ڕۊنامەنویسوو بەشوو عەرەبیی ئاژانسوو ڕۊژنویسی سلێمان ئەحمەد ١وو تشرینوو یوەمی سەرۍ بنەیانەکەیش دابۍ حەڵەبنە سەرنیشت و وەرکەوتوو سوریاینە. ٢٥وو تشرینوو یوەمینە جە ڕاو گێڵایۊشنە دەوازەو پێشخابور (سێماڵکە)و بەینوو وەرنیشت و سەرنیشتوو کورڎسانینە لاو هێزەکاو پەدەکەیوە دەسبەسەر کریان و ماوەو ١٤ ڕوان حیچ زانیاریێوەش وەردەس نییا. کۊمەڵەو ڕۊنامەنویساو دیجلە فوراتی ئەرەیاوناێوەش سەروو ئازاڎکەردەی ڕۊنامەنویس سلێمان ئەحمەدی وەڵا کەردۊ.  

ئەرەیاونایەکەو دەفەگەی پێسنەن:  

"حەتا جیهاننە هەلومەرجی سڵامەت و ئازاڎ پەی ڕۊنامەنویسا و میدیاکارا نەلۊ ڕاوە، گەل مەتاوا باسوو ڕۊنامەگەریی ئازاڎی و ویری ئازاڎی کەرا". بەتایبەتی جە وەرکەوتوو دلیڕاسەینە، شانسوو ژیوای ڕۊنامەنویسان کە بتاوا هەرمانەکاشا بە تەندروسیێوە  خاسۊ کەرا فرە قورسا. ئی دۊخە هەرێموو کورڎسانینە سەختتەرا. پەدەکە کە پێسە جمنەروو ئیدارەو فاشیستوو تورکی هەرمانە کەرۊ، جە هەرێموو کورڎسانی فیدراڵی ڕا مەدۊ بە نامۍ ئازاڎیی ڕۊنامەنویسیوە حیچ بەهێوە گەشە کەرۊ و گرڎوو بوارەکاو هەرمانکەردەیش وستەنرە.

چی دماییاوە سلێمان ئەحمەد ڕۊنامەنویسوو ڕۊژنیوزی پەی سەردای خانەوادەکەیش لوا شاروو حەلەبی جە سەرنیشت و وەرکەوتوو سوریاینە. وەختۍ جە ٢٥وو تشرینوو یوەمینە حەلەبۊ گێڵاوە پەی هەرێموو کورڎسانی فیدراڵی، جە سنووروو پێشخابورینە لاو هێزەکاو پەدەکەیۊ ڕفانییان. چا ڕووەوە تا ئیساتۍ حیچ زانیاریێوە جە سلێمان ئەحمەدیوە بەدەس نامان.

سلێمان ئەحمەد، خەڵکوو وەرنیشتین، ماوەو 5 ساڵان هەرێموو کورڎسانوو فیدراڵینە ئەرەنیشتەن و ڕۊنامەنویسوو بەشوو عەرەبیین جە ئاژانسوو ڕۊژنیوزینە. ئەحمەد پەی بەشداریکەردەی جە مەراسیموو پەرسەو تاتەیش جە ڕۊو ١وو تشرینوو یوەمینە لوا وەرنیشت وسەردای خانەوادەکەیش کەردەن. جە ٢٥وو تشرینوو یوەمینە حەلەبۊ  گێلاوە هەرێموو کورڎسانی فیدراڵی. وەلۍ وەختۍ گێڵاوە مەرزوو پێشخابورینە لاو هێزەکاو پەدەکەیوە دەسبەسەر کریان. بە پاو ئا زانیارییا دەسمان کەوتەن، هیچ کێشێوە یاسایی جە ئامای و لوای سلێمان ئەحمەدینە پەی  پانیشتوو کورڎسانی نییا. سەرەڕاو ئی دۊخەیە، پەدەکە ڕفانانش و چا ڕووەوە هەم ئاژانسەکە و هەم بنەیانەکەش هیچ زانیاریێوەشا جە ئەحمەدیوە نیا.

"ئیدارێوە کە بواچۊ 'من کوردنا' مەبۊ پێسە بۊ"

ئاندە یاوێنێنە ڕووبەڕوو گەمێوە گڵیاوو پەدەکەی بیێنمێوە. ئی شێواز و کردەوا شایانۍ ئیدارێوە نییەنۍ، کە بواچۊ من کوردنا. ئەگەر ئینسان پێناسەش بکەرۊ، ئینە شێوازوو هێزە تاریکەکاو (ژیتەم)ین. ئینەیچ قبووڵ مەکریۊ. هەرێموو کورڎسانی فیدراڵینە وەڵتەر دەیان نموونۍ هامشێوۍ چانۍ بیێنۍ.  ئێمە ئاگادارۍ ئا نموونانمۍ.  بەتایبەتی دژوو ڕۊنامەنویسان سیاسەتێوە فرە خۊفناک و گڵیاو ملۊ ڕاوە. پێسە و ئی هەرمانۍ ئازاڎیی ڕۊنامەگەریی پاشێل کریۊ. ئێمە جە نموونەو ڕۊنامەنویسە کوشیایا و ئا ڕۊنامەنویسا، کە ساڵانێوەن ئینۍ زینداننە، دەزانین کە پەدەکە و ئیدارەو هەرێموو کورڎسانی چا بوارۊ هەرمانامێوە گڵایاوشا هەن. پەوکای ئێمە نیگەرانۍ ژیوای سلێمان ئەحمەدینمۍ.

"مەبۊ کەس وەراوەروو کردەوەکاو پەدەکەینە بێدەنگ بۊ"

پێسە وەڵتەری ئەوەخوایش کەرمێوە، مشۊم ڕۊنامەنویسۍ هەر وەخت و بوارێوەنە جە هەلومەرجێوە سڵامەتی و ئازاڎینە بتاوا هەرمانەکاشا ئەرەپڕنا و خەبات کەرا. بەتایبەتی پێویسا مافوو ژیوایشا مسۊگەر کریۊ. ئێمە پێسە ڕۊنامەنویسێوە کە فرەوجارا جە ڕووەو ئەمنیەتی و ئازاڎیی ڕۊنامەنویسیوە تورکیانە تووشوو کێشەی بیمۍ، ماچمۍ ئا ڕێبازەو پەدەکەیە هیچ جیاوازیێوەش نییا چەنی چەوسنیایۊ دەسەڵاتوو تورکی و یاگۍ قبووڵکەردەی نییا.

پەوکای داوا جە ئیدارەو هەرێموو کورڎسانی کەرمۍ، ڕای گرڎین جە چارەنویسوو ڕۊژنامەنویس سلێمان ئەحمەدی ئاگادار کەراوە و پێویسا دەمودەس ئازاڎ کریۊ. بەپێچەوانەوە، حەر وەڵێئاما و ڕووەداێوە نەرێنی سەروو ئەحمەدیوە ڕووە بدۊ، ئیدارەو پەدەکەی و هەرێموو کورڎسانی وەرپەرسۍ با. پا بۊنەوە داوا جە گرڎوو ویروڕای گرڎینی و جیهانی کەرمۍ دژوو کردەوەکاو پەدەکەی وەراوەروو سلێمان ئەحمەدیوە بێدەنگۍ نەبا و هەڵوێستشا بۊ.