونەرمەڼ بەسەر شاهینۍ تەنیا گۆرانیێوە نییەنە، جە هەمان کاتەنە روخسارو ئەرەکۊشای ئازاڎیی، ئاستەنگیەکا ۋەردەمیشا و ئێشو مەینەتیەکا ژەنا کورڎین.

بەسەر شاهینە باسش چانەی کەرڎ کە پېسە ژەنێوە و هونەرمەڼێوە کورڎی ئا ئێشەو گلێرگەی و جوگرافیاو ۋێش بە قووڵی هەستپنەکەرڎەن و واتش، "جە دووەم ساڵیاڎو گەشمەرڎەبیەو ژینا ئەمینیێنە بە رێزۆ یاڎەش مکەرمێوە. جە کەسایەتی ژینێنە گەشمەرڎا ئەرەیاۋنای ئازاڎی و گرڎو ئا ژەنا کە پەی ئازاڎیی قوربانیشا دان، بە رێزۆ یاڎشا مکەرووە. ژینا ئەمینیە کناچێوە جوانەو ۋەرکۊتی بۍ. جە لایەنو رژێمو مەلاکاوە کوشیا. ئێمە مزانمۍ کە مەڵامەتوو کوشتەیش تەنیا بەرکۊتەو قژا و زەریفیەکەیش نەبۍ؛ بەڵکم ئشناسنامەو ئاڎۍ بۍ. قۆناغێوە وەڵۍ ئاڎۍ و دماو ئاڎۍ بۍ. گەلەکەما چا پەی ئشناسنامە و کولتور و بیەو ۋێشا قوربانیشا دان. قژۍ ژینۍ کریۍ بە بەهانۍ و ئاڎەشا کوشتە. بەڵام ئانە پەیامێوە بۍ. خەڵکەکەما چی جوگرافیانە، گەلوو کورڎی ئینا چێرو هەڕەشێنە. جە ڕاو جە قەنارەدای و کۆمکوژیۆ هەڕەشێش ۋنە مکریۆ".

بەسەر شاهینە ئاماژەش پانەیچ کەرڎ کە دماو کوشیای ژینا ئەمینیۍ دروشمەو ' ژەنی، ژیۋای، ئازاڎیی' فاڕیا پەی ئەرەکۊشای ژەنا جیهانی و واتش، "ئەگەر بەمەڵامەتوو ئەرەکۊشای ژەنا کورڎیوە نەبیۍ، رەنگە کوشتەی ژینۍ جە یاڎ کریۍ".

بەسەر شاهینە ئانەیچش وست ڕووە کە ۋێراگری جمیەرو ژەنا کورڎی جە خاوەنداریکەرڎەی جە ژینا ئەمینیۍ بی بە مەڵامەتوو ئانەی کە جە یاڎە نەکریۆ و ئەرەیاۋنایچش، "پېسە مرۆڤێوە کە درکش پانەی کەرڎ، نیازم بنویس و ئانەم کەرڎ. هیواڎارەنا کە ئانەیچ جە زېڵۍ مرۆڤەکانە ڕاو ۋێش بکەرۆوە. خاوەنداری جمیەرو ژەنا کورڎی کە رێکوزیا، زانا و قەوەت بۍ، پاسشە کەرڎ کە ژینا ئەمینیە جە یاڎ نەشۆ و بۆ بە هێما و رەمزێوە ئەرەکۊشای ژەنی، ژیۋای، ئازاڎیی. ئەگەر جە سەیەو ئا ئەرەکۊشا قەوەتەو ژەنا کورڎیوە نەبیۍ، کوشیای ژینا ئەمینیێچ پېسە کوشیای ژەنا وەڵۍ ۋێش جە یاڎ کریۍ. گلېرگە هوشیارا و ژەنیچ خاوەن هوشیاری و رێکوستەینۍ. کوشتەی ئیتر بە بێدەنگی جە یاڎ نمەکریۆ. پۊکەی ئیتر ڕەمزێوەنە. جە دۆزو ئێمەنە و جە ئەرەکۊشایمانە، یووەنە جە ڕەمزە گرنگەکا. ۋەرو ئانەی سەڎان ڕەمزۍ و سیمبولێما هەنۍ. ژینا ئەمینیە ئیتر تەنیا کناچۍ ئەڎاو تاتەو ۋێش نیەنە بە تەنیا، ئاڎە کناچۍ گەلوو کورڎی و رۆڵۍ گەلوو کورڎی و بەهاو گەلوو کورڎینە. جیا چانەیچ بیە بە هێماو ئەرەکۊشای ژەنا جیهانی".